ប្រទេសចិន ៖ បណ្តាសេដ្ឋី និងមហាសេដ្ឋីចិនកំពុងបង្វែរការផ្តោតអារម្មណ៍របស់ពួកគេទៅកាន់អចលនទ្រព្យក្នុងប្រទេសម៉ាឡេស៊ី សិង្ហបុរី និងអូស្ត្រាលីកាន់តែខ្លាំងឡើង ខណៈដែលចំណាប់អារម្មណលើទីផ្សារសហរដ្ឋអាមេរិកធ្លាក់ចុះខ្លាំង ចំពេលមានភាពតានតឹងផ្នែកភូមិសាស្ត្រនយោបាយកើនឡើង។ នេះបើតាមប្រភពពីសារព័ត៌មាន VnExpress…
ប្រទេសចិន ៖ បណ្តាសេដ្ឋី និងមហាសេដ្ឋីចិនកំពុងបង្វែរការផ្តោតអារម្មណ៍របស់ពួកគេទៅកាន់អចលនទ្រព្យក្នុងប្រទេសម៉ាឡេស៊ី សិង្ហបុរី និងអូស្ត្រាលីកាន់តែខ្លាំងឡើង ខណៈដែលចំណាប់អារម្មណលើទីផ្សារសហរដ្ឋអាមេរិកធ្លាក់ចុះខ្លាំង ចំពេលមានភាពតានតឹងផ្នែកភូមិសាស្ត្រនយោបាយកើនឡើង។ នេះបើតាមប្រភពពីសារព័ត៌មាន VnExpress ចេញផ្សាយកាលពីពេលថ្មីៗនេះ។
នៅក្នុងការស្ទង់មតិមួយដែលបានចេញផ្សាយកាលពីខែមុន ដោយក្រុមហ៊ុនអចលនទ្រព្យអន្តរជាតិ Juwai IQI បានបង្ហាញថា សហរដ្ឋអាមេរិកបានធ្លាក់ពីតំណែងកំពូលរបស់ខ្លួនមកចំណាត់ថ្នាក់ទី៤ កាលពីឆ្នាំ២០២៤ ក្នុងចំណោមគោលដៅដ៏ពេញចិត្តសម្រាប់អ្នកទិញជនជាតិចិន ដែលកំពុងស្វែងរកអចលនទ្រព្យមានតម្លៃចាប់ពី៥លានដុល្លារអាមេរិកឡើង ខណៈប្រទេសថៃ គឺជាអ្នកដណ្តើមបានចំណាត់ថ្នាក់កំពូល និងតាមពីក្រោយដោយអូស្ត្រាលី កាណាដា ម៉ាឡេស៊ី និងចក្រភពអង់គ្លេស។
ការស្ទង់មតិបង្ហាញថា ៩៤% នៃអ្នកទិញកាលពីឆ្នាំមុន កំពុងស្វែងរកផ្ទះផ្ទាល់ខ្លួន ឬសម្រាប់គ្រួសារដូចជា ផ្ទះវិស្សមកាល ឬផ្ទះសម្រាប់កូនពួកគេស្នាក់នៅអំឡុងពេលសិក្សា។ ៦,៥% កំពុងទិញសម្រាប់គោលបំណងវិនិយោគ ខណៈមានត្រឹមតែ ៣% ប៉ុណ្ណោះ ដែលបានលើកឡើងពីការធ្វើចំណាកស្រុក។
អ្នកជំនាញបានកត់សម្គាល់ឃើញថា ការវិនិយោគរបស់ចិនក្នុងទីផ្សារអចលនទ្រព្យអាមេរិកបានធ្លាក់ចុះជាងពាក់កណ្តាលពីកម្រិតកំពូលក្នុងឆ្នាំ ២០១៧ ដោយសារបញ្ហាភាពតានតឹងភូមិសាស្ត្រនយោបាយ ជាតិនិយម និងការរឹតបន្តឹងការត្រួតពិនិត្យកើនឡើងនៃកិច្ចព្រមព្រៀងអចលនទ្រព្យ។
នៅពេលដែលអ្នកទិញជនជាតិចិនបានងាកចេញពីទីផ្សារសហរដ្ឋអាមេរិកនោះ ប្រទេសម៉ាឡេស៊ី និងសិង្ហបុរីបានលេចចេញជាជម្រើសដ៏សំខាន់របស់ពួកគេ។ ទិន្នន័យផ្លូវការបានបង្ហាញថា នៅក្នុងត្រីមាសទី១ នៃឆ្នាំនេះ វិនិយោគិនចិនបានទិញលំនៅដ្ឋានចំនួន៣០១ខ្នង នៅក្នុងប្រទេសសិង្ហបុរី កើនឡើង ៤២% បើធៀបនឹងចំនួន ២១២ខ្នង ដែលវិនិយោគិនចិនបានទិញកាលពីឆ្នាំមុន។
