មេដឹកនាំវៀតណាម ៖ អាមេរិកជាទីផ្សារនាំចេញដ៏ធំបំផុត ប៉ុន្តែមិនមែនជាច្រកតែមួយ
ប្រទេសវៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានលើកឡើងថា…
ប្រទេសវៀតណាម ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានលើកឡើងថា សហរដ្ឋអាមេរិក គឺជាទីផ្សារនាំចេញដ៏ធំបំផុតរបស់ប្រទេសវៀតណាម ប៉ុន្តែមិនមែនជាច្រកតែមួយ ដោយលោកបានជំរុញឱ្យបណ្តាអាជីវកម្មស្វែងរកអ្នកទិញដ៏មានសក្តានុពលនៅក្នុងប្រទេសផ្សេងទៀត។ នេះបើយោងតាមប្រភពពីសារព័ត៌មាន VnExpress ចេញផ្សាយកាលពីថ្ងៃទី៦ ខែមេសា ឆ្នាំ២០២៥។
ថ្លែងក្នុងកិច្ចប្រជុំរដ្ឋាភិបាលកាលពីថ្ងៃអាទិត្យអំពីបញ្ហាពន្ធគយ នាយករដ្ឋមន្ត្រីវៀតណាមបានមានប្រសាសន៍ថា «ទីផ្សារនាំចេញចាំបាច់ត្រូវតែរៀបចំរចនាសម្ព័ន្ធឡើងវិញ ហើយគុណភាពទំនិញត្រូវតែពង្រឹង ដើម្បីជ្រាបចូលទៅក្នុងទីផ្សារសក្តានុពលផ្សេងទៀតដូចជា មជ្ឈិមបូព៌ា អឺរ៉ុបខាងកើត អាស៊ីកណ្តាល អាមេរិកឡាទីន ឥណ្ឌា និងអាស៊ាន ដោយនេះក៏ជាឱកាសមួយក្នុងការរៀបចំរចនាសម្ព័ន្ធសេដ្ឋកិច្ចវៀតណាមឱ្យមាននិរន្តរភាពជាងមុន ដោយពឹងផ្អែកលើវិទ្យាសាស្ត្រ និងបច្ចេកវិទ្យា និងការបង្កើតថ្មី»។
ប្រទេសវៀតណាមត្រូវប្រឈមមុខនឹងអត្រាពន្ធខ្ពស់ ៤៦% របស់អាមេរិក ដែលនឹងចូលជាធរមាននៅថ្ងៃទី៩ ខែមេសា ខាងមុខនេះ។ រដ្ឋមន្ត្រីក្រសួងហិរញ្ញវត្ថុ លោក ង្វៀន វ៉ាន់ ថាំង (Nguyen Van Thang) បានព្រមានអំពីបញ្ហាប្រឈមសេដ្ឋកិច្ចសំខាន់ៗនៅពេលខាងមុខ ខណៈដែលកត្តាជំរុញកំណើនកំពុងស្ថិតក្រោមភាពតានតឹង ហើយស្ថិរភាពម៉ាក្រូសេដ្ឋកិច្ចប្រឈមនឹងហានិភ័យកាន់តែខ្លាំងឡើង។ លោកថា ពន្ធ ៤៦% អាចមានផលប៉ះពាល់យ៉ាងទូលំទូលាយលើសេដ្ឋកិច្ចវៀតណាម ដោយសារការធ្លាក់ចុះការនាំចេញទៅកាន់សហរដ្ឋអាមេរិកនឹងប៉ះពាល់ដល់ការផលិត ការវិនិយោគផ្ទាល់ពីបរទេស ការវិនិយោគឯកជន ការប្រើប្រាស់ក្នុងស្រុក និងការងារ ហើយនេះគឺជាសម្ពាធដ៏សម្បើម ដើម្បីសម្រេចបានគោលដៅកំណើនរបស់រដ្ឋាភិបាល។
ប្រទេសវៀតណាមមានបំណងចង់បានកំណើនយ៉ាងហោចណាស់ ៨% នៅឆ្នាំនេះ គឺជាគោលដៅដែលរដ្ឋាភិបាលប្រទេសនេះបានបដិសេធក្នុងការកែសម្រួល បើទោះបីជាមានសម្ពាធការប្រកួតប្រជែងផ្នែកពន្ធគយ និងពាណិជ្ជកម្មយ៉ាងណាក៏ដោយ។ ក្រសួងហិរញ្ញវត្ថុវៀតណាមបានប៉ាន់ប្រមាណថា កំណើនផលិតផលក្នុងស្រុកសរុប ឬ GDP ត្រូវមានអត្រា ៨.៣% ក្នុងរយៈពេល៩ខែចុងក្រោយនៃឆ្នាំនេះ ដើម្បីសម្រេចបាននូវគោលដៅរបស់រដ្ឋាភិបាល បន្ទាប់ពីសេដ្ឋកិច្ចបានកើនឡើង ៦.៩% ក្នុងត្រីមាសទីមួយ។
រដ្ឋាភិបាលវៀតណាមបានជំរុញឱ្យមានការពិភាក្សាទ្វេភាគីប្រកបដោយផ្លែផ្កាជាមួយនឹងអាមេរិក ដើម្បីចរចាអត្រាពន្ធដ៏សមរម្យមួយ សម្រាប់ជាប្រយោជន៍ទៅវិញទៅមក ដោយមកជាមួយនឹងក៏បានអំពាវនាវឱ្យមានការជំរុញការវិនិយោគសាធារណៈ ការវិនិយោគផ្ទាល់ពីបរទេស និងកំណើនទីផ្សារក្នុងស្រុក។ នាយករដ្ឋមន្ត្រីវៀតណាមបានអះអាងថា ពន្ធគយថ្មីរបស់សហរដ្ឋអាមេរិក និងការកើនឡើងភាពតានតឹងពាណិជ្ជកម្ម អាចបំផ្លាញពាណិជ្ជកម្មសកល និងខ្សែសង្វាក់ផ្គត់ផ្គង់ ដោយមានការឆ្លើយតបខុសៗគ្នាពីប្រទេសនានា និងការធ្លាក់ចុះទីផ្សារភាគហ៊ុន ដែលប៉ះពាល់ដល់កំណើនទូទាំងពិភពលោក៕
ចែករំលែកព័តមាននេះ