ADផ្ទាំងផ្សព្វផ្សាយពាណិជ្ជកម្ម

ឡានតាកូម៉ា១បាំងកន្លះកំពុងបើកសុខៗ ស្រាប់តែឆ្លងចរន្តអគ្គិសនីឆេះ ផ្អើលផ្លូវសហព័ន្ធរុស្ស៊ី

1 អាទិត្យ មុន

ភ្នំពេញ
០៩ ខែ ឧសភា ឆ្នាំ ២០២៥ ម៉ោង ១៤:០៣

រាជធានីភ្នំពេញ ៖ រថយន្តម៉ាកតូយ៉ូតាតាកូម៉ា១បាំងកន្លះ១គ្រឿង ខណៈពេលកំពុងបើកបរតាមដងផ្លូវសុខៗ ស្រាប់តែឆ្លងចរន្តភ្លើងនៅប្លុកម៉ាសុីន បង្កជាអណ្ដាតភ្លើងឆាបឆេះសន្ធោសន្ធៅ ។ ពេលនោះបានបង្កឲ្យមានការភ្ញាក់ផ្អើលយ៉ាងខ្លាំង ប៉ុន្តែបានក្រុមសន្តិសុខយាមដែលកំពុងនៅជិតទីតាំងកើតហេតុនោះយកបំពង់ពន្លត់អគ្គិភ័យទៅជួយបាញ់ពន្លត់ ទើបភ្លើងរលត់ទៅវិញទាំងស្រុង…

ឧប្បត្តិហេតុខាងលើនេះបានកើតឡើងកាលពីវេលាម៉ោង១១និង១០នាទីព្រឹកថ្ងៃទី៩ ខែឧសភា ឆ្នាំ២០២៥ នៅតាមមហាវិថីសហព័ន្ធរុស្សុី ស្ថិតនៅជិតអាកាសយានដ្ឋានអន្តរជាតិភ្នំពេញ ក្នុងភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។

រថយន្តដែលរងនូវការឆាបឆេះបណ្ដាលឲ្យខូចខាតនោះម៉ាកតូយ៉ូតាតាកូម៉ា១បាំងកន្លះ ពណ៍ទឹកមាស ពាក់ស្លាកលេខភ្នំពេញ2S-9450 បើកបរដោយបុរសមិនស្គាល់អត្តសញ្ញាណម្នាក់ ហើយបុរសនោះមិនបានរងរបួសនៅក្នុងហេតុការណ៍នេះទេ ។

ប្រជាពលរដ្ឋដែលមានលំនៅដ្ឋានជិតនោះនិយាយថា នៅមុនពេលកើតហេតុគាត់បានឃើញរថយន្តខាងលើនោះបើកបរធ្វើដំណើរតាមមហាវិថីសហព័ន្ធរុស្សុីក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុ ក៏ស្រាប់តែមានអណ្ដាតភ្លើងឆាបឆេះនិងផ្សែងហុយឃ្មួលខ្មាញ់តែម្ដង ពេលនោះអ្នកបើកបរបានឈប់ រួចបើកទ្វារចុះចេញដោយសុវត្តិភាព ។

ប្រភពដដែលបានប្រាប់ឲ្យដឹងទៀតថា បន្ទាប់មកក្រុមសន្តិសុខដែលយាមនៅជិតទីតាំងកើតហេតុនោះ បាននាំគ្នាយកបំពង់ពន្លត់អគ្គិភ័យទៅជួយបាញ់ពន្លត់រហូតរលត់ទៅវិញទាំងស្រុងមិនបានឆេះរាលដាលរថយន្តនោះទាំងមូល ឬ ឆេះរាលដល់យានយន្តផ្សេងទៀតដែលកំពុងធ្វើដំណើរតាមផ្លូវជាមួយគ្នានោះឡើយ ។ ដោយឡែកការឆាបឆេះនោះផងដែរគឺឆេះប្លុកម៉ាសុីន ដែលសង្ស័យបណ្ដាលមកពីការឆ្លងចរន្តភ្លើង ហើយរថយន្តនោះបានរងការខូចខាតយ៉ាងដំណំ ។

ក្រោយពេលពន្លត់រលត់រួចរាល់នគរបាលបបានយករថយន្តស្ទូចទៅជួយស្ទូចដឹកយករថយន្តនោះចេញពីកន្លែងកើតហេតុទៅធ្វើការជួសជុលឡើងវិញ ដើម្បីកុំឲ្យមានការកកស្ទះចរាចរណ៍តាមដងផ្លូវនោះផងដែរ ៕