សហរដ្ឋអាមេរិក ៖ រដ្ឋការលោកដូណាល់ត្រាំអះអាងនាថ្ងៃទី៦មេសាថា ប្រទេសជាង៥០ហើយ បានទាក់ទងមកសេតវិមានដើម្បីចរចាលើការយកពន្ធទូទៅដែលដាក់ដោយក្រុងវ៉ាស៊ីនតោន។
រដ្ឋមន្ត្រីហិរញ្ញវត្ថុអាមេរិកលើកឡើងថា ការពិភាក្សាគ្នាពីរឿងពន្ធនោះអាចប្រើពេលច្រើនខែ ចំណែកប្រធានាធិបតីលោកដូណាល់ត្រាំនៅតែមិនព្រមបន្ទន់ឥរិយាបថ ប្រឈមមុខនឹងការតវ៉ារបស់ពិភពលោកទាំងមូល។ រដ្ឋមន្ត្រីហិរញ្ញវត្ថុអាមេរិកលោកSCOOT BESSENTថ្លែងតាមទូរទស្សន៍NBCថា យើងចាំមើលថាតើប្រទេសទាំងនោះសុំចរចាបែបណាខ្លះ ព្រោះថាបន្ទាប់ពី២០ ៣០ ៤០និង៥០ឆ្នាំនៃឥរិយាបថអាក្រក់ គេមិនអាចវិលមកកាន់ចំណុចសូន្យវិញទេ។
ទាំងលោកSCOOT BESSENT ទាំងមន្ត្រីអាមេរិកដទៃៗទៀត មិនបានលើកឈ្មោះបណ្ដាប្រទេសដែលសុំចរចាឡើយ។ ការប្រកាសយកពន្ធពីគ្រប់ប្រទេសទាំងអស់លើពិភពលោកពីសំណាក់លោកដូណាល់ត្រាំនាំឲ្យទីផ្សារភាគហ៊ុនលើពិភពលោកដាំក្បាលចុះខ្លាំង ខណៈសហរដ្ឋអាមេរិកចោទបណ្ដាដៃគូសេដ្ឋកិច្ចថាប្លន់ខ្លួន។ ហេតុដូច្នេះហើយបានជាលោកត្រាំសម្រេចដាក់អត្រាពន្ធសកល១០%លើគ្រប់ផលិតផលទាំងអស់ដែលនាំចូលអាមេរិក។ ការយកពន្ធសកល១០%នោះចូលជាធរមានពីថ្ងៃទី៥មេសាទៅ។
ប្រធានាធិបតីអាមេរិកនៅតែមិនបន្ទន់ឥរិយាបថចពោះរឿងនោះ។ តាមបណ្ដាញសង្គមTRUTH SOCIAL លោកសរសេរថា យើងមានឪនភាពពាណិជ្ជកម្មយ៉ាងខ្លាំងជាមួយចិន សហភាពអឹរ៉ុបនិងប្រទេសដទៃច្រើនទៀត។ វិធីតែមួយគត់ដែលអាចដោះស្រាយបញ្ហានេះគឺការយកពន្ធគយដែលនឹងនាំឲ្យយើងប្រមូលប្រាក់បានច្រើនសិបពាន់លានដុល្លារ។ វាពិតជាល្អខ្លាំងណាស់។
ពេលសួរលោកពីលទ្ធភាពនៃការចរចាពីតំបន់មួយដែលគ្មានពន្ធ ជាមួយអឹរ៉ុបដូចការផ្ដល់យោបល់របស់លោកអីុឡុនម៉ូស មនុស្សជំនិតរបស់លោក លោកត្រាំរំឭកថា តាមយោបល់ខ្ញុំអឺរ៉ុបបានរកសីុមានបានពីលើខ្នងអាមេរិក ចាត់ទុកយើងអាក្រក់បំផុត។ អឺរ៉ុបមករកតុចរចាគេចង់ពិភាក្សា តែនឹងគ្មានការពិភាក្សាឡើយបើដរាបណាបណ្ដាប្រទេសអឹរ៉ុបមិនផ្ដល់ប្រាក់ឲ្យយើងច្រើនក្នុងមួយឆ្នាំៗទេនោះ។
ពេលដែលចិនបានតបតវិញភ្លាមៗចំពោះពន្ធថ្មីរបស់អាមេរិក ដោយប្រកាសពីពន្ធគយរបស់ខ្លួនផ្ទាល់ បណ្ដាមេដឹកនាំអឺរ៉ុបបានបង្កើនការទាក់ទងជាមួយអាមេរិក កាលពីចុងសប្ដាហ៍កន្លងទៅ មុនកិច្ចប្រជុំនៅលុចហ្សំបួរបស់រដ្ឋមន្ត្រីពាណិជ្ជកម្មក្រៅប្រទេសរបស់សហភាពអឹរ៉ុប ដើម្បីរៀបចំចម្លើយតបអឹរ៉ុបចំពោះអាមេរិក។
អគ្គលេខាបក្សកុំមុយនីស្តវៀតណាមសុំទុកពេល៤៥ថ្ងៃ
មេដឹកនាំជាន់ខ្ពស់វៀតណាមគឺអគ្គលេខាបក្សកុំមុយនីស្តវៀតណាមលោកតូឡឹម បានស្នើសុំទុកពេលយ៉ាងតិច៤៥ថ្ងៃមុនការចូលជាធរមាន នៃការយកពន្ធ៤៦%លើផលិតផលវៀតណាមនាំចេញទៅកាន់សហរដ្ឋអាមេរិក។ លោកថាការពន្យារពេលនេះ នឺងអាចទុកពេលដល់ប្រទេសទាំង២ ឈានទៅសម្រេចបានកិច្ចព្រមព្រៀងដោយឆាប់រហ័សបំផុតមួយតាមដែលអាចធ្វើទៅបាន។
ប៉ុន្តែរដ្ឋមន្ត្រីពាណិជ្ចកម្មអាមេរិកលោកHOWARD LUTNICK លើកឡើងនាថ្ងៃទី៦មេសាថា ការបង់ពន្ធមកដល់ហើយ រួចនឹងមិនមែនជាកម្មវត្ថុនៃការចរចា ក្នុងពេលភ្លាមៗពីការរួចពន្ធឡើយ។ នឹងគ្មានការពន្យារពេលទេ។ វាមិនមែនជារឿងដែលអាចចរចា ក្នុងរយៈពេលប៉ុន្មានថ្ងៃឬប៉ុន្មានសប្ដាហ៍ឡើយ។
ការយកពន្ធខ្ពស់របស់លោកត្រាំនេះនាំឲ្យមានការច្របូកច្របល់ក្នុងទីផ្សារភាគហ៊ុន។ រយៈពេលតែ២ថ្ងៃ ប្រាក់ហ៊ុន៦០០០ពាន់លានដុល្លាររបស់WALL STREET ត្រូវអសារបង់។ ផ្សារភាគហ៊ុនពិភពលោកក៏ធ្លាក់ចុះខ្លាំងនិងច្របូកច្របល់ដែរ។ ការយកពន្ធខ្ពស់របស់លោកត្រាំនេះនាំឲ្យមានការផ្ទុះកំហឹងទាំងនៅសហរដ្ឋអាមេរិកទាំងនៅប្រទេសដទៃៗទៀតពិសេសនៅអឹរ៉ុប។ តែទោះជាមានការតវ៉ាប្រឆាំងក៏ដោយក៏រដ្ឋការលោកត្រាំ មិនអើពើដែរ៕
ចែករំលែកព័តមាននេះ