ADផ្ទាំងផ្សព្វផ្សាយពាណិជ្ជកម្ម

រឿងទិញផ្ទះនៅបុរីផ្ទុះទៀតហើយ ចោទថាទិញផ្ទះអស់លុយ មិនបានផ្ទះ មិនបានប្លង់

1 ថ្ងៃ មុន

ភ្នំពេញ
០៦ ខែ មេសា ឆ្នាំ ២០២៥ ម៉ោង ១៦:៤៦

រាជធានីភ្នំពេញ ៖ ប្រជាពលរដ្ឋដែលរងគ្រោះដោយសារទិញដីនិងផ្ទះបុរីភី.ធីប្រាក់ ចាន់ធឿន ប្រមាណ២០០នាក់បាននាំគ្នាជួបប្រមូលផ្តុំដើម្បីផ្តិតមេដៃស្នើសុំទៅក្រសួងរៀបចំដែនដីនគររូបនីយកម្មនិងសំណង់ដើម្បីឲ្យជួយអន្តរាគមន៍និងដោះស្រាយបន្ទាប់ពីពួកគេទិញដីនិងផ្ទះអស់រយៈពេលប្រមាណ ជាង៥ឆ្នាំហើយពុំបានប្លង់កម្មសិទ្ធិ ហើយផ្ទះក៏ធ្វើមិនទាន់ហើយនិងលក់ជាន់ៗគ្នា។ ការជួបប្រមូលផ្ដុំតវ៉ានេះបានផ្ទុះឡើងជាថ្មីកាលពីវេលាព្រឹកថ្ងៃទី ៦ខែមេសាឆ្នាំ ២០២៥ដោយពួកគាត់បានជួបប្រមូលផ្ដុំនាំគ្នាផ្តិតមេដៃនៅសាលាឃុំឈ្វាំងនិងលើកគ្នាទៅជួបប្រមូលផ្ដុំគ្នានៅក្នុងបុរីភី.ធីប្រាក់ចាន់ធឿនឯ.កដែលស្ថិតនៅភូមិឈ្វាំងនិងភូមិព្រៃផ្ចឹក…

ការជួបប្រមូលផ្ដុំតវ៉ានេះបានផ្ទុះឡើងជាថ្មីកាលពីវេលាព្រឹកថ្ងៃទី ៦ខែមេសាឆ្នាំ ២០២៥ដោយពួកគាត់បានជួបប្រមូលផ្ដុំនាំគ្នាផ្តិតមេដៃនៅសាលាឃុំឈ្វាំងនិងលើកគ្នាទៅជួបប្រមូលផ្ដុំគ្នានៅក្នុងបុរីភី.ធីប្រាក់ចាន់ធឿនឯ.កដែលស្ថិតនៅភូមិឈ្វាំងនិងភូមិព្រៃផ្ចឹក ឃុំឈ្វាំង ស្រុកពញាឮខេត្តកណ្ដាល។

នៅក្នុងការជួបប្រមូលផ្ដុំនោះដែរក៏មានការចូលរួមពី លោកហួត ហៃអភិបាលរងស្រុកពញាឮនិងអាជ្ញាធរឃុំឈ្វាំងផងដែរ។

លោកអ៊ី រតនាតំណាងប្រជាពលរដ្ឋបានឲ្យដឹងថា ការជួបប្រមូលផ្ដុំគ្នាថ្ងៃនេះដើម្បីផ្តិតមេដៃស្នើសុំទៅក្រសួងរៀបចំដែនដីនគររូបនីកម្មនិងសំណង់ដើម្បីឲ្យជួយអន្តរាគមន៍ដោះស្រាយជាលើកទី ២ចំពោះបញ្ហាប្លង់ដី ផ្ទះ ផ្ទះលក់ត្រឡប់ជាន់ៗគ្នានិងហេដ្ឋារចនាសម្ព័ន្ធ ព្រមទាំងបញ្ហាផ្សេងៗទៀតនៅក្នុងបុរីបុរីភី.ធីប្រាក់ ចាន់ធឿននិងស្នើសុំក្រសួងរៀបចំដែនដីនគររូបនីកម្មនិងសំណង់បង្កើតគណៈកម្មការដោះស្រាយព្រោះពួកគាត់ពុំទុកចិត្តអ្នកទទួលសិទ្ធិថ្មីនោះទេ។

