ខេត្តបាត់ដំបង ៖ កាលពីព្រឹកថ្ងៃទី២ កក្កដា ឆ្នាំ២០១១ នៅក្នុងបរិវេណវត្តក្សត្រីយ៍ក្តុលហៅវត្តក្តុលតាហែនមានរៀបចំពិធីសម្ពោធ កុដិមួយខ្នងជាសម្ធិផលមួយចំនួនទៀត ដែលស្ថិតនៅក្នុងភូមិក្តុលក្រោម ឃុំក្តុលតាហែន ស្រុកបវេលក្រោមការអញ្ជើញចូលរួមពីលោកខាន់ ម៉ាណេរ ទីប្រឹក្សាលោកឧបនាយករដ្ឋមន្ត្រី ស ខេង និងជាប្រធានមន្ទីរសាធារណការ និងដឹកជញ្ជូនខេត្ត ឧបាសិកាឯក សុវណ្ណ សប្បុរសជនសហរដ្ឋអាមេរិក លោកអភិបាល អភិបាលរងស្រុក កងកម្លាំងប្រដាប់អាវុធ លោកមេឃុំ-ភូមិ លោកគ្រូ-អ្នកគ្រូ លោកយាយ-លោកតា សិស្សានុសិស្ស និងប្រជាពលរដ្ឋយ៉ាងច្រើនកុះករ។
លោករស់ ឈាន ប្រធានក្រុមប្រឹក្សាឃុំបាន ឱ្យដឹងថា ដោយមានការចូលរួមពីឧបាសិកា ឯក សុវណ្ណ សប្បុរសជនរស់នៅសហរដ្ឋអាមេរិក និងបុត្រា-បុត្រី បានជំនួយកសាងសមិទ្ធផលដូចជា ជួសជុលព្រះវិហារ ធ្វើខ្លោងទ្វាររូបគោ រូបនាគ និងសាលាធម្មសភាផងនោះ និងបានជួយកសាងកុដិ១ខ្នង ទទឹង៦ម៉ែត្របណ្តោយ១២ម៉ែត្រ កម្ពស់៧ម៉ែត្រ ដែលត្រូវដាក់សម្ភោធកាត់ខ្សែបូ នាថ្ងៃនេះ សរុបអស់ទឹកប្រាក់ចំនួន១៩.៣៥៩។ លោកបានបន្តថា ដោយគោរពតាមអនុសាសន៍របស់សម្តេចអគ្គមហាសេនាបតីតេជោហ៊ុន សែន ដោយយកគោលនយោបាយភូមិ-ឃុំ មានសវុត្ថិភាព។ ក្រុមប្រឹក្សាឃុំ នាយប៉ុស្តិ៍រដ្ឋបាលនគរបាលឃុំ បានរៀបចំបង្កើតឱ្យមានបជាការពារគ្រប់ភូមិទូទាំងឃុំ នឹងរៀបចំឱ្យមានប៉ុស្តិ៍ប៉ុម មួយខ្នងក្នុង១ភូមិ ងាយស្រួលក្នុងការប្រមូលកម្លាំងទប់ស្កាត់រាល់សកម្មភាពផ្សេងៗ នៅតាមចំណតគោដៅសំខាន់ៗ ដើម្បីធានាការពារចោរលួច ចោរប្លន់ ផលិត និងការប្រើប្រាស់គ្រឿងញៀនខុសច្បាប់ ការជួញដូរស្ត្រី និងកុមារ ព្រមទាំងក្មេងទំនើងល្បែងស៊ីសងគ្រប់ប្រភេទ។
លោកខាន់ ម៉ារីណេរ បានមានប្រសាសន៍ចំណេះសំណាលឱ្យដឹងថា សមិទ្ធផលនៅក្នុងមូលដ្ឋានឃុំក្តុលតាហែន និងក្នុងស្រុកបវេល ដែលប្រព័ន្ធគមនាគមន៍ត្រូវបានជួសជុលមួយចំនួន ហើយនឹងកំពុងដំណើរការស្ថាបនាផ្លូវជាតិលេខ៥៧B ដែលឆ្លងកាត់ភូមិជាច្រើនក្នុងឃុំយើងបង្កើតបាននូវការផ្សារភ្ជាប់រវាងសហគមន៍មួយទៅសហគមន៍មួយ និងពីទីប្រជុំជនទៅកាន់ទីជនបទ។ ទន្ទឹមនឹងនេះ សន្តិសុខសណ្តាប់ធ្នាប់សាធារណៈ និងសុវត្ថិភាពសង្គមត្រូវបានពង្រឹងឱ្យកាន់តែមានស្ថិរភាព គួបផ្សំនឹងការរៀបចំឱ្យបានត្រឹមត្រូវលើការអនុវត្ត គោលនយោបាយភូមិ ឃុំ មានសុវត្ថិភាព ដែលទទួលបានពីការចូលរួម របស់ប្រជាការពារក្នុងមូលដ្ឋាន។ ដោយឡែកនៅទីតាំងវត្ត ក្តុលតាហែន នេះបានចាប់ផ្តើមកសាងឡើងវិញតាំងពីភាពខ្ទេចខ្ទាំនូវសម្បត្តិគរុភ័ណ ដែលបនប្រល័យពូជសាសន៍ប៉ុល ពត បានបំផ្លិចបំផ្លាញក្នុងសម័យ៣ឆ្នាំ ៨ខែ ២០ថ្ងៃ ឱ្យមានការរីកចម្រើនឡើងវិញជាបណ្តើរៗ ដែលមានកុដិព្រះវិហារ និងកំពុងសាងសង់សាលាធម្មសភា មួយខ្នងទៀត ទុកប្រគេនព្រះសង្ឃគង់ និងគោរពប្រតិបត្តិតាមគន្លងព្រះពុទ្ធសាសនា។ជាសក្ខីភាពនេះ គឺស្តែងចេញពីទឹកចិត្តជ្រះថ្លារបស់ឧបាសិកា ឯកសុវណ្ណ ដែលរស់នៅសហរដ្ឋអាមេរិកធ្វើដំណើរឆ្លងទ្វីបនាំយកបច្ច័យមកចូលរួមកសាងបានកុដិថ្មីមួយខ្នងដើម្បីប្រគេនព្រះសង្ឃទុកប្រើប្រាស់តាមកិច្ចផ្សេងៗនៅ ក្នុងទីអារាមនេះ។
ទន្ទឹមនឹងនេះដែរ លោកញុំសូមរំលឹកដល់បងប្អូន ប្រជាពលរដ្ឋទាំង២ប្រភេទ ដែលមានអាយុគំរប់១៨ឆ្នាំ ដែលមិនទាន់មានឈ្មោះក្នុងបញ្ជីបោះឆ្នោតត្រូវរួសរាន់ទៅចុះឈ្មោះបោះឆ្នោតនៅក្នុងមូលដ្ឋានរបស់ខ្លួនឱ្យបានគ្រប់ៗគ្នា តាមពេលវេលាកំណត់ដែលក្រុមការងាររបស់គណៈកម្មការបោះឆ្នោតរៀបចំចុះបញ្ជីឈ្មោះនៅក្នុងខែតុលា ឆ្នាំ២០១១ ខាងមុខ។ សូមអញ្ជើញចូលរួម ទៅបោះឆ្នោតជ្រើសរើសក្រុមប្រឹក្សាឃុំ អាណត្តិទី៣ នៅក្នុងខែមិថុនា ឆ្នាំ២០១២ និងអាណត្តិទី៥ របស់សភានៅឆ្នាំ២០១៣ តាមច្បាប់កំណត់របស់រាជរដ្ឋាភិបាលនៃ ព្រះរាជាណាចក្រកម្ពុជា។ ក្នុងឱកាសនោះដែរ លោកខាន់ ម៉ាណេរ និងក្រុមការងារចុះជួយឃុំក្តុលតាហែនបានឧបត្ថម្ភដល់វត្តថវិកា៤០០ពាន់រៀល និងមីចំនួន៤០កេះតូច លោកតា លោកយាយ៣៣នាក់ ក្នុងម្នាក់ៗទទួលបានកំណាត់ស១ដុំ និងថិវិកា៥.០០០រៀល លោកគ្រូ អ្នកគ្រូ ៥នាក់ ម្នាក់ៗទទួលបានសារុង ១ និងថវិកា១០.០០០រៀល និងសិស្សានុសិស្ស ១០០នាក់ ក្នុងម្នាក់ៗទទួលបានសៀវភៅ១ក្បាល ប៊ិច១ដើម ថវិកា១.០០០រៀល៕
ចែករំលែកព័តមាននេះ