ខណៈដែលភ្ញៀវទេសចរបរទេសមួយចំនួនកំពុងតែខ្លាចរអានឹងគ្រោះធម្មជាតិរញ្ជួយដី នៅទីក្រុងបាងកក ភ្ញៀវទេសចរខ្លះអាចនឹងបង្វិលគោលដៅមកកម្ពុជា ។ តាមសេចក្តីរាយការណ៍របស់សារព័ត៌មាន ឌឹណេសិន (The Nation) ភ្ញៀវទេសចរបរទេសខ្លះ ដែលបានកក់ដំណើរទស្សនៈកិច្ចថៃ…
ខណៈដែលភ្ញៀវទេសចរបរទេសមួយចំនួនកំពុងតែខ្លាចរអានឹងគ្រោះធម្មជាតិរញ្ជួយដី នៅទីក្រុងបាងកក ភ្ញៀវទេសចរខ្លះអាចនឹងបង្វិលគោលដៅមកកម្ពុជា ។
តាមសេចក្តីរាយការណ៍របស់សារព័ត៌មាន ឌឹណេសិន (The Nation) ភ្ញៀវទេសចរបរទេសខ្លះ ដែលបានកក់ដំណើរទស្សនៈកិច្ចថៃ នៅក្នុងអំឡុងកម្មវិធីសង្ក្រាន្តឆ្នាំថ្មីឆ្នាំ២០២៥ ភ្ញៀវទេសចរបរទេសមួយចំនួន បានចាប់ផ្តើមលុបចោលដំណើរកម្សាន្តរបស់ពួកគេហើយ ក្រោយពេលដែលទីក្រុងបាងកករងរលកញ័ររញ្ជួយដោយគ្រោះរញ្ជួយដីកម្រិត៧,៧ រ៉ិចទ័រ ដែលកើតនៅប្រទេសមីយ៉ាន់ម៉ា ។
ពាក់ព័ន្ធនឹងបញ្ហានេះ អ្នកវិភាគម្នាក់បានលើកឡើងថា គ្រោះធម្មជាតិ គឺជារឿងដែលពិបាកនៅក្នុងការព្យាករណ៍ ប៉ុន្តែវាបានកើតឡើងរួចទៅហើយ សម្រាប់ថៃ និងមីយ៉ាន់ម៉ា ប៉ុន្តែសម្រាប់កម្ពុជាដែលមិនមានបញ្ហា គួរតែគិតគូរ និងពង្រឹងការធ្វើទីផ្សារ ដើម្បីកម្ពុជា ។
លោកបានលើកឡើងថា កម្មវិធីដែលកម្ពុជាបានគ្រោងរៀបចំកន្លងមក វា គឺជាធនធាន និង ជាផលិតផលដែលអាចទាក់ទាញសម្រាប់អ្នកទេសចរបរទេសបាន ហើយកម្ពុជាក៏មានហេដ្ឋារចនាសម្ព័ន្ធគ្រប់គ្រាន់ដែរ សម្រាប់ផ្តល់ជូនភ្ញៀវទេសចរបរទេស ដូច្នេះគួរតែពង្រឹងការផ្សព្វផ្សាយឲ្យបានផុលផុស ។
លោកបានបន្តថា «អ្វីដែលកម្ពុជាបានត្រៀម ជាពិសេស គឺកម្មវិធីអង្គរសង្ក្រាន្ត មិនមែនចំណាយតិចតួចទេ ហើយបើអាចបង្កើនការចំណាយលើការធ្វើទីផ្សារបន្ថែមបន្តិច វាអាចជាឱកាសមួយដែរ »។
លោកបានបន្តថា ភ្ញៀវទេសចរបរទេស គឺពួកគេស្គាល់សៀមរាប ស្គាល់អង្គរ រួចហើយ តែកម្មវិធីសង្ក្រាន្តនៅសៀមរាប ពួកគេអាចចន្លោះប្រហោង ដូច្នេះបើយើងឃោសនាបន្ថែម វាអាចជាផលិតផលមួយថ្មីដែលគេដឹងថា យើងក៏មានដែរ ។
មកដល់ពេលនេះ គ្រាន់តែប្រាសាទបុរាណ ជាពិសេស គឺប្រាសាទអង្គរ ប្រាសាទបាយ័ន អង្គរធំជាដើម គឺកម្ពុជាអាចទាក់ទាញបានភ្ញៀវទេសចរបរទេស សរុបជិត ៤សែននាក់ ជាមួយនឹងកំណើនកើនឡើង១៤,៦ភាគរយ ជាមួយនឹងចំណូលទិញសំបុត្រទៅកាន់ប្រាសាទទាំងនោះបានជិត ១៩លានដុល្លារ កើនឡើងប្រមាណជា១៣,២ភាគរយ ដូច្នេះប្រសិនបើពួកគេមកពេលចូលឆ្នាំ ក្រៅពីបានលេងនៅប្រាសាទបុរាណហើយ និងភ្ញៀវទេសចរបានសប្បាយនឹងព្រឹត្តិការណ៍អង្គរសង្ក្រាន្តមួយបន្ថែមទៀត ពួកគេអាចចាប់អារម្មណ៍ច្រើនពីកម្ពុជា ។
