រាជធានីភ្នំពេញ ៖ រដ្ឋបាលខណ្ឌ៧មករា សំណូមពរទៅដល់បងប្អូនប្រជាពលរដ្ឋមេត្តាទុកដាក់សំរាមឲ្យបានត្រឹមត្រូវ ដោយបញ្ហាការទុកដាក់ឬចោលសំរាម នៅតែជាបញ្ហាចោទសម្រាប់បងប្អូនប្រជាពលរដ្ឋមួយចំនួនតូច ខ្វះការយល់ដឹងពីអនាម័យសាធារណៈជាហេតុនាំឲ្យមានបាត់បង់សោភ័ណភាព នឹង មានក្លិនមិនល្អ ក្នុងមូលដ្ឋាន…
រាជធានីភ្នំពេញ ៖ រដ្ឋបាលខណ្ឌ៧មករា សំណូមពរទៅដល់បងប្អូនប្រជាពលរដ្ឋមេត្តាទុកដាក់សំរាមឲ្យបានត្រឹមត្រូវ ដោយបញ្ហាការទុកដាក់ឬចោលសំរាម នៅតែជាបញ្ហាចោទសម្រាប់បងប្អូនប្រជាពលរដ្ឋមួយចំនួនតូច ខ្វះការយល់ដឹងពីអនាម័យសាធារណៈជាហេតុនាំឲ្យមានបាត់បង់សោភ័ណភាព នឹង មានក្លិនមិនល្អ ក្នុងមូលដ្ឋាន ។
ជាក់ស្តែងនៅម្ដុំអាគារ បុរីកីឡា ដែលស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ដោយត្រង់ចំណុចទីតាំងខាងលើនេះមានបងប្អូនប្រជាពលរដ្ឋរស់នៅច្រើន ដូច្នេះហើយការទុកដាក់សំរាមនៅអាគារមួយចំនួនគ្មាន សណ្ដាប់ធ្នាប់នោះទេ ។
បើយោងតាមអ្នកស្រី ពិសី ជាប្រជាពលរដ្ឋរស់នៅទីតាំងអាគារបុរីកីឡាបានលើកឡើងថា ដោយសារតែមានប្រជាពលរដ្ឋរស់នៅច្រើននៅលើអគារបុរីកីឡា ហេតុដូចនេះហើយមានប្រជាពលរដ្ឋមួយចំនួនតូចនៅមិនទាន់យល់ដឹងពីបញ្ហាសំរាមការទុកដាក់និងពេលវេលារបស់ក្រុមហ៊ុនប្រមូលសំរាមមកទទួល ខ្លះទៀតយកពីលើអគារចុះមកដល់ខាងក្រោមគឺបោះចោល រឺ ទុកដាក់គ្មាន សណ្ដាប់ធ្នាប់តែម្តង ។
ប្រជាពលរដ្ឋរស់នៅតំបន់បុរីកីឡាបានបន្ថែមទៀតថា ការទុកដាក់សំរាមដែលគ្មានរបៀបរៀបរយនេះវាអាចធ្វើឲ្យសំរាមទាំងអស់នេះហូរចូលតាមប្រព័ន្ធលូធ្វើឲ្យមានការកកស្ទះឬក៏ជន់លិចក្នុងរដូវវស្សា ។
ម្យ៉ាងមួយវិញទៀត ប្រសិនជាសំរាមនោះមានក្លិនមិនល្អវាអាចធ្វើឲ្យប៉ះពាល់ទៅដល់សុខភាពបងប្អូនប្រជាពលរដ្ឋដែលរស់នៅជិតៗនោះផងដែរ ថែមទាំង ប៉ះពាល់ដល់បងប្អូនប្រជាពលរដ្ឋដែលធ្វើដំណើរឆ្លងកាត់ ។
ពាក់ព័ន្ធបញ្ហាលោក ប៉ែន ធឿន ប្រធានការិយាល័យ បរិស្ថានអនាម័យខណ្ឌ៧មករា បានលើកឡើងថា ដោយមានការយកចិត្តទុកពីលោក អភិបាលខណ្ឌ មន្ត្រីជំនាញបានធ្វើការសហការជាមួយនឹងក្រុមហ៊ុនមីសូដា ក្នុងមូលដ្ឋានខណ្ឌ ។ កន្លងទៅ លោកអភិបាលបានណែនាំទៅកាន់ប្រជាពលរដ្ឋ តាមរយៈវេទិកាសាធារណៈរបស់ភូមិឃុំសង្កាត់ខណ្ឌ ត្រូវទុកដាក់វេចខ្ចប់កាកសំណល់អោយបានល្អ ហើយត្រូវបញ្ចេញសម្រាមតាមពេលវេលាកំណត់ម៉ោង ៦ល្ងាច ដល់ម៉ោង៩យប់ ដោយសារតែអគារបុរីកីឡាមានចំនួនអ្នករស់នៅច្រើន ដូច្នេះហើយសំរាមដែលយកមកចោលគ្មានសណ្តាប់ធ្នាប់មួយចំនួន អាជ្ញាធរខណ្ឌបានធើ្វការចរចាជាមួយក្រុមហ៊ុនប្រមូលសំរាមបន្ថែមជើងក្នុងការមកប្រមូលចេញ ។ ពេលខ្លះមានបងប្អូនប្រជាពលរដ្ឋមួយចំនួនខ្លះការយល់ដឹងពីបញ្ហា អនាម័យសាធារណៈហេតុដែលធ្វើឲ្យបាត់បង់សោភ័ណ្ឌភាព ។
ជាមួយគ្នាផងដែរ អាជ្ញាធរខណ្ឌ៧មករា សុំសំណូមពរទៅដល់បងប្អូនប្រជាពលរដ្ឋទាំងអស់មេត្តាទុកដាក់សំរាមឲ្យបានត្រឹមត្រូវ និងបញ្ចេញសំរាមតាមម៉ោងកំណត់របស់ក្រុមហ៊ុនប្រមូលសំរាមនីមួយៗបានកំណត់ ជៀសវាងយកមកចោលគ្មានសណ្ដាប់ធ្នាប់ ៕
ចែករំលែកព័តមាននេះ