ទីក្រុងម៉ូស្គូ៖ បេសកជនពិសេសរបស់លោកត្រាំទទួលបន្ទុកខាងបញ្ហាអ៊ុយក្រែន លោកស្ទីវវីតខូស បានធ្វើដំណើរទៅដល់ទីសេនភីតថឺបួក (St. Petersburg) នៅល្ងាចថ្ងៃសុក្រដើម្បីបញ្ចុះបញ្ចូលលោកពូទីនឱ្យទទួលយកបទឈប់បាញ់គ្នាជាមួយអ៊ុយក្រែន។ នេះបើយោងតាមការបង្ហើបឱ្យដឹងពីអ្នកនាំពាក្យវិមានក្រឹមឡាំង។ លោកស្ទីវវីតខូសទៅរុស្ស៊ីលើកនេះក៏អាចនិយាយពីគម្រោងជួបគ្នាកម្រិតកំពូលរវាងលោកត្រាំ និងលោកពូទីនផងដែរ។
សារព័ត៌មានរុស្ស៊ីបង្ហោះរូបវីឌីអូលោកវីតខូសចាកចេញពីសណ្ឋាគារជាមួយប្រេសិតពិសេសរបស់លោកពូទីនទទួលបន្ទុកខាងវិនិយោគ។ ប្រភពខ្លះថាអាមេរិក និងរុស្ស៊ីកំពុងពិភាក្សាគ្នាអំពីការវិនិយោគរួមគ្នានៅតំបន់អាកទិច និងនៅរុស្ស៊ីដើម្បីជីកយករ៉ែកម្រ។ នៅពេលលោកវីតខូសទៅដល់ទីក្រុងសេនភីតថឺបួក លោកពូទីនក៏ស្ថិតនៅទីនោះផងដែរដើម្បីបើកកិច្ចប្រជុំសំខាន់មួយស្ដីពីការធ្វើទំនើបកម្មកងទ័ពជើងទឹក។
អ្នកនាំពាក្យវិមានក្រឹមឡាំងថ្លែងថាគម្រោងជួបគ្នារវាងលោកវីតខូស និងលោកពូទីនលើកនេះប្រហែលជាមិនទាន់អាចសម្រេចលទ្ធផលជាដុំកំភួនទេ។ គម្រោងជួបគ្នាលើកនេះធ្វើឡើងនៅពេលអាមេរិកកំពុងប្រឈមមុខគ្នាផ្នែកពាណិជ្ជកម្មជាមួយប្រទេសចិន និងប្រឈមមុខយោធាជាមួយអ៊ីរ៉ង់។ ទាំង២ប្រទេសនេះសុទ្ធតែជាសម្ព័ន្ធមិត្តរបស់រុស្ស៊ី។ បន្ទាប់ពីចាកចេញពីរុស្ស៊ី នៅថ្ងៃសៅរ៍សប្ដាហ៍នេះ លោកវីតខូសនឹងបន្តដំណើរទៅប្រទេសអូម៉ង់ដើម្បីជួបគណៈប្រតិភូអ៊ីរ៉ង់។
លោកត្រាំព្រមានទម្លាក់គ្រាប់បែកលើអ៊ីរ៉ង់បើប្រទេសនេះមិនព្រមចូលតុចរចាដើម្បីឱ្យមានកិច្ចព្រមព្រៀងនុយក្លេអ៊ែរ។ ប៉ុន្តែរុស្ស៊ីទើបតែប្រកាសថ្មីៗនេះថាការទម្លាក់គ្រាប់បែកមិនមែនជាមាគ៌ារំលត់ទុក្ខ និងនាំទៅរក្សាសន្តិភាពទេ។ រុស្ស៊ីក៏បានស្ម័គ្រចិត្តធ្វើជាអ្នកសម្របសម្រួលនៅក្នុងបញ្ហានេះផងដែរ។ កាលពីថ្ងៃព្រហស្បិ៍ អាមេរិក និងរុស្ស៊ីក៏បានជួបគ្នានៅស្ថានកុងស៊ុលរុស្ស៊ីប្រចាំទីក្រុងអ៊ីស្តាន់ប៊ុល ប្រទេសតួកគី ដើម្បីកែសម្រួលទំនាក់ទំនងឡើងវិញ។
ប្រភពខ្លះបង្ហើបឱ្យដឹងថាការកែសម្រួលទំនាក់ទំនងរុស្ស៊ី-អាមេរិកអត់បញ្ហាទេ។ បញ្ហាតែបទឈប់បាញ់នៅអ៊ុយក្រែនប៉ុណ្ណោះដែលមានលក្ខណៈតឹងតែងដូចអូសឫស្សីបញ្ច្រាសចុង។ ជាពិសេស រុស្ស៊ីច្រានចោលសំណើនៃបទឈប់បាញ់ម្ដងជាពីរដង។ នៅពេលអាមេរិកបញ្ជូនសំណើទៅឱ្យលោកពូទីនពិនិត្យមើលកាលពីលើកទី១ លោកស្នើសុំឱ្យសរសេរឡើងវិញឱ្យបានលម្អិត។ លោកក៏បានភ្ជាប់លក្ខខណ្ឌមួយចំនួនផងដែរ។ ក្រោយមក សំណើនៃបទឈប់បាញ់នៅសមុទ្រខ្មៅត្រូវលោកពូទីនទទួលយកតែមាត់ទទេសិន។ រុស្ស៊ីថាបើចង់អនុវត្តជាក់ស្ដែងលុះត្រាតែធ្វើតាមលក្ខខណ្ឌរបស់រុស្ស៊ី៕
ចែករំលែកព័តមាននេះ