ខេត្តបាត់ដំបង ៖ ការចាប់ផ្ដើមរំដោះចិញ្ចើមផ្លូវរបស់អាជ្ញាធរក្រុងបាត់ដំបង តាមរយៈការប្រើប្រាស់កម្លាំងចម្រុះចុះរុះរើផ្ទាល់លើសំណង់គ្មានច្បាប់ ដែលសាងសង់រំលោភលើដីចំណីផ្លូវ កាលពីរសៀលថ្ងៃទី០៧ ឧសភា គឺជាចាប់ផ្ដើមលើកដំបូង ដើម្បីរំដោះដីចំណីផ្លូវសាធារណៈ ពីកណ្ដាប់ដៃមនុស្សមួយចំនួន…
ខេត្តបាត់ដំបង ៖ ការចាប់ផ្ដើមរំដោះចិញ្ចើមផ្លូវរបស់អាជ្ញាធរក្រុងបាត់ដំបង តាមរយៈការប្រើប្រាស់កម្លាំងចម្រុះចុះរុះរើផ្ទាល់លើសំណង់គ្មានច្បាប់ ដែលសាងសង់រំលោភលើដីចំណីផ្លូវ កាលពីរសៀលថ្ងៃទី០៧ ឧសភា គឺជាចាប់ផ្ដើមលើកដំបូង ដើម្បីរំដោះដីចំណីផ្លូវសាធារណៈ ពីកណ្ដាប់ដៃមនុស្សមួយចំនួន ដែលលោភលន់សាងសង់សំណង់រំលោភបំពានលើចិញ្ចើមផ្លូវ មិនព្រមអនុវត្តតាមការជូនដំណឹងជាបន្តបន្ទាប់របស់អាជ្ញាធរក្រុងបាត់ដំបងកន្លងមកនេះ ។
អភិបាលក្រុងបាត់ដំបង លោក លាង វាសនា ដែលដឹកនាំកម្លាំងចម្រុះចុះរុះរើសំណង់គ្មានច្បាប់ កាលពីម្សិលមិញបាននិយាយថា យើងបានចាប់ផ្ដើមចុះរុះរើសំណង់អនាធិបតេយ្យ ដែលសាងសង់រំលោភបំពានលើដីចំណីផ្លូវនានាហើយ ។ លោកបានបន្តថា ល្មមដល់ពេលយើងរំដោះចំណីផ្លូវនានា នៅក្នុងក្រុងហើយ ដើម្បីរៀបចំសណ្ដាប់ធ្នាប់កែលំអចិញ្ចើមថ្នល់ និងរៀបចំឲ្យមានផ្លូវសម្រាប់អ្នកដំណើថ្មើរជើង និងអ្នកជិះកង់ ។
លោកអភិបាលក្រុងរូបនេះក៏បានបញ្ជាក់ដែរថា រដ្ឋបាលក្រុងបាត់ដំបង ធ្លាប់បានចេញសេចក្ដីជូនដំណឹងដល់ប្រជាពលរដ្ឋមួយចំនួន ដែលរស់នៅតាមដងផ្លូវនានាក្នុងក្រុង ស្ដីពី«ការស្នើសុំឲ្យរុះរើតូប សំយ៉ាប ឬ របងផ្ទះ» ដែលសាងសង់រំលោភលើដីចំណីផ្លូវនេះ ជាបន្តបន្ទាប់ច្រើនឆ្នាំកន្លងមក តែពុំមានបងប្អូនប្រជាពលរដ្ឋដែលពាក់ព័ន្ធ ភ្ញាក់រលឹកចុះរុះរើដោយខ្លួនឯឯទេ ទើបមកដល់ថ្ងៃនេះ លោកត្រូវសម្រេចប្រើប្រាស់កម្លាំងចុះរុះរើផ្ទាល់តែម្ដង ។
លោក លាង វាសនា បានបញ្ជាក់ដែរថា ការចុះរុះរើសំណង់គ្មានច្បាប់ លើកដំបូងនេះ នៅត្រង់ចំណុចជាប់នឹងរបង «វត្តកណ្ដាល»ចុងស្ពានថ្ម សម្ដេចក្រឡាហោម ស ខេង ត្រើយខាងកើត ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង ។
សូមរំលឹកថា រដ្ឋបាលក្រុងបាត់ដំបង ធ្លាប់បានចេញសេចក្ដីជូនដំណឹងស្ដីពី «ការរុះរើសំណង់អនាធិបតេយ្យ ដែលសាងសង់រំលោភលើដីចំណីផ្លូវសាធារណៈ» នេះ ជាបន្តបន្ទាប់ និងច្រើនឆ្នាំកន្លងមកហើយ ដើម្បីរៀបចំសណ្ដាប់ធ្នាប់តាមដងផ្លូវសាធារណៈកែលំអសោភ័ណភាពតាមផ្លូវនានានៅក្នុងក្រុង ។
សេចក្ដីជូនដំណឹងនេះ បានសំដៅជាពិសេស ទៅដល់ប្រជាពលរដ្ឋដែលរស់នៅតាមបណ្ដោយផ្លូវជាតិលេខ៥ ដែលឆ្លងកាត់ក្រុងបាត់ដំបង ដែលបានសាងសង់តូប សំយ៉ាបតូប ឬផ្ទះ និងធ្វើរបងរំលោភលើដីចំណីថ្នល់យ៉ាងរញ៉េរញ៉ៃគ្មានសណ្តាប់ធ្នាប់ ។ រាល់សេចក្ដីជូនដំណឹងអាជ្ញាធរបានស្នើសុំឲ្យម្ចាស់សំណង់ធ្វើការរុះរើដោយខ្លួនឯង ចៀសវាងការខូចខាតនៅពេលអាជ្ញាធរប្រើប្រាស់កម្លាំងចុះរុះរើផ្ទាល់ ។