តាមសេចក្តីរាយការណ៍របស់សាព័ត៌មានថៃខាងលើបានឲ្យដឹងបន្តថា វិស័យទេសចរណ៍របស់ថៃ កំពុងប្រឈមនឹងការធ្លាក់ចុះសក្តានុពលនៃភ្ញៀវទេសចរចិន ជាពិសេសក្នុងអំឡុងពេលពិធីបុណ្យ សង្ក្រាន្តខាងមុខនេះ ក្រោយការរញ្ជួយដីដែលធ្វើឲ្យអគារមួយកន្លែងកំពុងសាងសង់បាក់រលំ ហើយអគារជាច្រើនញ័ររញ្ជួយប្រេះស្រាំ ខូចខាតនូវរចនាសម្ព័ន្ធសំណង់ ។
ក្រុមមន្ត្រីបានរាយការណ៍ពីការកើនឡើងនៃការលុបចោលការកក់សណ្ឋាគារ និងការផ្លាស់ប្តូរគោលដៅនៃការធ្វើដំណើរ ដោយអ្នកទេសចរមួយចំនួនបានភៀសខ្លួនចេញពីទីក្រុងបាងកកទៅកាន់គោលដៅឆ្នេរដូចជាប៉ាតាយ៉ា ។
លោក ស៊ូសាវង្ស ធៀនថុង (Sorawong Thienthong )រដ្ឋមន្ត្រីក្រសួងទេសចរណ៍ និងកីឡាបានកោះប្រជុំបន្ទាន់មួយ កាលពីថ្ងៃច័ន្ទជាមួយអ្នកពាក់ព័ន្ធក្នុងឧស្សាហកម្មសំខាន់ៗ រួមទាំងក្រុមប្រឹក្សាទេសចរណ៍ថៃ និងសមាគមភ្នាក់ងារទេសចរណ៍ថៃ ដើម្បីដោះស្រាយកង្វល់ដែលកំពុងកើនឡើងនេះ ។
ប្រភពដដែលបានបន្តថា ត្រឹមរយៈពេល២ថ្ងៃក្រោយរងគ្រោះរញ្ជួយដីកក្រើកទីក្រុងបាងកក ការលុបចោលការកក់បន្ទប់សណ្ឋាគារនៅបាងកកកើតឡើងដល់ជាង១០០០ករណី ហើយអ្វីដែលរឹតតែព្រួយបារម្ភទៀតនោះ គឺសញ្ញានៃការលុបចោលជើងហោះហើរ ។
លោក អាឌិត ឆៃរ៉ាតាណានុន (Adith Chairattananon) អគ្គលេខាធិការទីភ្នាក់ងារធ្វើដំណើរថៃ បានលើកឡើងថា ការទប់ស្កាត់ការភ័យស្លន់ស្លោជាសាធារណៈបង្ហាញពីផលប៉ះពាល់ដ៏អាក្រក់នៃការជម្លៀសដោយចលាចលមកលើមុខមាត់អន្តរជាតិរបស់ប្រទេសថៃ។
លោកបានរាយការណ៍ពីការធ្លាក់ចុះ៣០ភាគរយនៃចំនួនភ្ញៀវទេសចរបរទេសដែលធ្វើដំណើរតាមប្រតិបត្តិករទេសចរណ៍ពី៨.០០០នាក់មក៦.០០០នាក់ជារៀងរាល់ថ្ងៃ។
ការព្រួយបារម្ភដ៏សំខាន់មួយ គឺសក្តានុពលនៃការមកដល់របស់ភ្ញៀវទេសចរចិនធ្លាក់ចុះ ២០% ក្នុងអំឡុងពេលកម្មវិធីសង្ក្រាន្ត បើធៀបនឹងឆ្នាំមុន ។
លោកបានបន្តថា តាមការស្ទង់មតិរបស់សមាគមបានបង្ហាញថា ៣០ភាគរយនៃអ្នកឆ្លើយតបបានបង្ហាញពីអារម្មណ៍អវិជ្ជមានអំពីការធ្វើដំណើរទៅប្រទេសថៃ ដោយលើកឡើងពីការព្រួយបារម្ភអំពីកន្លែងស្នាក់ ហើយ៦៥,៨%ថា ពួកគេរង់ចាំ ស្របពេលដែលអាជ្ញាធរទេសចរណ៍ចិនតៃវ៉ាន់បានអនុញ្ញាតឱ្យអ្នកទេសចរលុបចោលការកក់សំបុត្រដោយគ្មានការពិន័យ ៕
ចែករំលែកព័តមាននេះ