ខេត្តកំពង់ចាម ៖ មានក្រុមឈ្មួញខិលខូចខ្លះបានយកផ្លែទុរេនមិនដឹងមានប្រភពចេញមកពីណានោះទេ ដោយបោកប្រាស់គេថាទុរេនបែកអន្លូង ស្រុកស្ទឹងត្រង់ ហើយលក់បានថ្លៃទៀតផង ។ ចំពោះទង្វើនេះត្រូវបានអាជ្ញាធរមូលដ្ឋានធ្វើការបដិសេធមិនទទួលស្គាល់ការពិតព្រោះសព្វថ្ងៃធុរេនម៉ាន់ថង់ បែកអន្លូងមិនទាន់ហុចផលនៅឡើយទេ។ លោករស់…
ខេត្តកំពង់ចាម ៖ មានក្រុមឈ្មួញខិលខូចខ្លះបានយកផ្លែទុរេនមិនដឹងមានប្រភពចេញមកពីណានោះទេ ដោយបោកប្រាស់គេថាទុរេនបែកអន្លូង ស្រុកស្ទឹងត្រង់ ហើយលក់បានថ្លៃទៀតផង ។ ចំពោះទង្វើនេះត្រូវបានអាជ្ញាធរមូលដ្ឋានធ្វើការបដិសេធមិនទទួលស្គាល់ការពិតព្រោះសព្វថ្ងៃធុរេនម៉ាន់ថង់ បែកអន្លូងមិនទាន់ហុចផលនៅឡើយទេ។
លោករស់ វីរ៉េត មេឃុំអារក្សត្នោតមានប្រសាសន៍ឲ្យដឹងនារសៀលថ្ងៃទី៨ ឧសភា ឆ្នាំ២០២៥ថា: ដោយសារតែស្ថានភាពដីនៅបែកអន្លូងក្នុងឃុំអារក្សត្នោត មានលក្ខណៈអំណោយផលល្អធ្វើឲ្យបងប្អូនប្រជាពលរដ្ឋនៅក្នុងស្រុកនិងក្រៅស្រុក បាននាំគ្នាដាំទុរេនដែលមានអាយុកាលពីមួយឆ្នាំទៅដល់ ២០ឆ្នាំសរុបមានរហូតទៅដល់៧២៤ ហិកតា ដែលមានពូជជាច្រើនប្រភេទត្រូវបានម្ចាស់ចម្ការជ្រើសរើសយកមកដាំដុះសម្រាប់ផ្គត់ផ្គង់ជីវភាពក្រុមគ្រួសារ។
លោកមេឃុំអារក្សត្នោតមានប្រសាសន៍បន្តថា ចំពោះទុរេនយើងត្រូវយកចិត្តទុកដាក់ថែរក្សាដាំដុះក្នុងរយៈពេល៤ឆ្នាំនោះនឹងចាប់ផ្ដើមហុចផលជាបណ្ដើរៗ ។ មួយវិញទៀតរាល់ថ្ងៃនេះតាមដំណឹងលេចលឺថាមានឈ្មួញខិលខូចខ្លះបានយកផ្លែទុរេនមិនដឹងមានប្រភពចេញមកពីណានោះទេ ហើយប្រកាសប្រាប់គេឯងថាទុរេនបែកអន្លូង ក្នុងនាមអាជ្ញាធរមូលដ្ឋានសូមបដិសេធថាក្រុមឈ្មួញទាំងនោះគឺពិតជាបានបោកប្រាស់ពលរដ្ឋហើយ ការទទួលទានក៏អាចធ្វើឲ្យប៉ះពាល់សុខភាពផងដែរ។
លោកមេឃុំថាសម្រាប់ពូជម៉ូសាំងឃីមមួយគីឡូក្រាមលក់នៅចំការតម្លៃ២៥០០០រៀល ក្នុងមួយគីឡូក្រាម និងពូជវី៦ តម្លៃ២៥០០០រៀលដែរ។
សូមបញ្ជាក់ថានៅឆ្នាំ២០២៤កន្លងទៅគឺមានក្រុមឈ្មួញមកពីប្រទេសថៃនិងប្រទេសចិនបានចុះប្រមូលទិញពូជទុរេនម៉ាន់ថងដល់ចម្ការតែម្ដង។ បើសរុបពីម្ចាស់ចម្ការទាំងអស់មានរហូតដល់ជិត២០០ គ្រួសារក្នុងនោះមានអ្នកនៅក្នុងស្រុកនិងក្រៅស្រុកដែលបានដាំដុះទុរេនសម្រាប់ផ្គត់ផ្គង់លើទីផ្សារក្នុងស្រុកនិងនាំចេញទៅកាន់ទីផ្សារបរទេស។ ចំពោះពូជទុរេនម៉ាន់ថងគឺនៅចុងខែឧសភានេះនឹងចាប់ផ្ដើមហុចផលច្រើន គឺឈ្មួញអាចចុះប្រមូលទិញដល់ចម្ការតែម្ដង។
លោកថាកាលពីប៉ុន្មានឆ្នាំមុន អាជ្ញាធរខេត្តបានចុះទៅដល់ចំការបែកអន្លូង ដើម្បីបង្កើតសហគមន៍ទុរេនបែកអន្លូង តែបង្កើតមិនចេញព្រោះមិនមានម្ចាស់ចំការចូលរួមនោះទេ។
ចំណែកលោកសឹម ថាវរៈ ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពង់ចាម បានឲ្យដឹងដែរថា មកដល់ពេលនេះម្ចាស់ចំការមួយចំនួនមានការយល់ដឹងច្រើនហើយបានព្រមចុះឈ្មោះបង្កើតសហគមន៍ទុរេនបែកអន្លូងមានក្នុងរង្វង់ពី៥០ទៅ៦០គ្រួសារហើយ ដែលទើបតែដំណើរការបានប្រហែលជាង៣ខែប៉ុណ្ណោះ ក្នុងឆ្នាំ២០២៥នេះ ជាមួយនោះមន្ត្រីជំនាញមន្ទីរកសិកម្មបានចុះបង្រៀនបច្ចេកទេសក្នុងការដាំដុះ ពេលដែលផ្លែហុចផលគឺមិនមានសារធាតុគីមី ដោយធ្វើយ៉ាងណាទិន្នផលដែលបានមកគឺអាចនាំចេញទៅកាន់ទីផ្សារប្រទេសចិន ហើយក៏មានការត្រួតពិនិត្យពីគយរបស់ចិនត្រឹមត្រូវទៀតផង ៕
ចែករំលែកព័តមាននេះ