រាជធានីភ្នំពេញ ៖ រថយន្តកុងតីន័របើកទាក់បង្គោលរនាំងដែកកំណត់កម្ពស់រថយន្តនៅចំណុចគល់ស្ពានអាកាសមរតកតេជោ ធ្លាក់ចុះមកក្រោម១ផ្ទាំង និង១ផ្ទាំងទៀតធ្លាក់នៅលើដំបូលរថយន្ត កាលពីវេលាម៉ោង១១យប់ថ្ងៃទី៩ ខែមេសា ឆ្នាំ២០២៥ នៅគល់ស្ពានអាកាសមរតកតេជោ សង្កាត់ទន្លេបាសាក់…
រាជធានីភ្នំពេញ ៖ រថយន្តកុងតីន័របើកទាក់បង្គោលរនាំងដែកកំណត់កម្ពស់រថយន្តនៅចំណុចគល់ស្ពានអាកាសមរតកតេជោ ធ្លាក់ចុះមកក្រោម១ផ្ទាំង និង១ផ្ទាំងទៀតធ្លាក់នៅលើដំបូលរថយន្ត កាលពីវេលាម៉ោង១១យប់ថ្ងៃទី៩ ខែមេសា ឆ្នាំ២០២៥ នៅគល់ស្ពានអាកាសមរតកតេជោ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ អ្នកបើកបររថយន្តកុងតីន័រ បានបើកបររថយន្តចុះពីលើស្ពានច្បារអំពៅ ទិសដៅពីកើតទៅលិច ។ លុះមកដល់ចំណុចគល់ស្ពានអាកាសមរតកតេជោ រថយន្តបានបើកឡើងស្ពាន ប៉ុន្តែតៃកុងរថយន្ត ខ្វះការប្រុងប្រយ័ត្ន បានបើកទាក់រនាំងដែកកំណត់កម្ពស់រថយន្តសម្រាប់ឆ្លងកាត់ស្ពានបណ្តាលឲ្យបាក់ធ្លាក់ចំនួន១ផ្ទាំង ។
ភ្លាមៗនោះអ្នកបើកបររថយន្តបានថយរថយន្តកុងតីន័រមកក្រោយវិញ បណ្តាលឲ្យធ្លាក់រនាំងដែក១ផ្ទាំងទៀត នៅលើដំបូលរថយន្តបង្កខាងលើ ។
ហេតុការណ៍នេះបានបង្កឲ្យមានការកកស្ទះចរាចរណ៍ ព្រោះរនាំងដែកកំណត់កម្ពស់ខាងលើ បានបាក់ធ្លាក់មកក្រោយកាត់ទទឹងផ្លូវ មិនអាចឆ្លងកាត់បាន។
អ្នកបើកបររថយន្តកុងតីន័របានឲ្យដឹងថា គាត់មិនបានចាប់អារម្មណ៍មើលផ្លូវ ដោយជាប់មើលឆ្វេងមើលស្តាំ មុនឡើងស្ពាន ទើបបណ្តាលឲ្យជ្រុលទៅបុករនាំងដែកកំណត់កម្ពស់ស្ពាន
បណ្តាលឲ្យបាក់ធ្លាក់មកកាត់ទទឹងផ្លូវ ។ ពេលនោះគាត់ក៏បានដឹងថាខុស ទើបថយរថយន្តមកក្រោយ បណ្តាលឲ្យបាក់១ផ្ទាំងទៀតធ្លាក់លើដំបូលរថយន្ត ទើបគាត់បើករថយន្តទៅអែបក្បែរផ្លូវតែម្តង ។
ក្រោយកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីនៅពេលក្រោយ៕
ចែករំលែកព័តមាននេះ