អ្នកបើកបរ និងស្ថាប័នពាក់ព័ន្ធ សូមងាកមកមើលបញ្ហាយានយន្តល្មើសច្បាប់ចរាចរណ៍ផងពីព្រោះភាគរយនៃយានយន្តដែលខុសច្បាប់ គឺខ្ពស់ណាស់ ពោលគឺប្រមាណ៧០ភាគរយទៅហើយ ។ ដូច្នេះ ទើបបានជាគ្រោះថ្នាក់ចរាចរណ៍ពិបាកនឹងស្រុតចុះយ៉ាងនេះ ។ តាមការគណនាគុណចែកដោយយោងតាមស្ថិតិដែលសមត្ថកិច្ចប៉ូលិសចរាចរណ៍បានកត់ត្រា…
អ្នកបើកបរ និងស្ថាប័នពាក់ព័ន្ធ សូមងាកមកមើលបញ្ហាយានយន្តល្មើសច្បាប់ចរាចរណ៍ផងពីព្រោះភាគរយនៃយានយន្តដែលខុសច្បាប់ គឺខ្ពស់ណាស់ ពោលគឺប្រមាណ៧០ភាគរយទៅហើយ ។ ដូច្នេះ ទើបបានជាគ្រោះថ្នាក់ចរាចរណ៍ពិបាកនឹងស្រុតចុះយ៉ាងនេះ ។
តាមការគណនាគុណចែកដោយយោងតាមស្ថិតិដែលសមត្ថកិច្ចប៉ូលិសចរាចរណ៍បានកត់ត្រា និងប្រកាសជាសាធារណៈនៅលើបណ្តាញសង្គមផ្លូវការរបស់អគ្គស្នងការនគរបាលជាតិ បានឲ្យដឹងថា យានយន្តដែលល្មើសហើយសមត្ថកិច្ចបានបង្ក្រាប ហើយតម្រូវឲ្យបង់ពិន័យមិនចេះតិចឡើយ ។
លទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោកពីថ្ងៃទី០១ ដល់ថ្ងៃទី២៩ ខែមិថុនា ឆ្នាំ២០២៥ បានឲ្យដឹងថា យានយន្តចូលគោលដៅត្រួតពិនិត្យមានចំនួនសរុប១១.០២៤គ្រឿងនៅក្នុងនោះរថយន្តធំ៩៤គ្រឿង, រថយន្តតូច ៤.៤១០គ្រឿង និងម៉ូតូ៦.៥២០គ្រឿង ។ ផ្អែកតាមប្រភពដដែលសមត្ថកិច្ចបានរកឃើញថា យានយន្តល្មើសសរុបចំនួន ៨.២៦៣គ្រឿង ដោយរថយន្តធំមានចំនួន៦៤គ្រឿង, រថយន្តតូចចំនួន ៣.៣៦៩គ្រឿង និងម៉ូតូ ៤.៨៣០គ្រឿងត្រូវបានផាកពិន័យ ។
របាយការណ៍ដដែល បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់បានចូលរួមគោរពច្បាប់ចរាចរណ៍យ៉ាងល្អប្រសើរ ។ ស្ថានភាពនៃការផាកពិន័យឃើញថា ល្អប្រសើរមែន ប៉ុន្តែបើនិយាយអំពីស្ថានភាពចរាចរណ៍ គឺមិនល្អប្រសើរឡើយ ។ ស្ថានភាពបែបនេះ គឺនៅតែជាសញ្ញាអវិជ្ជមាននៅឡើយ ពីព្រោះតាមការគណនាអត្រាភាគរយនៃយានយន្ត ដែលនៅខុសច្បាប់ ហើយធ្វើចរាចរណ៍នៅតាមផ្លូវសាធារណៈ គឺនៅមានខ្ពស់ដែលយើងគួរតែយកចិត្តទុកដាក់ ។
ជាមួយ និងស្ថិតិខាងលើនេះ យើងបានគណនាទៅឃើញថា យានយន្តសរុបដែលបានរងនូវការផាកពិន័យ គឺមានភាគរយខ្ពស់ពោល គឺរហូតដល់ទៅជិត ៧៥ភាគរយទៅហើយ ។ ដោយឡែក រថយន្តធំវិញ គឺមានជាង៦៨ ភាគរយ ហើយរថយន្តតូចក៏មិនធម្មតាដែរ គឺល្មើសត្រូវផាកពិន័យដល់ទៅជាង៧៦ ភាគរយ ហើយម៉ូតូដែលយើងដឹងថា ជាមធ្យោបាយដ៏ពេញនិយមបំផុត ហើយប្រើប្រាស់ទូលំទូលាយនោះ គឺមានរហូតដល់ទៅជាង៧៤ភាគរយ ។
តើអ្នកណាជាអ្នកល្មើស ? យើងទាំងអស់ ជាអ្នកប្រើប្រាស់យានយន្តគួរសួរខ្លួនឯងពីព្រោះតែយើងទាំងអស់គ្នា ដែលរងការផាកពិន័យនេះហើយ ដែលជាអ្នកល្មើស ។ ដូច្នេះដើម្បីកុំអោយសមត្ថកិច្ចឃាត់ ហើយចាប់ផាកពិន័យ គួរតែកែសម្រួល ហើយត្រួតពិនិត្យ យានយន្តរបស់យើងតើនៅខ្វះខាតអ្វី? ហើយពេលដែលបើកបរយើងបើកយ៉ាងម៉េច បានជាត្រូវសមត្ថកិច្ចផាកពិន័យ?
ប្រសិនបើយើងមិនល្មើស សមត្ថកិច្ចក៏មិនផាកពិន័យយើងដែរ ពីព្រោះតាមស្ថិតិឃើញហើយ គឺមានយានយន្តដែលគោរព ទោះបីជាត្រូវសមត្ថកិច្ចហៅចូលទីតាំងត្រួតពិនិត្យ ប៉ុន្តែនៅពេលដែលគេបញ្ជាក់ភាពត្រឹមត្រូវ គឺគេអាចបន្តដំណើរទៅមុខបានជាធម្មតា ។
សរុបទៅ ដើម្បីយើងទាំងអស់គ្នារួបរួមគ្នាកាត់បន្ថយគ្រោះថ្នាក់ចរាចរណ៍ យើងទាំងអស់គ្នា គួរតែធ្វើការត្រួតពិនិត្យយានយន្តរបស់យើងឲ្យបានគ្រប់ជ្រុងជ្រោយតាមច្បាប់ចរាចរណ៍ ហើយមិនតែប៉ុណ្ណោះនៅពេលដែលបើកបរក៏ត្រូវគោរពច្បាប់ចរាចរណ៍ដែរ ។ នៅក្នុងករណីដែលយើងទាំងអស់គ្នាចេះគោរពច្បាប់ចរាចរណ៍យានយន្តរបស់យើងមានភាពត្រឹមត្រូវ តាមច្បាប់អស់ហើយ នោះគ្រោះថ្នាក់ចរាចរណ៍អាចនឹងបន្តកាត់បន្ថយបន្ថែមទៀត នៅពេលខាងមុខ ។ សុវត្ថិភាពចរាចរណ៍ គឺនៅលើដៃ និងយានយន្តដែលយើងទាំងអស់គ្នាបានកំពុងតែប្រើប្រាស់ផ្លូវសាធារណៈនៅពេលបច្ចុប្បន្ននេះ៕
ចែករំលែកព័តមាននេះ