ខេត្តបាត់ដំបង ៖ ជនជាតិចិនមួយក្រុមដែលគេមិនដឹងចំនួន បានប្រើប្រាស់កាំភ្លើងខ្លីបាញ់ដបទឹកសុទ្ធលេងអស់ចំនួន១៦គ្រាប់ បង្កឲ្យមានការភ្ញាក់ផ្អើលទាំងភាគីថៃ ទាំងភាគីខ្មែរ កាលពីវេលាម៉ោង៦និង៥០នាទីព្រលប់ថ្ងៃទី១១ មេសា នៅក្បែរអូរព្រំដែនខ្មែរ-ថៃ ត្រង់ចំណុចភូមិពេជ្រចិន្តា…
ខេត្តបាត់ដំបង ៖ ជនជាតិចិនមួយក្រុមដែលគេមិនដឹងចំនួន បានប្រើប្រាស់កាំភ្លើងខ្លីបាញ់ដបទឹកសុទ្ធលេងអស់ចំនួន១៦គ្រាប់ បង្កឲ្យមានការភ្ញាក់ផ្អើលទាំងភាគីថៃ ទាំងភាគីខ្មែរ កាលពីវេលាម៉ោង៦និង៥០នាទីព្រលប់ថ្ងៃទី១១ មេសា នៅក្បែរអូរព្រំដែនខ្មែរ-ថៃ ត្រង់ចំណុចភូមិពេជ្រចិន្តា ឃុំពេជ្រចិន្តា ស្រុកភ្នំព្រឹក។ នេះបើតាមប្រភពព័ត៌មានពីសមត្ថកិច្ចនៅព្រំដែន។
ប្រភពបានឲ្យដឹងថា ជនជាតិចិនមួយក្រុមនោះជិះរថយន្តម៉ាក អូឌី ពណ៌ស តែគេមិនចាំស្លាកលេខទេ។ ប្រភពបានបញ្ជាក់ថា បើតាមសមត្ថកិច្ចរកឃើញសំបកគ្រាប់នៅកន្លែងកើតហេតុ មានចំនួន១៦គ្រាប់ ក្នុងនោះ មាន០២គ្រាប់បាញ់មិនផ្ទុះ។
សមត្ថកិច្ចបានអះអាងថា កាំភ្លើងខ្លីដែលក្រុមជនបរទេសដ៏ព្រហើនប្រើប្រាស់បាញ់បោះសេរីនោះ ម៉ាក«ឡុក»។ ក្រុមជនជាតិចិនទាំងនោះបានយកដបទឹកសុទ្ធទៅចងនឹងមែកស្វាយ រួចនាំគ្នាបាញ់ស៊ីប ជាការកម្សាន្ត ដែលមានចម្ងាយពីអូរព្រំដែនខ្មែរ-ថៃ ប្រហែលជាង៣០០ម៉ែត្រ។
បើតាមប្រភពបានបញ្ជាក់ថា ស្នូរបាញ់កាំភ្លើងបានបង្កឲ្យមានការភ្ញាក់ផ្អើលដល់អ្នកភូមិ ដែលរស់នៅក្បែរនោះ និងទាហានថៃ ដែលប្រចាំការក្បែរអូរព្រំដែន រហូតភាគីថៃ បានសួរនាំភាគីខ្មែរ អំពីស្នូរបាញ់កាំភ្លើងដែលបង្កឡើងដោយក្រុមជនជាតិចិន។ សមត្ថកិច្ច និងមន្ត្រីព្រំដែន បានចុះពិនិត្យទីតាំងបាញ់បោះសេរីរបស់ក្រុមជនជាតិចិន ក្រោយទទួលបានព័ត៌មាន និងប្រមូលបានសំបកគ្រាប់ចំនួន១៦គ្រាប់ តែមាន០២គ្រាប់បាញ់មិនផ្ទុះ។
ប៉ុន្តែគេមិនទាន់ដឹងថា តើសមត្ថកិច្ចនឹងធ្វើការស្រាវជ្រាវ តាមរកក្រុមខ្មាន់កាំភ្លើងជនជាតិចិន ដែលនាំគ្នាប្រើប្រាស់កាំភ្លើងបាញ់ផ្អើលតំបន់ព្រំដែនទាំងនោះ ដើម្បីយកមកសួរនាំដែរ ឬ យ៉ាងណានោះទេ ? បើតាមសមត្ថកិច្ចបានខ្សិបប្រាប់ថា ទំនងមិនអាចស្រាវជ្រាវ រកមុខខ្មាន់កាំភ្លើងជនបរទេសដ៏ព្រហើនទាំងនោះឃើញទេ៕
ចែករំលែកព័តមាននេះ