ប្រមុខរដ្ឋាភិបាលសម្តេចធិបតី ហ៊ុន ម៉ាណែត បង្ហើបហើយរឿងកោះ គ្រាន់តែការបង្ហើបនោះមិនសូវវែងឆ្ងាយ ដូច្នេះចាំមើលថា តើសមត្ថកិច្ច និងស្ថាប័នពាក់ព័ន្ធនឹងចាត់ចែងយ៉ាងណា រឿងកោះដែលទទួលបានសិទ្ធិហើយ ប៉ុន្តែមិនបានធ្វើអ្វីសោះ…
ប្រមុខរដ្ឋាភិបាលសម្តេចធិបតី ហ៊ុន ម៉ាណែត បង្ហើបហើយរឿងកោះ គ្រាន់តែការបង្ហើបនោះមិនសូវវែងឆ្ងាយ ដូច្នេះចាំមើលថា តើសមត្ថកិច្ច និងស្ថាប័នពាក់ព័ន្ធនឹងចាត់ចែងយ៉ាងណា រឿងកោះដែលទទួលបានសិទ្ធិហើយ ប៉ុន្តែមិនបានធ្វើអ្វីសោះ ។
សម្តេចមហាបវរធិបតី បានថ្លែងនៅឱកាសសម្ពោធដាក់ឱ្យដំណើរការជាផ្លូវការនូវមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម នៅព្រឹកថ្ងៃទី៥ ខែមេសា ឆ្នាំ២០២៥ថា សម្តេចបានណែនាំឲ្យជំនាញសិក្សា និងដកហូតយកកោះខ្លះមកវិញជាពិសេស គឺកោះដែលមិនមានសកម្មភាពអភិវឌ្ឍន៍អ្វីសោះ ។
សម្តេចមហាបវរធិបតី បានលើកឡើងខ្លះថា ក្រុមហ៊ុន ឬបុគ្គលខ្លះ ក្រោយពេលដែលបានអាជ្ញាប័ណ្ណហើយ គឺអត់ព្រមធ្វើអ្វីសោះ ហើយស្នើឲ្យជំនាញគិតគូរឲ្យហើយ ដើម្បីរៀបចំឲ្យច្បាស់លាស់ ដើម្បីអាចយកកោះខ្លះមកវិញ ដើម្បីទុកបម្រើឲ្យវិស័យការពារជាតិ ។
សម្តេចមហាបវរធិបតី បានលើកឡើងថា «អ្នកពាក់ព័ន្ធ គួរតែគិតគូរឲ្យច្បាស់លាស់ ហើយកំណត់ឡើងវិញ ឲ្យសុក្រិតថា កោះឆ្នេរណា ប្រើសម្រាប់កិច្ចអភិវឌ្ឍន៍ បម្រើសេដ្ឋកិច្ច និងកោះ និងឆ្នេរណាខ្លះ ដែលអាចមានសក្តានុពល ប្រើសម្រាប់វិស័យកិច្ចការពារជាតិ» ។
នៅក្នុងឱកាសនោះដែរ ប្រមុខរាជរដ្ឋាភិបាលកម្ពុជា ក៏បានណែនាំឱ្យធ្វើការសិក្សាការពាររយៈពេលវែងនៅក្នុងដែនសមុទ្រ ដោយកំណត់ឱ្យហើយពីទីតាំងដែលត្រូវដៅ ដើម្បីជជែកជាមួយខាង ក្រុមប្រឹក្សាអភិវឌ្ឍន៍កម្ពុជាបែងចែកឱ្យដាច់នូវកោះ ឬឆ្នេរសម្រាប់ធ្វើរីសត និងកោះឆ្នេរសម្រាប់ទីតាំងសម្រាប់វិស័យការពារជាតិ ។
សម្តេចមហាបវរធិបតី បានថ្លែងថា ឥឡូវនេះ កម្ពុជាពិតជានៅមិនទាន់មានសមត្ថភាពឈានទៅដល់ការកសាងមូលដ្ឋានយោធាយុទ្ធសាស្ត្រនៅតាមកោះទាំងនោះនៅឡើយ ក៏ដោយក៏កម្ពុជាត្រូវតែគិតគូររក្សាបម្រុងទុកឱ្យហើយនូវកោះ និងឆ្នេរសម្រាប់វិស័យការពារជាតិ ។
សម្ដេចមហាបវរធិបតី បានមានប្រសាសន៍ថា នេះ គឺជាការគិតគូរជាកញ្ចប់ពីព្រោះថាយើងមិនអាចគិតតែពីកងទ័ព ដោយមិនបានគិតពីសេដ្ឋកិច្ច ពាណិជ្ជកម្មរបស់ប្រជាពលរដ្ឋនោះទេ ។ ដូច្នេះហើយការកំណត់ពីទីតាំង ការកំណត់ពីការប្រើប្រាស់ដី គឺជាកិច្ចការចាំបាច់ ។
ពាក់ព័ន្ធនឹងបញ្ហាកោះនេះលោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានឲ្យដឹងថា កោះចំនួន៧ គឺជាទីតាំងបម្រុងទុកហ្វឹកហ្វឺន រួមគ្នាសម្រាប់កងទ័ពជើងទឹក ។
លោកបានឲ្យដឹងថា កោះទាំងនោះ គឺជាកោះដែលស្ថិតនៅជិតនឹងមូលដ្ឋានសមុទ្ររាម និង ទីបញ្ជាការមូលដ្ឋានសមុទ្ររាម ។ លោកបានបញ្ជាក់ថា«កោះទាំងអស់នោះ គឺរួមមាន កោះត្រេះ កោះប្រើស កោះច្រលុំ កោះឫស្សី កោះតាគៀវ កោះស្រមោច និងកោះសំពោជ ។
មកដល់ពេលបច្ចុប្បន្ននេះ កោះទាំងនោះមានកោះខ្លះ គឺត្រូវបានក្រុមហ៊ុនឯកជនទទួលបានសិទ្ធិវិនិយោគ ធ្វើជារីសត ប៉ុន្តែត្រង់ថា គម្រោងវិនិយោគនៅកោះទាំងនេះដើរដល់ណាក៏មិនមាននរណាម្នាក់ប្រកាសឬបញ្ជាក់ថា វាយ៉ាងណាដែរ៕
ចែករំលែកព័តមាននេះ