ទីក្រុងវ៉ាស៊ីនតោន៖ លោកត្រាំបានអំពាវនាវឱ្យមានបទឈប់បាញ់ដ៏ពេញលេញ១ និងដោយឥតលក្ខខណ្ឌរយៈពេល៣០ថ្ងៃ។ លោកថ្លែងដូច្នេះបន្ទាប់ពីសន្ទនាគ្នាតាមទូរស័ព្ទជាមួយលោកហ្សេឡិនស្គីយប់មិញ។ លោកព្រមានថាបើសិនគ្មានភាគីណាមួយទទួលយកបទឈប់បាញ់នេះទេ (ជាពិសេសភាគីរុស្ស៊ី ព្រោះអ៊ុយក្រែនដឹងតែទទួលយកទុកជាមុនហើយ) លោកនឹងសហការជាមួយប្រទេសជាដៃគូដទៃទៀតដើម្បីដាក់ទណ្ឌកម្ម។ នេះជាអ្វីដែលលោកបានបង្ហោះនៅលើបណ្ដាញសង្គម។
លោកហ្សេឡិនស្គីបានជម្រាបជូនលោកត្រាំថារដ្ឋាភិបាលទីក្រុងកៀវបានត្រៀមខ្លួនរួចរាល់អស់ហើយដើម្បីចូលតុចចរចាគ្នាជាមួយរុស្ស៊ីក្រោមរូបភាពបែបណាក៏ដោយ, បរិយាកាសបែបណាក៏ដោយ ឬលក្ខខណ្ឌបែបណាក៏ដោយ។ ប៉ុន្តែហ្សេឡិនស្គីសូមបញ្ជាក់ត្រង់ចំណុចនេះថារដ្ឋាភិបាលទីក្រុងម៉ូស្គូត្រូវតែប្រកាន់ជំហរឱ្យបានច្បាស់ថាខ្លួនពិតជាចង់បិទបញ្ចប់សង្គ្រាមពិតមែន។
ហ្សេឡិនស្គីថាលោកចង់ឃើញរុស្ស៊ីចាប់ផ្ដើមជាដំបូងគេដោយទទួលយកបទឈប់បាញ់ដែលគ្មានលក្ខខណ្ឌ។ លោកត្រាំ និងលោកហ្សេឡិនស្គីសន្ទនាគ្នារយៈពេលម្ភៃនាទីក្រោមបរិយាកាសដ៏ល្អណាស់។ នេះបើយោងតាមការបង្ហើបឱ្យដឹងពីមន្ត្រីជាន់ខ្ពស់អ៊ុយក្រែន។ ម៉្យាទៀត ការសន្ទនានេះផ្ដោតសំខាន់ទៅលើការដោះស្រាយបញ្ហាតាមការទូត និងការធ្វើឱ្យមានបទឈប់បាញ់ដ៏ពិតប្រាកដដែលអាមេរិក និងអ៊ុយក្រែនកំពុងទន្ទឹងរង់ចាំយ៉ាងអន្ទះសា។ ជាពិសេស លោកត្រាំដែលធ្លាប់សន្យាបញ្ចប់សង្គ្រាមនេះនៅក្នុងរយៈពេល២៤ម៉ោង។
ប្រភពដដែលបង្ហើបឱ្យដឹងថាថ្នាក់ដឹកនាំទាំង២ក៏បានរំលេចឱ្យឃើញកិច្ចព្រមព្រៀងធ្វើអាជីវកម្មរ៉ែកម្រដែលទើបតែចុះហត្ថលេខាថ្មីៗ និងដែលត្រូវរដ្ឋសភាអ៊ុយក្រែនបោះឆ្នោតអនុម័តរួចហើយកាលពីយប់មិញ។ ទោះបីមានកិច្ចខិតខំប្រឹងប្រែងបញ្ចប់សង្គ្រាមយ៉ាងណាក្ដី រុស្ស៊ីនៅតែរំលោភបទឈប់បាញ់ដែលខ្លួនជាអ្នកប្រកាសដោយខ្លួនឯងរយៈពេលបីថ្ងៃដើម្បីអបអរសាទរខួប៨០ឆ្នាំនៃការទទួលជ័យជម្នះលើពួកណាហ្ស៊ីអាល្លឺម៉ង់។
អ៊ុយក្រែនអះអាងថារុស្ស៊ីបើកយុទ្ធនាការវាយប្រហារយ៉ាងតិច៧៣៤ករណីត្រឹមតែរយៈពេល១២ម៉ោងដំបូងនៃការប្រកាសបទឈប់បាញ់របស់រុស្ស៊ី។ គ្រាន់តែបើឆាកថ្ងៃដំបូងនៃបទឈប់ឈប់បាញ់បីថ្ងៃនោះ អ៊ុយក្រែនថារុស្ស៊ីទម្លាក់គ្រាប់បែកលើតំបន់ភាគឦសានបណ្ដាលឱ្យស្លាប់ជនស៊ីវិលម្នាក់។ ក្រៅពីនេះ គេស្ដាប់ឮសំឡេងកាំភ្លើងធំផ្លោងដាក់សមរភូមិតូច-ធំនៅលើខ្សែត្រៀមចម្ងាយជាងមួយពាន់គីឡូម៉ែត្រ។
គ្រាន់តែថាទំហំនៃការផ្ទុះអាវុធមិនខ្លាំងក្លាដូចរាល់ដងពេកទេ។ ក្រសួងការពារជាតិរុស្ស៊ីអះអាងថាអ៊ុយក្រែនក៏បានវាយប្រហារទីតាំងរបស់រុស្ស៊ីជាច្រើនកន្លែងផងដែរ។ តំបន់បែលហ្គោរ៉ូត (Belgorod), លីផឹត (Lipetsk) អូរេនបឺក (Orenburg), រីយ៉ាហ្សង់ (Ryazan) និងថាមបូវ (Tambov) សុទ្ធតែរងការវាយប្រហារដោយដ្រូនរបស់អ៊ុយក្រែន។ ខាងលើនេះជាការដកស្រង់ប្រភពពីសារព័ត៌មានដឹហ្កាឌាន (The Guardian) និងប្រភពដទៃទៀត៕
ចែករំលែកព័តមាននេះ