ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួននាប៉ុន្មាននាទី ក្រោយពីស្ទាក់កាប់អ្នកដំណើរម្នាក់ដែលទំនងមានចេតនា «ប្លន់យកម៉ូតូ» តែមិនបានសម្រេច ដោយសារតែម៉ូតូជនរងគ្រោះជ្រុលធ្លាក់ចូលទឹកប្រឡាយ រីឯជនរងគ្រោះរត់រួចទាំងរងរបួសហូរឈាមកក្លាក់ ។ ហេតុការណ៍នេះបានកើតឡើង…
ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួននាប៉ុន្មាននាទី ក្រោយពីស្ទាក់កាប់អ្នកដំណើរម្នាក់ដែលទំនងមានចេតនា «ប្លន់យកម៉ូតូ» តែមិនបានសម្រេច ដោយសារតែម៉ូតូជនរងគ្រោះជ្រុលធ្លាក់ចូលទឹកប្រឡាយ រីឯជនរងគ្រោះរត់រួចទាំងរងរបួសហូរឈាមកក្លាក់ ។
ហេតុការណ៍នេះបានកើតឡើង កាលពីវេលាម៉ោង១២ថ្ងៃត្រង់ថ្ងៃទី០៨ ឧសភា នៅលើផ្លូវលំមួយកន្លែងស្ថិតក្នុងភូមិច្រាំងខ្ពស់ ឃុំបាសាក់ ស្រុករុក្ខគិរី ។ របាយការណ៍សមត្ថកិច្ចបានឲ្យដឹងថា ជនសង្ស័យឈ្មោះ ឌឹម សន ភេទប្រុស អាយុ៣៤ឆ្នាំ រស់នៅភូមិ ឃុំកើតហេតុ រីឯជនរងគ្រោះឈ្មោះ គឿន ភារ៉ាន់ ភេទប្រុស អាយុ៣៦ឆ្នាំ រស់នៅភូមិ-ឃុំជាមួយគ្នា ។
ជនសង្ស័យត្រូវបានកម្លាំងជំនាញនៃអធិការស្រុករុក្ខគិរី និងមន្ត្រីមូលដ្ឋានតាមឃាត់ខ្លួនបាន ក្រោយស្ទាក់កាប់ជនរងគ្រោះបណ្ដាលឲ្យរងរបួសធ្ងន់ ។ គេពុំដឹងពីមូលហេតុជាក់លាក់ ដែលជនសង្ស័យម្នាក់នេះពួនសំងំក្បែរផ្លូវ ដើម្បីស្ទាក់កាប់ជនរងគ្រោះបែបនេះទេ ។
ជនរងគ្រោះក៏បានប្រាប់សមត្ថកិច្ចដែរថា ពិតមែនតែរស់នៅក្នុងភូមិ ឃុំជាមួយគ្នា តែគាត់មិនធ្លាប់ស្គាល់ជនសង្ស័យ ហើយក៏មិនធ្លាប់មានប្រវត្តិទំនាស់គ្នាដែរ ។ គាត់បានប្រាប់សមត្ថកិច្ចទៀតថា គាត់ជិះម៉ូតូសណ្ដោងរ៉ឺម៉កដឹកប៊ីដុងសាំង លុះពេលដល់ចំណុចកើតហេតុ ស្រាប់តែជនដៃដល់រូបនេះ ស្ទុះមកកាក់គាត់ រួចកាប់គាត់តែម្ដង ។
គាត់បានយកដៃចាប់កាំបិត រហូតមុតរយះដៃជាច្រើនកន្លែង ។ នៅពេលកំពុងប្រតាយប្រទង់គ្នាគាត់បានលោតចុះពីម៉ូតូ ធ្វើឲ្យម៉ូតូគាត់ជ្រុលចូលទឹកប្រឡាយ ទាំងម៉ូតូ ទាំងរ៉ឺម៉ក ហើយក៏រត់យកខ្លួនសិនទៅ និងបានរាយការណ៍ប្ដឹងទៅសមត្ថកិច្ចភ្លាមៗដែរ ។
