ខេត្តបាត់ដំបង ៖ ក្រុមជូញដូរគ្រឿងញៀនប្រុស-ស្រីចំនួន០៥នាក់ ក្នុងនោះ មានទាំងភរិយាលោកមន្ត្រីនគរបាលម្នាក់ផង ត្រូវបានមន្ត្រីកងរាជអាវុធហត្ថបញ្ជូនទៅកាន់សាលាដំបូងខេត្ត នៅថ្ងៃទី០៥ មេសា នេះ ក្រោយបញ្ចប់នីតិវិធីសួរនាំ …
ខេត្តបាត់ដំបង ៖ ក្រុមជូញដូរគ្រឿងញៀនប្រុស-ស្រីចំនួន០៥នាក់ ក្នុងនោះ មានទាំងភរិយាលោកមន្ត្រីនគរបាលម្នាក់ផង ត្រូវបានមន្ត្រីកងរាជអាវុធហត្ថបញ្ជូនទៅកាន់សាលាដំបូងខេត្ត នៅថ្ងៃទី០៥ មេសា នេះ ក្រោយបញ្ចប់នីតិវិធីសួរនាំ ដែលជាប់ពាក់ព័ន្ធនឹងសំណុំរឿងជូញដូរគ្រឿងញៀនដោយខុសច្បាប់ ។ នេះបើតាមប្រភពពីមន្ត្រីកងរាជអាវុធហត្ថ ។
លោក សូ ឌី ប្រធានមន្ទីរប្រឆាំងបទល្មើសនៃបញ្ជាការដ្ឋានកងរាជអាវុធហត្ថខេត្តបានប្រាប់ថា ក្រុមជនសង្ស័យពាក់ព័ន្ធករណីជូញដូរគ្រឿងញៀនទាំង០៥នាក់ ត្រូវបានបញ្ជូនទៅកាន់សាលាដំបូងខេត្ត នៅព្រឹកថ្ងៃទី០៥ មេសា នេះហើយ ដោយយោងតាមបទបញ្ជាលោកមេបញ្ជាការខេត្ត ក្រោយបញ្ចប់នីតិវិធីសួរនាំ ។
យោងតាមរបាយការណ៍មន្ត្រីកងរាជអាវុធហត្ថបានឲ្យដឹងថា ជនសង្ស័យជូញដូរគ្រឿងញៀនទាំង០៥នាក់រួមមាន៖ ១-ឈ្មោះ ចែត ស្រីមុំ ភេទស្រី អាយុ៣២ឆ្នាំ នៅភូមិស្ដៅ ឃុំស្ដៅ ស្រុករតនមណ្ឌល ២-ឈ្មោះ យាន ស្រីនិក ហៅចាន់នី ភេទស្រី អាយុ១៦ឆ្នាំ នៅភូមិតាគ្រាម ឃុំតាគ្រាម ស្រុករតនមណ្ឌល ៣-ឈ្មោះ វ៉ាត ណៃ ភេទប្រុស អាយុ២១ឆ្នាំ នៅភូមិព្រៃពោធ៏ ឃុំអណ្ដើកហែប ស្រុករតនមណ្ឌល ៤-ឈ្មោះ មឿន ប៊ុនថន ភេទប្រុស អាយុ២៦ឆ្នាំ និង៥-ឈ្មោះ ម៉ៃ ចិន្តា ភេទប្រុស អាយុ៤០ឆ្នាំ ជន២នាក់នេះ នៅភូមិបាណង់ ឃុំស្ដៅ ស្រុករតនមណ្ឌល ។
ក្រុមជូញដូរគ្រឿងញៀនទាំងប្រុសទាំងស្រីនេះ ត្រូវបានកម្លាំងការិយាល័យជំនាញសហការជាមួយកម្លាំងមូលដ្ឋានកងរាជអាវុធហត្ថស្រុករតនមណ្ឌលឆ្មក់ចូលបង្ក្រាបបានពេលកំពុងប្រព្រឹត្តបទល្មើសជាក់ស្ដែង កាលពីរសៀលថ្ងៃទី០៣ មេសា នៅចំណុចភូមិស្ដៅ ឃុំស្ដៅ ស្រុករតនមណ្ឌល ។