តំណាងប្រជាពលរដ្ឋបានឲ្យដឹងទៀតថា កាលពីកំឡុងចុងឆ្នាំ ២០១៩ប្រជាពលរដ្ឋបាននាំគ្នាទៅទិញផ្ទះនៅបុរីភី.ធីប្រាក់ចាន់ធឿនគម្រោងទី១នេះស្ថិតនៅភូមិឈ្វាំងនិងភូមិព្រៃផ្ចឹកក្នុងឃុំឈ្វាំង ស្រុកពញាឮខេត្តកណ្ដាលដោយអ្នកខ្លះបានបង់លុយឲ្យក្រុមហ៊ុនគ្រប់ចំនួនហើយក្រុមហ៊ុនពុំបានសាងសង់ផ្ទះជូនប្រជាពលរដ្ឋទៅតាមកិច្ចសន្យានោះទេ ដែលរហូតមកដល់បច្ចុប្បន្ននេះផ្ទះខ្លះសាងសង់បានប្រមាណ ៣០% ឬ ៤០% និងខ្លះទៀតសាងសង់រួចរាល់តែម្ចាស់បុរីពុំបានរៀបចំកាត់ឈ្មោះផ្ទេរកម្មសិទ្ធិទៅដល់អតិថិជនឡើយ។

មិនតែប៉ុណ្ណោះថែមទាំងយកដីនិងផ្ទះទៅលក់ជាន់ៗគ្នានឹងដាក់បញ្ចាំនៅធនាគារទៀតជាហេតុធ្វើឲ្យពួកគាត់ជាអ្នករងគ្រោះទិញផ្ទះអស់លុយមិនបានផ្ទះ មិនបានប្លង់ ហើយអ្នកខ្លះលក់ត្រឡប់ទៅវិញក៏មិនបានលុយ។

តាមប្រជាពលរដ្ឋរងគ្រោះបានឲ្យដឹងទៀតថា នៅកំឡុងឆ្នាំ២០២៣ម្ចាស់បុរីបានរំលាយស្នាក់ការចោលនិងរត់គេចខ្លួនបាត់អស់ស្រាប់តែនៅដើមឆ្នាំ ២០២៥ មានលេចមុខ លោក យ៉ូសែប លីមទទួលបានសិទ្ធិពី លោក ប្រាក់ ចាន់-ធឿន អគ្គនាយកក្រុមហ៊ុនបុរី ភីធី ប្រាក់ ចាន់ធឿន ឯ.ក (គម្រោង១) តាមរយៈលិខិតជូន ដំណឹងរបស់ក្រសួងរៀបចំដែនដី នគរូបនីយកម្ម និងសំណង់លេខ៣០៩៩ ដនស ចុះថ្ងៃទី៤ ខែធ្នូ ឆ្នាំ២០២៤ ។

លោក យ៉ូសែប លីមបានប្រកាសខ្លួនឯងថា ជាម្ចាស់បុរីភីធី ប្រាក់ ចាន់ធឿន ឯក និងបានប្តូរឈ្មោះបុរីនេះទៅជាបុរីប្រណិត សោម៉ា (Borey Pranit Sorma) ដោយមិនបានពិគ្រោះយោបល់ពីអតិថិជនរងគ្រោះ មិនបង្ហាញពីលិខិត បទដ្ឋានគតិយុត្តិពាក់ព័ន្ធនឹងបុរីនេះ ដូចជា លិខិតទទួលសិទ្ធិពីលោក ប្រាក់ ចាន់ធឿន លិខិតទទួលស្គាល់ពីធនាគារវឹងជា ម្ចាស់បំណុលបុរីភីធី ប្រាក់ ចាន់ធឿន ឯ.ក ,ច្បាប់ទទួលស្គាល់បុរីប្រណិត សោម៉ាមកជំនួសបុរី ភីធី ប្រាក់ ចាន់ធឿន ឯកជាដើម មិនតែប៉ុណ្ណោះបានដោះចោលទ្វារនៅខ្លោងទ្វារចេញចូល ប្រើសំដីគំរាមកំហែងប្តឹងអតិថិជន ចាប់អតិថិ ជនរងគ្រោះដែលខ្លួនគិតថាជាអ្នករារាំង ឬបង្កើតចលនាប្រឆាំងគាត់ គាត់បានយកផ្ទះអតិថិជនទៅធ្វើជា ការិយាល័យបុរីប្រណិត សោម៉ាដោយមិនបានទាក់ទងសុំម្ចាស់ផ្ទះជាមុនឡើយ។

