ខេត្តត្បូងឃ្មុំ ៖ ប្រជាពលរដ្ឋបានប្រទះឃើញយុវជនម្នាក់ដេកស្លាប់ក្នុងថ្លុកឈាមបង្កឲ្យមានការភ្ញាក់ផ្អើល នៅចំណុចភូមិត្រពាំងផ្លុងទី២ ឃុំត្រពាំងផ្លុងស្រុកពញាក្រែក។ ជាមួយនោះត្រូវបានកម្លាំងនគរបាលការិយាល័យបច្ចេកទេសវិទ្យាសាស្ត្រសហការជាមួយមន្ត្រីជំនាញចុះកោសល្យវិច្ច័យទើបដឹងថាជាករណីឃាតកម្ម គិតរហូតមកដល់រសៀលថ្ងៃទី៧មេសា សមត្ថកិច្ចនៅមិនទាន់បំបែកសំណុំរឿងចាប់ជនសង្ស័យណាម្នាក់បាននៅឡើយទេ។
សមត្ថកិច្ចមូលដ្ឋានបានប្រាប់ឲ្យដឹងថា ករណីឃាតកម្ម មានស្នាមរបួសត្រង់ក្បាលផ្នែកខាងឆ្វេងបណ្ដាលឲ្យស្លាប់នៅកន្លែងកើតហេតុ។ អធិការដ្ឋាននគបាលស្រុកពញាក្រែក សហការជាមួយកម្លាំងប៉ុស្តិ៍នគរបាលរដ្ឋបាលត្រពាំងផ្លុងអត្តសញ្ញាណជនល្មើស មិនទាន់ស្គាល់អត្តសញ្ញាណមួយក្រុមមានគ្នាប្រហែល៣ទៅ៤នាក់។ ចំពោះមូលហេតុនៃការស្លាប់នេះគេមិនទាន់ដឹងថាតើបណ្ដាលមកពីអ្វីពិតប្រាកដ។
សមត្ថកិច្ចមូលដ្ឋានបន្តឲ្យដឹងទៀតថាអត្តសញ្ញាណជនរងគ្រោះ ចំនួន០១នាក់មិនទាន់ស្គាល់អត្តសញ្ញាណ មានស្នាមរបួសក្បាលផ្នែកខាងឆ្វេង ស្លៀកខោខូប៊យពណ័ខៀវពាក់អាវសាច់ក្រណាត់ដៃខ្លីផ្កាពណ័ប្រផេះមានកំពស់១.៧០ម. សម្បុរស្រអែម។
តាមប្រភពដដែលបានបន្តថា នៅថ្ងៃទី០៦ ខែមីនា ឆ្នាំ២០២៥ វេលាម៉ោងប្រហែល០៦និង៥១ព្រឹក ប៉ុស្ដិ៍រដ្ឋបាលត្រពាំងផ្លុងបានទទួល ពត៌មានពីលោកមេភូមិត្រពាំងផ្លុង២ ថាមានពលរដ្ឋប្រទះឃើញសាកសព មនុស្សប្រុស១នាក់ ស្លាប់នៅលើផ្លូវលំក្រាលគ្រួល ក្រហមចំណុចស្ពានអន្លង់ផ្លុងស្ថិតនៅភូមិត្រពាំងផ្លុង២ ឃុំត្រពាំងផ្លុងស្រុកពញាក្រែកខេត្តត្បូងឃ្មុំ។
ក្រោយពីទទួលបានពត៌មាន ភ្លាមកម្លាំងនៃអធិការដ្ឋាន នគរបាលស្រុកពញាក្រែក សហការជាមួយកម្លាំងជំនាញ ការិយាល័យបច្ចេកទេសវិទ្យាសាស្ត្រ នៃស្នងការដ្ឋាននគរបាលខេត្តត្បូងឃ្មុំ និងគ្រូពេទ្យផ្នែកកោសល្យវិច័យនៃមន្ទីរពេទ្យបង្អែកស្រុកពញាក្រែក ចុះទៅដល់កន្លែងកើតហេតុធ្វើការស្រាវជ្រាវ ។
តាមប្រភពចុងក្រោយឱ្យដឹងថាអ្នករងគ្រោះដែលស្លាប់នោះឈ្មោះរៀមដាវីត ភេទប្រុស អាយុ២១ឆ្នាំ រស់នៅភូមិបឹងក្រសាល ឃុំស្នឹង ស្រុកបាណន់ខេត្តបាត់ដំបង។ ត្រូវបានសាច់ញាតិមកទទួលយកនៅយប់ថ្ងៃទី៦មេសា ទៅធ្វើបុណ្យតាមប្រពៃណីនៅស្រុកកំណើត។ ហើយករណីអំពើឃាតកម្មនេះសមត្ថកិច្ចកំពុងបន្តនីតិវិធីស្រាវជ្រាវដើម្បីវែកមុខក្រុមឃាតករមកផ្ដន្ទាទោសតាមច្បាប់ ៕
ចែករំលែកព័តមាននេះ