របាយការណ៍ដដែលបានបង្ហាញថា ជាមួយនឹងការឃាត់ខ្លួនជនសង្ស័យប្រុស ស្រីទាំង០៥នាក់ មន្ត្រីជំនាញដកហូតវត្ថុតាងបានរួមមាន៖ ថ្នាំញៀនប្រភេទមេតំហ្វេតាមីន ICE (ម៉ាទឹកកក) ចំនួន៥៨កញ្ចប់ មានទម្ងន់២១,៦៥ក្រាម ម៉ូតូដែលជាមធ្យោបាយសម្រាប់ប្រព្រឹត្តបទល្មើសចំនួន០២គ្រឿង និង សម្ភារៈពាក់ព័ន្ធមួយចំនួនទៀត ។
ដោយឡែក ចំពោះសមាសភាពក្រុមជនសង្ស័យជូញដូរថ្នាំញៀនទាំង០៥នាក់នេះ បើតាមប្រភពពីសមត្ថកិច្ចដែរបានបង្ហើបឲ្យដឹងថា ក្នុងចំណោមជនសង្ស័យទាំង០៥នាក់ គឺមានម្នាក់ឈ្មោះ ចែត ស្រីមុំ ជា
«មេខ្លោង» ដែលមានស្វាមីជាមន្ត្រីនគរបាលឈ្មោះ កោ ស៊ុនកាំង មានតួនាទីនាយការិយាល័យព្រហ្មទណ្ឌកំរិតធ្ងន នៃស្នងការខេត្តបាត់ដំបង ។
ប្រភពដដែលបានទម្លាយទៀតថា ភរិយាលោកមន្ត្រីនគរបាលម្នាក់នេះមានប្រវត្តិរកស៊ីជូញដូរគ្រឿងញៀននេះ ច្រើនឆ្នាំកន្លងមកហើយ តែគេមិនដែលឃើញសមត្ថកិច្ចក្នុងមូលដ្ឋានអើពើ ឬចុះបង្ក្រាបម្ដងណាទេ ។ លុះចុងក្រោយនេះ ក្រោយពីមន្ត្រីជំនាញតាមដានពីសកម្មភាព និងធ្វើការស៊ើបអង្កេតជាក់លាក់ ទើបត្រូវកម្លាំងកងរាជអាវុធហត្ថឆ្មក់ចូលបង្ក្រាបបានទាំងសំបុកតែម្ដងជាមួយនឹងការរឹបអូសយកវត្ថុតាងបានយ៉ាងច្រើនសន្ធឹក ។
លោក កោ ស៊ុនកាំង ដែលជាស្វាមីស្ត្រីឈ្មោះ ចែត ស្រីមុំ (ជនសង្ស័យ) មិនអាចទំនាក់ទំនងសុំការបំភ្លឺបានទេក្នុងករណីនេះ គិតត្រឹមម៉ោង១រសៀលថ្ងៃទី០៥ មេសា ពាក់ព័ន្ធនឹងរឿងរ៉ាវប្រពន្ធរបស់លោក ត្រូវបានមន្ត្រីកងរាជអាវុធហត្ថឃាត់ខ្លួន ដែលជាប់សង្ស័យពីបទជូញដូរគ្រឿងញៀនខុសច្បាប់ ។ ប៉ុន្តែបើតាមប្រភពនានាបាននិយាយថា លោកនាយការិយាល័យព្រហ្មទណ្ឌកំរិតធ្ងន់រូបនេះ កំពុងឆ្លេឆ្លាសម្បើមដៃណាស់ ដែលទំនងចង់រត់ការដោះស្រាយរឿងប្រពន្ធ ។
ទោះយ៉ាងណា លោក សូ ឌី ប្រធានមន្ទីរប្រឆាំងបទល្មើសនៃបញ្ជាការកងរាជអាវុធហត្ថខេត្ត បានបញ្ជាក់ថា ពេលនេះ ជនសង្ស័យទាំង០៥នាក់ កំពុងស្ថិតក្នុងដៃតុលាការចាត់ការតាមនីតិវិធី ។
ចែករំលែកព័តមាននេះ