នៅអំឡុងបុណ្យចូលឆ្នាំថ្មីប្រពៃណីជាតិដែលនឹងមកដល់នៅក្នុងពេលដ៏ខ្លីខាងមុខនេះ ការជួបជុំហូបចុកហើយផឹកស៊ីសប្បាយ គឺជារឿងពិបាកហាមឃាត់ ។ ចូលឆ្នាំ គឺជាពេលវាលជួបជុំបងប្អូនឪពុកម្តាយ ដើម្បីរីករាយចូលឆ្នាំថ្មី ដូច្នេះការកម្សាន្តសប្បាយ និងពិធីជប់លៀងក្នុងគ្រួសារជារឿងធម្មតា ។…
នៅអំឡុងបុណ្យចូលឆ្នាំថ្មីប្រពៃណីជាតិដែលនឹងមកដល់នៅក្នុងពេលដ៏ខ្លីខាងមុខនេះ ការជួបជុំហូបចុកហើយផឹកស៊ីសប្បាយ គឺជារឿងពិបាកហាមឃាត់ ។ ចូលឆ្នាំ គឺជាពេលវាលជួបជុំបងប្អូនឪពុកម្តាយ ដើម្បីរីករាយចូលឆ្នាំថ្មី ដូច្នេះការកម្សាន្តសប្បាយ និងពិធីជប់លៀងក្នុងគ្រួសារជារឿងធម្មតា ។
ច្បាប់ក៏មិនហាមហើយក្រុមហ៊ុនផលិតគ្រឿងស្រវឹងក៏កំពុងតែធ្វើទីផ្សារយ៉ាងផុលផុស ប៉ុន្តែសូមចេះលៃលក និងទប់អារម្មណ៍ខ្លួនឯងខ្លះហើយសំខាន់កុំឲ្យគ្រួសារជាប់បំណុល អស់មាន់ អស់ទា ដោយសារតែការផឹកស៊ីនេះច្រើនពេក ។
នៅក្នុងករណីយើងមានលុយមានកាក់ហើយត្រៀមបម្រុងសម្រាប់កម្មវិធីជួបជុំនេះ គឺនាំគ្នាជួបជុំសប្បាយចុះ ប៉ុន្តែក៏កុំអោយជ្រុលរហូតស្រវឹងគ្រប់គ្រងខ្លួនឯងមិនបាននាំកើតមានករណីហិ.ង្សាឈ្លោះប្រកែកគ្នា កា.ប់ចា.ក់ ឬគ្រោះថ្នាក់ចរាចរណ៍អី ។
ពាក់ព័ន្ធនឹងបញ្ហាគ្រឿងស្រវឹងនេះ តាមសៀវភៅគោលនយោបាយមួយដែល មានចំណងជើងថា «ការពង្រឹងទិដ្ឋភាពទូទៅនៃគោលនយោបាយនៅកម្ពុជា ដើម្បីប្រយុទ្ធប្រឆាំងនឹងការទទួលទានគ្រឿងស្រវឹងហួសកម្រិត» ដែលចងក្រងឡើងដោយ វិទ្យាស្ថានគោលនយោបាយសាធារណៈអាស៊ីអាគ្នេយ៍ (SEAPPI) និងវិទ្យាស្ថានចក្ខុវិស័យអាស៊ី (AVI) បានឲ្យដឹងថា ការប្រើប្រាស់គ្រឿងស្រវឹងក្នុងចំណោមយុវជន នៅតែជាក្តីកង្វល់ក្នុងប្រទេស ។
របាយការណ៍ដែលទើបតែបានចេញផ្សាយ នាពេលថ្មីៗកន្លងទៅនេះបានឲ្យដឹងថា ស្ទើរតែមួយភាគបីនៃយុវជនដែលមានអាយុចន្លោះពី១៥ ទៅ១៩ឆ្នាំ ត្រូវបានគេរកឃើញថា ជាអ្នកប្រើប្រាស់គ្រឿងស្រវឹងនាពេលបច្ចុប្បន្ន ។
នៅក្នុងករណីដែលមនុស្សវ័យកណ្តាលប្រើប្រាស់គ្រឿងស្រវឹង មិនសូវជាអីនោះទេ ប៉ុន្តែនៅពេលដែលរបាយការណ៍ស្រាវជ្រាវរកឃើញយុវជនវ័យក្មេងដែលមានអាយុចន្លោះពី១៥ទៅដល់១៩ឆ្នាំ ពួកគេយកខ្លួនទៅពាក់ព័ន្ធនឹងគ្រឿងស្រវឹងបែបនេះ គឺជាអ្វីដែលយើងគួរតែគិត ។
ក្រៅពីនោះអ្វីដែលឯកសារនេះបានបង្ហាញនោះ ក៏បានបង្ហើបផងដែរថា នៅក្នុងចំណោមអ្នកដែលទទួលទាន ឬប្រើប្រាស់គ្រឿងស្រវឹង គឺមានអត្រារហូតដល់២៦ភាគរយត្រូវបានគេពិពណ៌នាថា គឺជាអ្នកដែលទទួលទាន ឬប្រើប្រាស់គ្រឿងស្រវឹងជោគជាំ ហើយជាង២៨ភាគរយនៅក្នុងកម្រិតដែលមានហានិភ័យមធ្យមដោយ៥ភាគរយចាត់ទុកថា មានហានិភ័យខ្ពស់ និង៤ភាគរយទំនងជាញៀ.នគ្រឿងស្រវឹងតែម្តង ។
ក្នុងរយៈពេលប៉ុន្មានឆ្នាំចុងក្រោយនេះ ទីផ្សារគ្រឿងស្រវឹងដែលបានកត់ត្រានៅក្នុងប្រទេសកម្ពុជាបាន និងកំពុងកើនឡើង ហើយត្រូវបានគេព្យាករណ៍ថា នឹងបន្តកើនឡើងជំរុញដោយការកើនឡើងនៃវណ្ណៈកណ្តាលកំណើនទេសចរណ៍អន្តរជាតិ និងនគរូបនីយកម្មយ៉ាងឆាប់រហ័ស ។
ឯកសារដដែលនេះបានបន្តទៀតថា កំណើនភាគច្រើនត្រូវបានជំរុញដោយទីផ្សារស្រាគ្រឿងស្រវឹងដែលមានតម្លៃ១,១ ពាន់លានដុល្លារ កាលពីឆ្នាំ២០២៣ ហើយត្រូវបានព្យាករណ៍ថា នឹងកើនឡើងពីរដងនៅឆ្នាំ២០៣២ ។
សរុបទៅ នៅក្នុងឱកាសបុណ្យចូលឆ្នាំប្រពៃណីជាតិខាងមុខនេះ ប្រសិនបើមិនអាចទប់អារម្មណ៍នៃការចង់ទទួលទានទេនោះ គឺហូបចុះ ឬទទួលទានចុះ ប៉ុន្តែធ្វើយ៉ាងណាក៏ដោយកុំជ្រុល ហើយគួរតែចេះគិតចេះគូរ ។ និយាយឲ្យចំហូបចុកគួរតែទទួលដោយការទទួលខុសត្រូវ កុំចេះតែទទួលទានមិនប្រមាណ ពីធនធាន ហូបតាមការឃ្លាន ឬតាមការបញ្ជោពីអ្នកដទៃ ៕
ចែករំលែកព័តមាននេះ