ទីក្រុងបាងកក ៖ គណៈរដ្ឋមន្ត្រីនឹងកាត់បន្ថយថ្លៃសេវាផ្ទេរសិទ្ធិកាន់កាប់អចលនទ្រព្យ និងកម្ចីទិញអចលនទ្រព្យ ដើម្បីស្តារវិស័យមួយនេះ ដែលកំពុងតែប្រយុទ្ធប្រឆាំងនឹងការផ្គត់ផ្គង់លើសតម្រូវការ ខណៈដែលអ្នកទិញកាន់តែច្រើនមានការប្រុងប្រយ័ត្នខ្ពស់ចំពោះការទិញខុនដូ បន្ទាប់ពីគ្រោះរញ្ជួយដីកាលពីខែមុនប៉ះពាល់ដល់អគារខ្ពស់ៗរាប់ពាន់នៅក្នុងទីក្រុងបាងកក។ នេះបើតាមប្រភពពីសារព័ត៌មានថៃ The…
ទីក្រុងបាងកក ៖ គណៈរដ្ឋមន្ត្រីនឹងកាត់បន្ថយថ្លៃសេវាផ្ទេរសិទ្ធិកាន់កាប់អចលនទ្រព្យ និងកម្ចីទិញអចលនទ្រព្យ ដើម្បីស្តារវិស័យមួយនេះ ដែលកំពុងតែប្រយុទ្ធប្រឆាំងនឹងការផ្គត់ផ្គង់លើសតម្រូវការ ខណៈដែលអ្នកទិញកាន់តែច្រើនមានការប្រុងប្រយ័ត្នខ្ពស់ចំពោះការទិញខុនដូ បន្ទាប់ពីគ្រោះរញ្ជួយដីកាលពីខែមុនប៉ះពាល់ដល់អគារខ្ពស់ៗរាប់ពាន់នៅក្នុងទីក្រុងបាងកក។ នេះបើតាមប្រភពពីសារព័ត៌មានថៃ The Nation និងគេហទំព័រ Bloomberg បានចេញផ្សាយកាលពីថ្ងៃទី៨ ខែមេសា ឆ្នាំ២០២៥។
គណៈរដ្ឋមន្ត្រីថៃបានអនុម័តកាត់បន្ថយថ្លៃផ្ទេរសិទ្ធិកាន់កាប់អចលនទ្រព្យពីអត្រា ២% មកនៅត្រឹម ០.០១% សម្រាប់ខុនដូ ផ្ទះផ្ទាល់ដី អគារពាណិជ្ជកម្ម ឬដីធ្លីដែលមានអគារតម្លៃរហូតដល់៧លានបាត ឬ ២០២,០០០ដុល្លារអាមេរិក ដោយមានប្រសិទ្ធិភាពរហូតដល់ថ្ងៃទី៣០ ខែមិថុនា ឆ្នាំក្រោយ។ ជាមួយគ្នានោះ គណៈរដ្ឋមន្ត្រីក៏បានយល់ព្រមកាត់បន្ថយថ្លៃសេវាកម្ចីទិញអចលទ្រព្យពីអត្រា ១% មកនៅត្រឹម ០.០១% ផងដែរ។
សមាគមខុនដូថៃបានឱ្យដឹងថា អ្នកអភិវឌ្ឍន៍អចលនទ្រព្យក្នុងតំបន់សំខាន់ៗ ក្នុងទីក្រុងបាងកក កំពុងមានខុនដូប្រហែល២៣៥,០០០យូនីតដែលមិនទាន់បានលក់ចេញ តាំងពីចុងឆ្នាំមុន ដែលជាចំនួនច្រើនបំផុតចាប់តាំងពីឆ្នាំ ២០១៨ ដោយការលក់បានធ្លាក់ចុះ ៣៧% មកនៅប្រហែល ៥៣,០០០យូនីតកាលពីឆ្នាំមុន។
ការធ្លាក់ចុះនឹងកាន់តែអាក្រក់ទៅៗ ខណៈអ្នកទិញនៅតែភិតភ័យមិនទាន់បាត់នៅឡើយដោយគ្រោះរញ្ជួយដីកម្រិត៧,៧រ៉ិចទ័រ ដែលបានវាយប្រហារប្រទេសមីយ៉ាន់ម៉ា កាលពីថ្ងៃទី២៨ ខែមីនា ឆ្នាំ២០២៥ កន្លងទៅ ដោយបានឆក់យកជីវិតមនុស្សជាង៣ពាន់នាក់ គិតមកទល់ពេលនេះ។ ការរញ្ជួយដ៏អាក្រក់នេះ មិនត្រឹមតែបំផ្លិចបំផ្លាញអគារជាច្រើនក្នុងប្រទេសមីយ៉ាន់ម៉ាប៉ុណ្ណោះទេ តែថែមទាំងរាលដាលដល់ប្រទេសថៃដែលនៅជិតខាងគ្នា ដោយបង្កឱ្យមានការរង្គើរអគារជាច្រើន រួមទាំងការដួលរលំអគារការិយាល័យអគ្គសវនកម្មរដ្ឋ ដែលកំពុងសាងសង់ក្នុងទីក្រុងបាងកកផងដែរ។ អាជ្ញាធរថៃបានរាយការណ៍អំពីកម្រិតខូចខាតផ្សេងៗគ្នា ចំពោះសំណង់អគារប្រហែល ១៣,០០០អគារ ដែលនាំឱ្យមានការជម្លៀសមនុស្សយ៉ាងច្រើន និងការត្រួតពិនិត្យសុវត្ថិភាពក្រោយការរញ្ជួយដី។
ការកាត់បន្ថយថ្លៃសេវាអចលនទ្រព្យត្រូវបានណែនាំជាលើកដំបូងក្នុងឆ្នាំ ២០២២ ហើយត្រូវបានលុបចោល បន្ទាប់ពីការពន្យាពេលជាច្រើនលើកកាលពីចុងឆ្នាំមុន។ ទោះយ៉ាងណាក៏ដោយ វាកំពុងត្រូវបានធ្វើឱ្យរស់ឡើងវិញតបតាមតម្រូវការពីវិស័យអចលនទ្រព្យដែលបានឃើញការលក់ធ្លាក់ចុះពីមួយឆ្នាំទៅមួយឆ្នាំ។ ស្របពេលការផ្លាស់ប្តូរនេះ ធ្វើឡើងបន្ទាប់ពីមានការបន្ធូរបន្ថយអត្រាប្រាក់កម្ចីដោយធនាគារថៃកាលពីខែមុន ដើម្បីជំរុញតម្រូវការលំនៅដ្ឋាន។
សូមជម្រាបថា វិស័យអចលនទ្រព្យរបស់ប្រទេសថៃ បានរងផលប៉ះពាល់យ៉ាងធ្ងន់ធ្ងររួចទៅហើយ អំឡុងពេលការផ្ទុះជំងឺរាតត្បាតកូវីដ១៩ ខណៈការលើកទឹកចិត្តពីរដ្ឋាភិបាល និងការបន្ធូរបន្ថយពន្ធដើម្បីគាំទ្រវិស័យនេះ បានទទួលបរាជ័យក្នុងការស្តារសេដ្ឋកិច្ចរបស់ខ្លួនឡើងវិញ៕
ចែករំលែកព័តមាននេះ