រាជធានីភ្នំពេញ ៖ កម្លាំងនគរបាលរាជធានី ចុះចាប់ខ្លួនជនសង្ស័យបានជាបន្តបន្ទាប់ ចំនួន០៨នាក់ បញ្ជូនទៅតុលាការ ក្រោយមានប្រជាពលរដ្ឋល្អ រាយការណ៍តាមអេប NoDrug ។…
រាជធានីភ្នំពេញ ៖ កម្លាំងនគរបាលរាជធានី ចុះចាប់ខ្លួនជនសង្ស័យបានជាបន្តបន្ទាប់ ចំនួន០៨នាក់ បញ្ជូនទៅតុលាការ ក្រោយមានប្រជាពលរដ្ឋល្អ រាយការណ៍តាមអេប NoDrug ។
នៅថ្ងៃទី០៨ ខែឧសភា ឆ្នាំ២០២៥ លោកឧត្ដមសេនីយ៍ទោ ឃន តារាសម្បត្តិ អគ្គលេខាធិការរង និងជាប្រធានអនុគណៈកម្មការប្រចាំបញ្ជា២៤ម៉ោង បានបញ្ជាកម្លាំងអនុគណៈកម្មការ សហការ និងផ្តល់ព័ត៌មានដល់កម្លាំងស្នងការដ្ឋាននគរបាលរាជធានីភ្នំពេញ ។
លោកឧត្ដមសេនីយ៍ទោ គល់ យី ស្នងការរង ទទួលផែនការងារប្រឆាំងគ្រឿងញៀន បានអោយដឹងថា ដោយមានការ សម្របសម្រួលនីតិវិធីពីព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ក្រោយពីទទួលបានព័ត៌មាន កម្លាំងបានចុះទៅដល់ទីតាំង និងធ្វើការស្រាវជ្រាវមុខសញ្ញា ដែលប្រជាពលរដ្ឋរាយការណ៍នៅខណ្ឌច្បារអំពៅ រាជធានីភ្នំពេញ ។
ក្រោយពីធ្វើការស្រាវជ្រាវជាច្រើនសប្តាហ៍ មកដល់ថ្ងៃទី០៧ ខែឧសភា ឆ្នាំ២០២៥ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ដឹកនាំដោយបញ្ជាផ្ទាល់ដោយលោកវរសេនីយ៍ឯក មៀច ឈួនស៊ីម៉ូលីន នាយការិយាល័យ និងមានការចូលរួមសហការជាមួយ កម្លាំងសមត្ថកិច្ច នៃអធិការដ្ឋាននគរបាលខណ្ឌច្បារអំពៅ បានធ្វើការស្រាវជ្រាវ និងកំណត់មុខសញ្ញាជាមេក្លោង (មានដីកា) រហូតឈានដល់ការបង្ក្រាបជាក់ស្តែងករណី “ដឹកជញ្ជូន និងរក្សាទុកដោយខុសច្បាប់នូវសារធាតុញៀន” ។
លោកឧត្ដមសេនីយ៍ទោ គល់ យី អោយដឹងបន្តថា ឃាត់ខ្លួនពិរុទ្ធជនឈ្មោះ ម៉ូវ សុភា ហៅ អាស្រម៉ូវ ភេទប្រុស អាយុ៣៩ឆ្នាំ ជនជាតិខ្មែរ (មានដីកាបង្គាប់ឲ្យចាប់ខ្លួន)។ ដកហូតវត្ថុតាង មាន៖ ក្រាមពណ៌សថ្លា ជាគ្រឿងញៀន ចំនួន០៤កញ្ចប់ថង់, ជញ្ជីងសម្រាប់ថ្លឹងគ្រឿងញៀន ចំនួន០១ និងថង់សម្រាប់ច្រកគ្រឿងញៀនមួយចំនួន ។
បើតាមការស្រាវជ្រាវស៊ើបអង្កេតរបស់កម្លាំងសមត្ថកិច្ចជំនាញ ប្រមូលបានព័ត៍មានយ៉ាងជាក់លាក់អំពីមុខសញ្ញាចែកចាយ ជួញដូរនៅក្នុងមូលដ្ឋាន(ខណ្ឌច្បារអំពៅ) និងផ្អែកតាមចម្លើយសារភាពរបស់ពិរុទ្ធជនខាងលើ ព្រមទាំងមានការឯកភាពពី លោកព្រះរាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងជំនាញបាននាំពិរុទ្ធជន មានរហ័សនាម អាស្រម៉ូវ ទៅចង្អុលបង្ហាញ ទីតាំងបក្ខពួកលាក់ខ្លួន និងបានធ្វើការបង្ក្រាបជាក់ស្តែងករណី “ជួញដូរដោយខុសច្បាប់នូវសារធាតុញៀន និងកាន់កាប់អាវុធដោយគ្មានការអនុញ្ញាត” ព្រមទាំងបានធ្វើការឃាត់ខ្លួនជនសង្ស័យចំនួន០៧នាក់ បន្ថែមទៀត រួមមាន ៖
ទី១.ឈ្មោះ ផន រ៉ា ភេទប្រុស អាយុ៤១ឆ្នាំ
ទី២.ឈ្មោះ តូច សុភ័ក្ត្រ ភេទប្រុស អាយុ៣៩ឆ្នាំ
ទី៣.ឈ្មោះ មឿន និមល ភេទប្រុស អាយុ៤០ឆ្នាំ
ទី៤.ឈ្មោះ សោម វណ្ណេត ភេទប្រុស អាយុ៣១ឆ្នាំ
ទី៥.ឈ្មោះ អ៊ាន សំណាង ភេទប្រុស អាយុ៣៤ឆ្នាំ
ទី៦.ឈ្មោះ ផន ណាផា ភេទប្រុស អាយុ១៨ឆ្នាំ
និងទី៧.ឈ្មោះ សួន សាឡាង ភេទប្រុស អាយុ៣៤ឆ្នាំ ។
អ្នកទាំង០៧ នាក់នេះ គឺសុទ្ធសឹងតែជាជនជាតិខ្មែរ ។
ដោយដកហូតវត្ថុតាងរួមមាន ៖ ក្រាមពណ៌សថ្លា ជាគ្រឿងញៀន ចំនួន០៨កញ្ចប់, ជញ្ជីងសម្រាប់ថ្លឹងគ្រឿងញៀន ចំនួន០៣, ឧបករណ៍សម្រាប់ប្រើប្រាស់គ្រឿងញៀនមួយចំនួន, ថង់សម្រាប់ប្រើប្រាស់គ្រឿងញៀនមួយចំនួន, កាំភ្លើងកែច្នៃចំនួន០២ដើម, កាំបិត ចំនួន០៧ដើម, ដាវកែច្នៃ ចំនួន០៦ដើម និងពូថៅ ចំនួន០២ដើម, ដំបង ៣កំណាត់ ចំនួន០១ ។
បច្ចុប្បន្ន ជនសង្ស័យខាងលើ រួមនឹងវត្ថុតាង បញ្ជូនមកទីការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ដើម្បីធ្វើការសាកសួររកបក្ខពួក្ខដែលនៅសេសសល់ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ៕
ចែករំលែកព័តមាននេះ