ទីក្រុងហាណូយ៖ វៀតណាមដែលជាប្រទេសដ៏ធំមួយនៅក្នុងតំបន់ និងមានប្រជាជនសរុបជាង១០០លាននាក់កំពុងបង្ហាញសញ្ញាមិនស្រួលផ្នែកវិស័យសេដ្ឋកិច្ចជាតិបន្ទាប់ពីរបាយការណ៍របស់រដ្ឋាភិបាលបង្ហាញថាទំហំផលិតផលសរុបក្នុងស្រុក ឬជីឌីភី (GDP) កើនឡើងតិចតួចនៅក្នុងត្រីមាសទីមួយឆ្នាំនេះ (ដើមខែមករា-ចុងខែមីនា) បើប្រៀបធៀបនឹងចុងឆ្នាំ២០២៤។
បញ្ហាសេដ្ឋកិច្ចដើរធាក់ថយរបស់វៀតណាមកើតឡើងចំពេលលោកត្រាំដំឡើងពន្ធ៤៦%ទៅលើទំនិញវៀតណាម។ ជីឌីភីរបស់វៀតណាមនៅត្រីមាសទី១ឆ្នាំនេះមានកំណើន៦,៩៣% មានន័យថាតិចជាងត្រីមាសទី៤ឆ្នាំ២០២៤ (ដើមខែតុលា-ចុងខែធ្នូ) ដែលមានកំណើន៧,៥៥%។ នេះបើតាមរបាយការណ៍របស់ការិយាល័យជាតិស្ថិតិដែលផ្សព្វផ្សាយនៅថ្ងៃអាទិត្យ។
វិស័យនាំចេញ និងការវិនិយោគផ្ទាល់ពីបរទេស (FDI) ជាកម្លាំងចលករដ៏សំខាន់ជាងគេរបស់វៀតណាមក្នុងការជំរុញកំណើនសេដ្ឋកិច្ចជាតិ។ ប៉ុន្តែវិស័យទាំងនេះកំពុងរងសម្ពាធខ្លាំងបន្ទាប់ពីលោកត្រាំប្រកាសពន្ធ៤៦%ទៅលើទំនិញនាំចូលពីវៀតណាម។ នៅត្រីមាសទីមួយដដែលនេះ បរិមាណផលិតនៅក្នុងវិស័យឧស្សាហកម្មកើន៧,៨%បើប្រៀបធៀបជាមួយរយៈពេលដូចគ្នាកាលពីឆ្នាំមុន។ អត្រានេះថយចុះខ្លាំងបើប្រៀបធៀបជាមួយត្រីមាសទី៤ឆ្នាំ២០២៤ដែលកើន១១,៥%។
ប៉ុន្តែអត្រានាំចេញរបស់វៀតណាមហក់ឡើងខ្ពស់នៅត្រីមាសទីមួយឆ្នាំនេះ។ ពោលគឺកើនឡើង១០,៦%បើប្រៀបធៀបនឹងត្រីមាសទី១ឆ្នាំមុន។ ក្រោយពេលលោកត្រាំយកពន្ធដ៏ខ្ពស់បែបនេះ នាយករដ្ឋមន្ត្រីវៀតណាម លោកផាំមិញជិញប្រកាសថាផែនការជំរុញកំណើនជីឌីភីឱ្យ៨%សម្រាប់ឆ្នាំ២០២៥នេះត្រូវតែកែសម្រួលឡើងវិញ។ មានន័យថាកើនឡើងតិចជាងនេះ ។
នៅក្នុងសេចក្ដីប្រកាសរបស់ខ្លួនកាលពីថ្ងៃព្រហស្បតិ៍ ក្រុមហ៊ុនជំនាញខាងស្រាវជ្រាវសេដ្ឋកិច្ចឈ្មោះប៊ីអឹមអាយ (BMI) ថ្លែងថាអត្រាពន្ធរបស់លោកត្រាំដែលដាក់ទៅលើទំនិញរបស់វៀតណាមនោះហាក់ដូចជាមានកម្រិតខ្ពស់ហួសពីការស្មានរបស់វៀតណាម។ ដូចនេះ កំណើនជីឌីភីដែលវៀតណាមព្យាករថាអាចនឹងកើន៧,៤%សម្រាប់ឆ្នាំនេះអាចនឹងថយចុះ៣%។
BMI ថ្លែងបន្តទៀតថាការយកពន្ធរបស់ត្រាំធ្វើឱ្យខូចផែនការវិនិយោគពីបរទេស និងការនាំចេញរបស់វៀតណាម។ វៀតណាមពឹងផ្អែកខ្លាំងទៅលើការនាំទំនិញទៅលក់នៅអាមេរិក។ តាមទម្លាប់រៀងរាល់ឆ្នាំ សកម្មភាពសេដ្ឋកិច្ចរបស់វៀតណាមនៅត្រីមាសទីមួយរាងយឺតយ៉ាវបន្តិចដោយសារអំឡុងពេលនេះមានពិធីបុណ្យចូលឆ្នាំថ្មីរយៈពេលមួយអាទិត្យ៕
ចែករំលែកព័តមាននេះ