តាមប្រភពព័ត៌មានពីអ្នកដំណើរដែរបាននិយាយថា មុនពេលជនសង្ស័យម្នាក់នេះ កាប់ជនរងគ្រោះដែលជិះម៉ូតូសណ្ដោងរ៉ឺម៉ក គេបានប្រទះឃើញជននេះអង្គុយសំកុកក្បែរគុម្ពោធព្រៃជាប់នឹងផ្លូវនោះ ។ គេបានដាក់ការសង្ស័យទៅលើជននេះដែរ ដែលទំនងមានគោលបំណង់មិនល្អ ព្រោះអង្គុយមានកាន់កាំបិតក្នុងដៃផង ។
ប្រភពដដែលបានបញ្ជាក់ថា ពេលគេជិះផុត ក៏ជួបជនរងគ្រោះ ហើយគេបានស្រែកប្រាប់ជនរងគ្រោះដែរ ឲ្យមានការប្រុងប្រយ័ត្ន ព្រោះជននោះមានកាំបិតផង លុះជនរងគ្រោះជិះទៅដល់ ជនសង្ស័យម្នាក់នោះស្ទុះចេញមកស្ទាក់កាប់មែន ។ បើតាមមើលសកម្មភាព ជនដៃដល់នោះទំនងស្ទាក់កាប់ជនរងគ្រោះ«ប្លន់យកម៉ូតូ» ឬលុយកាក់ តែចៃដន្យម៉ូតូធ្លាក់ចូលទឹកប្រឡាយលើកមិនរួច រីឯជនរងគ្រោះ ក៏ស្ទុះរត់យករួចខ្លួនទៀត ទើបធ្វើមិនបានសម្រេច តែបន្តិចក្រោយមកក៏ត្រូវសមត្ថកិច្ចតាមចាប់ខ្លួនបានតែម្ដង ។
ស្នងការរងទទួលផែនព្រហ្មទណ្ឌ លោក ឈឿង គឹមសុង បានប្រាប់ថា ជនសង្ស័យហាក់មិនទាន់បានសារភាពទេ ចំពោះទង្វើរបស់ខ្លួន ដែលបានប្រព្រឹត្តទៅលើជនរងគ្រោះ ។ បើតាមពិនិត្យលក្ខណៈសម្បត្តិ ជននេះ មិនមែនជាមនុស្សបែកថ្នាំ ហើយក៏មិនមែនជាមនុស្សឡប់សតិដែរ គឺជាមនុស្សជានាដូចគេឯងដែរ ។
ប៉ុន្តែគេមិនដឹងថា តើមូលហេតុអ្វីបានជាពូនស្ទាក់កាប់ជនរងគ្រោះ ? ព្រោះជនរងគ្រោះ និងជនដៃដល់នេះ មិនធ្លាប់ស្គាល់ ឬធ្លាប់មានទំនាស់នឹងគ្នាទេ ។ ប៉ុន្តែយ៉ាងណាក៏ដោយ បើតាមលោក ឈឿង គឹមសុង ក៏បានដាក់ការសង្ស័យថា បើពិនិត្យលើសកម្មភាពជននេះ ទំនងស្ទាក់កាប់ជនរងគ្រោះ ក្នុងគោលបំណង់ទុច្ចរិត តែធ្វើមិនបានសម្រេច ក៏រត់គេចខ្លួន តែបន្តិចក្រោយមក ក៏ត្រូវសមត្ថកិច្ច ស្រុករុក្ខគិរី តាមចាប់ខ្លួនបាន ក្រោយពីជនរងគ្រោះរាយការណ៏ភ្លាមៗ ។ ពេលនេះ មន្ត្រីជំនាញ កំពុងសួរនាំបន្ថែម ដើម្បីចាត់វិធានការតាមនីតិវិធីហើយ៕
ចែករំលែកព័តមាននេះ