សុខភាព៖ យោងតាមការចុះផ្សាយពីប្រភពបរទេស មនុស្សជាច្រើនតែងចំណាយប្រាក់យ៉ាងច្រើនលើអាហារបំប៉នថ្លៃៗដើម្បីចង់បានសុខភាពល្អ ប៉ុន្តែការពិតទៅ “ថ្នាំពន្យារអាយុ” ដែលមានប្រសិទ្ធភាពបំផុតគឺជាអ្វីដែលយើងអាចធ្វើបានដោយឥតគិតថ្លៃជារៀងរាល់ថ្ងៃ។

គន្លឹះដំបូងគឺការផឹកទឹកឱ្យបានគ្រប់គ្រាន់តាមពេលវេលាកំណត់ ដូចជាក្រោយពេលភ្ញាក់ពីគេង និងមុនពេលចូលគេង ដើម្បីជួយឱ្យចរន្តឈាមរត់បានស្រួល បន្សុទ្ធជាតិពុល និងការពារហានិភ័យនៃជំងឺបេះដូង។ បន្ទាប់មកគឺការសម្រាកឱ្យបានស្កប់ស្កល់ ដែលជាពេលវេលាមាសសម្រាប់រាងកាយជួសជុលកោសិកាដែលខូចខាត និងរក្សាតុល្យភាពអ័រម៉ូនឱ្យបានល្អ ព្រោះការគេងមិនគ្រប់គ្រាន់គឺជាដើមហេតុនៃភាពចាស់ជ្រីវជ្រួញ និងការចុះខ្សោយនៃប្រព័ន្ធចងចាំ។

អ្វីដែលមិនអាចខ្វះបាននោះគឺការដើរជារៀងរាល់ថ្ងៃ ដែលជាលំហាត់ប្រាណដ៏ងាយស្រួលបំផុតក្នុងការជួយឱ្យប្រព័ន្ធសរសៃឈាមបេះដូងដំណើរការបានល្អ និងជួយគ្រប់គ្រងទម្ងន់ឱ្យបានសមសួន។ ភាពជោគជ័យនៃសុខភាពល្អមិនស្ថិតនៅលើការហាត់ប្រាណធ្ងន់ៗ ឬការប្រើប្រាស់របស់ថ្លៃៗនោះទេ ប៉ុន្តែវាស្ថិតនៅលើ “ភាពទៀងទាត់” នៃទម្លាប់សាមញ្ញទាំងបីនេះ។ ការផឹកទឹកឱ្យត្រូវតាមតម្រូវការ ការគេងឱ្យបានចន្លោះពី ៦ ទៅ ៧ ម៉ោង និងការដើរជាប្រចាំ នឹងប្រែរូបរាងកាយរបស់អ្នកឱ្យកាន់តែមានថាមពល ស្រស់ថ្លា និងមានអាយុយឺនយូរប្រកបដោយសេចក្តីសុខ។

ការរំលឹក៖ អត្ថបទនេះផ្ដល់ជូនក្នុងគោលបំណងចែករំលែកចំណេះដឹងប៉ុណ្ណោះ។ ប្រសិនបើអ្នកមានបញ្ហាសុខភាពរ៉ាំរ៉ៃ សូមពិគ្រោះជាមួយគ្រូពេទ្យជំនាញមុននឹងផ្លាស់ប្តូររបបអាហារ ឬរបៀបរស់នៅរបស់អ្នក៕
​