ប្រជាពលរដ្ឋក៏បានឲ្យដឹងទៀតថា ពួកគាត់បានរងនូវការរំលោភទំនុកចិត្តយ៉ាងធ្ងន់ធ្ងរពីសំណាក់ម្ចាស់បុរីដូចជា បានផ្ទះប៉ុន្តែមិនទទួលបានប្លង់(ដោយប្លង់នៅធនាគារ),អតិថិជនខ្លះបានប្លង់ប៉ុន្តែមិនទទួលបានផ្ទះនៅឡើយ។និងខ្លះទៀតបានទម្លាក់លុយបន្ថែមដើម្បីដកប្លង់ពីធនាគារប៉ុន្តែមិនទទួលបានផ្ទះនៅឡើយ,និងខ្លះទៀតបានទម្លាក់លុយដកប្លង់ពីធនាគារប៉ុន្តែមិនបានប្លង់ព្រោះបុរីដកយកលុយនោះទៅបាត់,អតិថិជនខ្លះបានលក់ផ្ទះត្រឡប់ឲ្យបុរីវិញប៉ុន្តែមិនទាន់ទទួលបានប្រាក់សំណងនៅឡើយ,។រីឯអតិថិជនខ្លះទៀតត្រូវម្ចាស់បុរីលក់ផ្ទះឲ្យជាន់ជាន់គ្នាច្រើនម្ចាស់ មិនទាន់មានប្លង់និងផ្ទះនៅឡើយ។ខ្លះទៀតបានវាស់វែងជាប្រព័ន្ធប៉ុន្តែបានបាត់ទំហំដីនិងខ្លះទៀតម្ចាស់បុរីបានយកប្លង់ដែលលក់ឲ្យអតិថិជនរួចហើយទៅដាក់បញ្ចាំនៅឯធនាគារ។ចំណែកហេដ្ឋារចនាសម្ព័ន្ធបុរីទឹកភ្លើងផ្លូវនិងលូមានការខ្វះខាតពុំទាន់មាននៅឡើយខណៈពេលដែលផ្ទះត្រូវបានអតិថិជនបានទិញនិងបង់លុយអស់រួចទៅហើយ។

ប្រជាពលរដ្ឋរងគ្រោះក៏បានឯកភាពគ្នាអោយតំណាងរៀបចំចាត់ចែងផ្ដិតមេដៃដាក់ពាក្យបណ្តឹងលោក ប្រាក់ ចាន់-ធឿន អគ្គនាយកក្រុមហ៊ុនបុរី ភីធី ប្រាក់ ចាន់ធឿន ឯក (គម្រោង១) ដើម្បីចាត់ការតាមច្បាប់ផងដែរ។បុរីភីធីប្រាក់ប៊ុនធឿននេះមានផ្ទះនិងដីឡូចំនួន ៤៩៩។

ប្រជាពលរដ្ឋរងគ្រោះក៏បានទទូចស្នើសុំដល់ ឯកឧត្តមសាយ សំអាល ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដីនគររូបនីកម្មនិងសំណង់មេត្តាជួយអន្តរាគមន៍ដោះស្រាយឲ្យពួកគាត់ដោយអនុគ្រោះ។ដោយបង្កើតគណៈកម្មការចម្រុះដើម្បីគ្រប់គ្រងនិងចាត់ចែងដោះស្រាយដោយមានការចូលរួមពីប្រជាពលរដ្ឋជាអ្នករងគ្រោះនិងអាជ្ញាធរមូលដ្ឋានពួកគាត់ជាអ្នករងគ្រោះពុំទុកចិត្តអ្នកទទួលសិទ្ធិថ្មីនោះឡើយដោយសង្ស័យថាអ្នកថ្មីនោះជាតំណាងក្រុមហ៊ុនដែលរៀបចំឡើងមកបោកប្រជាពលរដ្ឋយកលុយដែលនៅសេសសល់មួយចំនួនបន្តទៀត។

ប្រជាពលរដ្ឋក៏បានស្នើឲ្យក្រសួងជួយអន្តរាគមន៍ផ្អាករាល់សកម្មភាពរបស់ឈ្មោះ យ៉ូសែប លីម ដែលបានតាំងខ្លួនជា ម្ចាស់បុរី ភីធី ប្រាក់ ចាន់ធឿនថ្មី ដែលបង្កឱ្យអតិថិជនរងគ្រោះពីការដោះស្រាយកាន់តែធ្ងន់ធ្ងរ និង ស្នើសុំលុបចោលលិខិតលេខ៣០៩៩ ដនស ចុះថ្ងៃទី៤ ខែធ្នូ ឆ្នាំ២០២៤ របស់ក្រសួងរៀបចំដែន ដី នគរូបនីយកម្ម និងសំណង់ដែលបានប្រគល់សិទ្ធិអ្នកថ្មី ។

ព័ត៌មានបន្តនឹងមានផ្សាយជូននៅលើកាសែតកោះសន្តិភាព ៕