ប៉ុន្តែរាប់ឆ្នាំកន្លងមកនេះ ការជូនដំណឹងរបស់អាជ្ញាធរ ហាក់សាបដូចទឹកទន្លេ មិនត្រូវបានគេអើពើ ធ្វើតាមឡើយ ។ ដូច្នេះហើយទើបពេលនេះ លោកចៅហ្វាយក្រុង ដឹកនាំកម្លាំងចម្រុះចុះរុះរើផ្ទាល់តែម្ដង ព្រោះដល់ពេលវេលាដែលអស់ការអត់ធ្មត់ ។
លោក លាង វាសនា អភិបាលក្រុងបាត់ដំបងបានប្រាប់ដែរថា ការចាប់ផ្ដើបប្រើប្រាស់កម្លាំងចម្រុះចុះរុះរើជាលើកដំបូងនេះ គឺយើងរុះរើសំណង់គ្មានច្បាប់នៅក្បែររបង «វត្តកណ្ដាល» ដែលមានចំនួន២២ខ្នងផ្ទះឬតូប ដើម្បីរំដោះចំណីថ្នល់ ។ លោកនិយាយថា ដំបូងនេះ យើងត្រូវរំដោះចំណីផ្លូវមួយខ្សែនេះសិន ចាប់ពីចុងស្ពានថ្មសម្ដេចក្រឡាហោម (ម្ដុំសណ្ឋាគារក្លាស៊ី) រហូតដល់ភ្លើងស្ដុប«ច្រមុះជ្រូក» គឺរំដោះទាំងសងខាងថ្នល់ ដើម្បីរៀបចំសណ្ដាប់ធ្នាប់រៀបចំផ្លូវសម្រាប់អ្នកដំណើរថ្មើជើង និងសម្រាប់អ្នកជិះកង់។ ប៉ុន្តែយ៉ាងណា បើតាមលោកអភិបាលក្រុងរូបនេះ បានបញ្ជាក់បន្ថែមថា នៅពេលកម្លាំងរបស់លោកចុះរុះរើជាក់ស្ដែងបែបនេះ ម្ចាស់សំណង់ក៏បានចូលរួមសហការផងដែរ ។
ថ្ងៃដំបូងនេះ យើងរុះរើបានចំនួន០៤ខ្នង តែយើងនឹងចុះធ្វើការងារនេះបន្តរហូត ទាល់តែរំដោះបានដីចំណីផ្លូវទាំងស្រុង និងទាំងសងខាង ដើម្បីសំអាតដីចំណីផ្លូវ ។ ហើយនឹងបន្តចាត់វិធាការលើដងផ្លូវនានា នៅក្រុងបាត់ដំបង ជាបន្តបន្តាប់ទៀត ។ ពីព្រោះរដ្ឋបាលក្រុងរបស់លោក ធ្លាប់បានចេញសេចក្ដីជូនដំណឹងច្រើនលើក និងច្រើនឆ្នាំកន្លងមកហើយ ស្នើឲ្យម្ចាស់សំណង់នានា ធ្វើការរុះរើសំណង់ខុសច្បាប់ ដោយខ្លួនឯង ដែលបងប្អូនប្រជាពលរដ្ឋបានសាងសង់រំលោភបំពានលើដីចំណីផ្លូវ ។
រដ្ឋបាលក្រុងមានគោលដៅរៀបចំសណ្ដាប់ធ្នាប់តាមដងផ្លូវសាធារណៈនានាគ្រង់ទីកន្លែងទាំងអស់នៅក្នុងក្រុង ដើម្បីលើកកម្ពស់ទីក្រុងស្អាត ដើម្បីឈានដល់ការទាក់ទាញលើគ្រប់វិស័យ ។ ជាពិសេស វិស័យទេសចរណ៍នេះឲ្យកាន់តែសំបូរបែប ។
ដូច្នេះ តាមរយៈកោះសន្តិភាព លោកអភិបាលក្រុងបាត់ដំបងបានអំពាវនាវដល់បងប្អូនប្រជាពលរដ្ឋទាំងអស់ ដែលរស់នៅតាមដងផ្លូវជាតិលេខ៥ និងដងផ្លូវនានានៅក្នុងក្រុងបាត់ដំបង មេត្តាចូលរួមអនុវត្តនូវសេចក្ដីជូនដំណឹងជាបន្តបន្ទាប់របស់រដ្ឋបាលក្រុងស្ដីពី «ការរុះរើសំណង់គ្មានច្បាប់នានា ដែលសាងសង់រំលោភលើដីចំណីផ្លូវ» ដើម្បីចូលរួមអភិវឌ្ឍទីក្រុងបេតិកភណ្ឌមួយនេះ ឲ្យក្លាយជាទីក្រុង ដ៏ស្រស់ស្អាត មានសោភ័ណ្ឌភាពល្អ ស្រស់បំព្រងគ្រប់រដូវកាល និងកាន់តែទាក់ទាញចំណាប់អារម្មណ៍បំផុត៕
ចែករំលែកព័តមាននេះ