រាជធានីភ្នំពេញ ៖ យុវជនម្នាក់បានស្លាប់បាត់បង់ជីវិតភ្លាមៗនៅនឹងកន្លែង ចំណែកអ្នករួមដំណើរម្នាក់ទៀតបានបួសធ្ងន់ធ្ងរ ខណៈជនរងគ្រោះរូបនោះបេីកបរម៉ូតូកង់បីដឹកគ្រឿងសំណង់១គ្រឿងក្នុងល្បឿនលឿនជែងរថយន្ត១គ្រឿងទៀតដែលកំពុងបើកបរស្របគ្នា ។ បន្ទាប់មកក៏ជ្រុលទៅបុកពីក្រោយរថយន្តបែនដឹកដី១គ្រឿង ដែលបែកកង់ហើយកំពុងឈប់ស្ងៀមនៅលើផ្លូវបេតុងពេញទំហឹង បណ្ដាលឲ្យយុវជននោះគាបជាប់ពីក្រោយរថយន្តដូចគេគ្រីប ហើយម៉ូតូកង់បីក៏បានដាច់កង់មុខថែមទៀតផង ។
ឧប្បត្តិហេតុនោះបានកើតឡើងកាលពីវេលាម៉ោង៣និង៣០នាទីរសៀលថ្ងៃទី០៨ ខែឧសភា ឆ្នាំ២០២៥ នៅលើផ្លូវបេតុង ស្ថិតនៅក្នុងភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
យុវជនរងគ្រោះដែលស្លាប់បាត់បង់ជីវិតនោះឈ្មោះ សាត ភក្ត្រាអាយុ២១ឆ្នាំ មុខរបរបើកបរម៉ូតូកង់បីដឹកគ្រឿងសំណង់នៅឃ្លាំងលេខ៧ ស្នាក់សង្កាត់ច្រាំងចំរ៉េះ២ ខណ្ឌឫស្សីកែវ រាជធានីភ្នំពេញ ។ មានស្រុកកំណើតនៅខេត្តបន្ទាយមានជ័យ ចំណែកអ្នករួមដំណើររបួសធ្ងន់មិនទាន់ត្រូវបានស្គាល់ឈ្មោះឡើយ និងត្រូវបានសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យជាតិតេជោសន្តិភាព ។
តាមប្រភពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុយុវជនរងគ្រោះទាំង២នាក់បានបើកបរម៉ូតូកង់បី១គ្រឿងពាក់ស្លាកលេខភ្នំពេញ1FS-6683 និងមានឡូហ្គោ«ឃ្លាំងលេខ៧» ដឹកគ្រឿងសំណង់ ធ្វើដំណើរក្នុងទិសដៅពីលិចទៅកើត ក្នុងល្បឿនលឿន ។ លុះពេលទៅដល់ត្រង់ចំណុចកើតហេតុបានវ៉ាជែងរថយន្តពុំស្គាល់ម៉ាក១គ្រឿងដែលកំពុងបើកបរស្របគ្នា រួចក៏ជ្រុលទៅបុកពីក្រោយរថយន្តបែនដឹកដី១គ្រឿងម៉ាកនីស្សាន់ពណ៍ ស ពាក់ស្លាកលេខចង្កូតស្ដាំPP-3447 ដែលបែកកង់កំពុងឈប់ស្ងៀមនៅលើផ្លូវ ហើយអ្នកបើកបរដោះកង់យកទៅប៉ះ ។
ប្រភពដដែលបានប្រាប់ឲ្យដឹងបន្តទៀតថា ខណៈនោះបណ្ដាលឲ្យយុវជនដែលជាអ្នកបើកបរម៉ូតូកង់បីគាបជាប់ពីក្រោយរថយន្តស្លាប់ភ្លាមៗមួយរំពេច ចំណែកអ្នករួមដំណើរជាមួយរងរបួសធ្ងន់ ។
ក្រោយពេលកើតហេតុនគរបាលប៉ុស្តិ៍សំរោងក្រោមបានចុះទៅសម្រួលចរាចររណ៍មិនឲ្យកកស្ទះ រួចបានរាយការណទៅកាន់នគរបាលការិយាល័យចរាចរណ៍នៃស្នងការដ្ឋានរាជធានីភ្នំពេញដើម្បីចុះទៅធ្វើការវាស់វែងនិងចាត់ការតាមច្បាប់ ៕
ចែករំលែកព័តមាននេះ