ទីក្រុងប្រ៊ុចសែល៖ លើកនេះច្បាស់ហើយ អ៊ុយក្រែនមិនអាចដាក់បញ្ចូលលក្ខខណ្ឌនៃការចូលជាសមាជិកអង្គការណាតូនៅក្នុងកិច្ចព្រមព្រៀងសន្តិភាពបានឡើយ។ នេះបើយោងតាមការបញ្ជាក់របស់អគ្គលេខាធិការអង្គការណាតូ លោកម៉ាករ៉ាត់ (Mark Rutte)។ លោកថ្លែងដូច្នេះនៅក្នុងកិច្ចប្រជុំរដ្ឋមន្ត្រីការបរទេសនៃរដ្ឋជាសមាជិកអង្គការណាតូរយៈពេល២ថ្ងៃ។
លោកម៉ាករ៉ាត់បញ្ជាក់ថាដូចដែលណាតូធ្លាប់បានឯកភាពគ្នាកាលប្រជុំកំពូលនៅវ៉ាស៊ីនតោនជំនាន់លោកបៃដិនអីចឹងគឺថាណាតូថ្ងៃណាមួយខ្លួននឹងទទួលយកអ៊ុយក្រែនជាសមាជិក។ នេះជាការសន្យាដែលមិនអាចប្រែក្រឡាស់សម្ដីបានឡើយ។ គ្រាន់តែថាណាតូមិនដែលបានសន្យាជាមួយអ៊ុយក្រែនថានឹងដាក់បញ្ចូលលក្ខខណ្ឌនេះនៅក្នុងកិច្ចព្រមព្រៀងសន្តិភាពទេ។
លោកម៉ាករ៉ាត់ថ្លែងដូចនេះតបទៅនឹងសំណួររបស់អ្នកសារព័ត៌មានដែលថាតើអង្គការណាតូនៅតែពិចារណាទទួលយកអ៊ុយក្រែនជាសមាជិករបស់ខ្លួននាពេលអនាគតដែរឬទេ ឬក៏ប្រែក្រឡាស់ត្រង់ចំណុចនេះ? ការសួរដូច្នេះបន្ទាប់ពីមន្ត្រីរដ្ឋាភិបាលអាមេរិកបញ្ជាក់ម្ដងជាពីរដងហើយថាអ៊ុយក្រែនប្រហែលជាគ្មានឱកាសក្លាយជាសមាជិកអង្គការណាតូទេ។
តាមមើលទៅ អ៊ុយក្រែនមានឧបសគ្គច្រើនណាស់ដែលបិទខ្ទប់មិនឱ្យចូលណាតូបាន។ មានការជំទាស់ខ្លាំងជាងគេពីលោកពូទីន, បន្ទាប់មកពីរដ្ឋជាសមាជិកអង្គការណាតូខ្លះដែលមានទំនាក់ទំនងជិទស្និទ្ធជាមួយលោកពូទីនដូចជាតួកគី ហុងគ្រី និងប្រទេសដទៃទៀត។ សូម្បីតែអាមេរិកដែលជាមេធំរបស់ណាតូក៏បង្ហាញការប្រឆាំងជំទាស់ផងដែរ។
រដ្ឋមន្ត្រីការពារជាតិអាមេរិកធ្លាប់និយាយថារឿងនេះមិនអាចជាការពិត។ ទីប្រឹក្សាសន្តិសុខជាតិអាមេរិកក៏មិនសង្ឃឹមថាអ៊ុយក្រែនអាចចូលណាតូបានដែរ។ លោកថាមិនត្រឹមតែអាមេរិកទេដែលគិតថាមិនអាចទៅរួច សូម្បីតែរដ្ឋជាសមាជិកណាតូដទៃទៀតក៏យល់ដូច្នេះដែរ។ ប្រមុខដឹកនាំអ៊ុយក្រែន លោកហ្សេឡិនស្គី សម្ដែងការខកចិត្តយ៉ាងខ្លាំង។ លោកថាការដែលអាមេរិកបិទខ្ទប់អ៊ុយក្រែនបែបនេះជាការផ្ដល់កាដូដ៏ធំមួយសម្រាប់រុស្ស៊ី។
នៅក្នុងកិច្ចប្រជុំ២ថ្ងៃនោះ ណាតូក៏បានលើកឡើងអំពីកង្វល់របស់ពួកគេក្រោយការដំឡើងពន្ធរបស់លោកត្រាំ។ រដ្ឋមន្ត្រីការបរទេសន័រវេព្រមានថាការដំឡើងពន្ធនេះផ្ទុយពីគោលការណ៍ជាមូលដ្ឋានគ្រឹះនៅពេលបង្កើតអង្គការណាតូដំបូង។ រដ្ឋមន្ត្រីរូបនេះយល់ថាការដាក់ចេញនយោបាយសេដ្ឋកិច្ចណាមួយដែលធ្វើឱ្យប៉ះពាល់វិស័យពាណិជ្ជកម្មរបស់រដ្ឋជាសមាជិកណាតូអាចនឹងធ្វើឱ្យស្ថាប័ននេះចុះខ្សោយ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានស៊ីនហួ និងប្រភពដទៃទៀត៕
ចែករំលែកព័តមាននេះ