ទីក្រុងវ៉ាស៊ីនតោន៖ បុរសជនជាតិអាមេរិកម្នាក់រស់នៅរដ្ឋផ្លរីដាត្រូវសមត្ថកិច្ចចាប់ខ្លួនបន្ទាប់ពីគាត់ប្រើភាសាគំរាមកំហែងនៅលើបណ្ដាញសង្គមចង់ផ្ដាច់ផ្ដិលជីវិតលោកត្រាំ។ បុរសរូបនេះអាចនឹងត្រូវចោទប្រកាន់ទៅតុលាការពីបទ «គំរាមសម្លាប់មនុស្សជាលាយលក្ខណ៍អក្សរ»។ នៅអាមេរិក សមត្ថកិច្ចយកចិត្តទុកដាក់ខ្ពស់ចំពោះការនិយាយប្រមាថជីវិតលោកត្រាំ។
កាលពីពេលកន្លងមក មនុស្ស៤នាក់ហើយដែលត្រូវចាប់ខ្លួនពាក់ព័ន្ធនឹងការប៉ុនប៉ងធ្វើឃាតលោក។ ករណីប៉ុនប៉ងធ្វើឃាតដែលគួរឱ្យកត់សម្គាល់បំផុតគឺហេតុការណ៍បាញ់ប្រហារនៅរដ្ឋផឹនស៊ីលវេញ៉ា (Pennsylvania) កាលពីថ្ងៃទី១៣ ខែកក្កដា ឆ្នាំ២០២៤។ កាលនោះ ជនជាប់ចោទឈ្មោះថូម៉ាស់ មេតធូ គ្រូក (Thomas Matthew Crooks) វ័យ២០ឆ្នាំបានប្រើប្រាស់កាំភ្លើងវែងបាញ់ជាច្រើនគ្រាប់សំដៅទៅលោកត្រាំដែលកំពុងថ្លែងសុន្ទរកថាទៅកាន់ក្រុមអ្នកគាំទ្រ។
ពេលគាត់កេះកៃកាំភ្លើងនោះគឺគាត់បាញ់តម្រង់ទៅរកក្បាលលោកត្រាំ។ ប៉ុន្តែនៅអំឡុងពេលពីរឬបីវិនាទីដែលគ្រាប់កាំភ្លើងកំពុងតែហោះសំដៅទៅរកលោកត្រាំ លោកក៏ងាកឆ្វេង ងាកស្ដាំ ដូច្នេះ គ្រាប់កាំភ្លើងក៏រត់ទៅប៉ះស្លឹកត្រចៀករបស់គាត់ ហើយធ្វើឱ្យហូរឈាមរហាម។
ក្រោយមក នៅថ្ងៃទី១៣ ខែកញ្ញា ឆ្នាំ២០២៤ បុរសវ័យ៥៨ឆ្នាំឈ្មោះរ៉ាយអេន វេសស្លី រូត (Ryan Wesley Routh) អើតឡឺមៗនៅក្បែរទីលានវាយកូនគោលរបស់លោកត្រាំ។ គាត់ត្រូវភ្នាក់ងារសម្ងាត់របស់អាមេរិកចាប់ខ្លួនបានជាមួយនឹងកាំភ្លើងវែងមួយដើម។ មុនដំបូង ភ្នាក់ងារសម្ងាត់បាញ់បង្អើលឡើងលើ។ គាត់ក៏រត់ចេញពីព្រៃគុម្ពោតដើម្បីឡើងឡានរត់គេចខ្លួន។ ប៉ុន្តែត្រូវក្របួចជាប់។
ដោយឡែក បុរសឈ្មោះដឺស៊ីកូ (DeCicco) ចុងក្រោយនេះត្រូវចាប់ខ្លួនដោយមិនទាន់ចេញធ្វើសកម្មភាពអ្វីទេ។ គាត់បានបង្ហោះសារគំរាមជីវិតលោកត្រាំនៅលើហ្វេសប៊ុក។ សមត្ថកិច្ចកំពុងសហការជាមួយភ្នាក់ងារសេវាសម្ងាត់អាមេរិកដើម្បីបើកការស៊ើបអង្កេតសំណុំរឿងនេះ។ ក្រុមស៊ើបអង្កេតបានសាកសួរបុរសខាងលើនេះ ហើយក៏សម្រេចចិត្តចាប់ឃុំខ្លួនគាត់តែម្ដង។
យោងតាមច្បាប់របស់រដ្ឋផ្លរីដា ការគំរាមកំហែងធ្វើឃាតអ្នកដទៃដោយប្រកាសជាលាយលក្ខណ៍អក្សរត្រូវចាត់ចូលជាបទឧក្រិដ្ឋថ្នាក់ទី២។ បើតុលាការរកឃើញថាបុរសឈ្មោះដឺស៊ីកូរូបនេះពិតជាមានទោសកំហុសដូចការចោទប្រកាន់មែន គាត់អាចនឹងជាប់ពន្ធនាគារ១៥ឆ្នាំ។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