រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញក្តីសង្ឃឹមថា ទៅថ្ងៃអនាគតកម្ពុជានឹងមានស្ពានក្រោមទឹកឆ្លងកាត់ទន្លេ ខណៈបច្ចុប្បន្នកម្ពុជាមានស្ពានលើទឹក ក្រោមដី…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញក្តីសង្ឃឹមថា ទៅថ្ងៃអនាគតកម្ពុជានឹងមានស្ពានក្រោមទឹកឆ្លងកាត់ទន្លេ ខណៈបច្ចុប្បន្នកម្ពុជាមានស្ពានលើទឹក ក្រោមដី និងនៅលើអាកាស ។
ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ ស្ពានអាកាស មរតកតេជោ នៅថ្ងៃទី៧ ខែមេសា ឆ្នាំ២០២៥ សម្តេចមហាបវរធិបតី បានបង្ហាញមហិច្ឆតាយ៉ាងធំធេងសម្រាប់បច្ចុប្បន្ន និងទៅអនាគតកាលថា សម្តេចនឹងខិតខំកសាងហេដ្ឋារចនាសម្ព័ន្ធនានា ដើម្បីបំពេញសេចក្តីត្រូវការរបស់ប្រជាពលរដ្ឋដែលកំពុងតែមានកំណើនជាបន្តបន្ទាប់ ។
សម្តេចបវរធិបតី បានសង្កត់ធ្ងន់ទៅលើការពង្រីកផ្លូវជាតិបន្ថែម ព្រមទាំងការកសាងស្ពាន ថ្មីៗទាំងស្ពានអាកាស ស្ពានក្រោមដី និងស្ពានលើទឹក ។
ជាមួយនឹងមហិច្ឆតា លើគម្រោងនៃការពង្រីកហេដ្ឋារចនាសម្ព័ន្ធនេះ សម្តេចធិបតី បានគូសបញ្ជាក់ថា «ឥឡូវកំពុងតែគិតគូរសិក្សា ថ្ងៃក្រោយខ្ញុំសង្ឃឹមថា យើងនឹងមានអាក្រោមទឹក(ស្ពានក្រោមទឹក) ឆ្លងទន្លេបន្ថែមទៀត…វាទៅចឹង ។ ឥឡូវពីអរិយក្សត្រមកខាងភ្នំពេញ យើងទៅឥឡូវជិះដសាឡាង» ។
បន្ថែមពីគម្រោងនេះដែរ សម្តេចបវរធិបតី នាយករដ្ឋមន្ត្រី ក៏បានប្តេជ្ញាកសាងស្ពានថ្មីៗបន្តទៀត ខណៈបច្ចុប្បន្នតាមផែនការ គឺស្ពានដែលគ្រោងសាងសង់ឡើងមានប្រមាណជា២ទៅ៣ទីតាំង ដូចជា ស្ពានឆ្លងកាត់ទន្លេពីតំបន់ផ្សារចាស់ទៅអរិយក្សត្រ និងស្ពានដីឥដ្ឋជាដើម ៕
ចែករំលែកព័តមាននេះ