នៅម៉ាឡេស៊ីជិតខាងគ្នាឯណោះវិញ ការកែប្រែកម្មវិធី Malaysia My Second Home (MM2H) ដែលជាគម្រោងលំនៅដ្ឋានផ្តល់ជូនជនបរទេសនូវឱកាសរស់នៅម៉ាឡេស៊ី ក្រោមគំនិតផ្តួចផ្តើមដែលគាំទ្រដោយរដ្ឋាភិបាល ជាមួយអត្ថប្រយោជន៍សំខាន់ៗ កាន់តែផ្តល់ភាពងាយស្រួលសម្រាប់ជនបរទេសមានទ្រព្យសម្បត្តិច្រើនក្នុងការតាំងលំនៅ និងទិញអចលនទ្រព្យដោយប្រើប្រាក់បញ្ញើមានកាលកំណត់។ អ្នកជំនាញបានលើកឡើងថា ប្រទេសម៉ាឡេស៊ីបានរីកចម្រើនក្នុងការទាក់ទាញបរទេសជាទិសដៅ ដែលផ្តល់ជូននូវរបៀបរស់នៅដ៏ប្រណិតក្នុងតម្លៃសមរម្យ។ បើប្រៀបធៀបទៅនឹងទីក្រុងបាងកក ឬសិង្ហបុរីនោះ ផ្ទះនៅទីក្រុងគូឡាឡាំពួ ឬទីតាំងតាមឆ្នេរសមុទ្រមានតម្លៃថោកជាង ៨៧% ជាមួយនឹងការផ្តល់សំខាន់ៗជាច្រើនផ្សេងទៀត។
លើសពីតំបន់អាស៊ីអាគ្នេយ៍ ការចាប់អារម្មណ៍របស់សេដ្ឋី និងមហាសេដ្ឋីចិនលើអចលនទ្រព្យក៏បានកើនឡើងនៅប្រទេសអូស្ត្រាលី និងចក្រភពអង់គ្លេសផងដែរ។ លោក David Johnson នាយកគ្រប់គ្រងក្រុមហ៊ុនប្រឹក្សាអចលនទ្រព្យ Inhous ដែលមានការិយាល័យនៅទីក្រុងឡុងដ៍ បានលើកឡើងថា ថ្មីៗនេះក្រុមហ៊ុនរបស់លោកបានជួយអតិថិជនចិនមួយចំនួន ដែលត្រូវបានចាត់ទុកជាអតិថិជនរបស់សហរដ្ឋអាមេរិក។
លោកបានកត់សម្គាល់ថា ចក្រភពអង់គ្លេស ពិសេសទីក្រុងឡុងដ៍ គឺជាគោលដៅដ៏ទាក់ទាញដោយសារតែបណ្តាសាកលវិទ្យាល័យដ៏ល្អ ទិដ្ឋភាពវប្បធម៌ដ៏គួរឱ្យគោរព និងឱកាសការងារ ក៏ដូចជាការតភ្ជាប់ការដឹកជញ្ជូនរហ័សទៅកាន់តំបន់អឺរ៉ុប។
នៅប្រទេសអូស្ត្រាលីឯណោះវិញ លោក Peter Li អ្នកគ្រប់គ្រងទូទៅក្រុមហ៊ុនអចលនទ្រព្យ Plus Agency បានលើកឡើងថា នាយកប្រតិបត្តិជនជាតិចិន និងសហការីរបស់លោក ដែលតែងតែធ្វើដំណើរញឹកញាប់រវាងទីក្រុងសៀងហៃ និងសិង្ហបុរី ដើម្បីស្វែងរកអាជីវកម្ម បានចាប់ផ្តើមស្វែងរកអចលនទ្រព្យនៅទីក្រុងស៊ីដនី ដែលមានតម្លៃប្រហែល ៦,៤លានដុល្លារ កាលពីខែមុន បន្ទាប់ពីបោះបង់គម្រោងវិនិយោគលើអចលនទ្រព្យនៅសហរដ្ឋអាមេរិក។ លោកថា អូស្ត្រាលីមិនត្រឹមតែផ្តល់បរិយាកាសស្ថិរភាពជាងប៉ុណ្ណោះទេ ប៉ុន្តែក៏ជាតំបន់ដ៏ងាយស្រួលសម្រាប់អ្នកទិញដែលមានមូលដ្ឋាននៅអាស៊ី៕
ចែករំលែកព័តមាននេះ