បណ្តាញសង្គមនានាតាំងពីហ្វេសបុកក្តី តេឡេក្រាមក្តី តិកតក់ក្តី គឺគេបង្កើតសម្រាប់លេង សម្រាប់ចែករំលែក សម្រាប់ផ្សព្វផ្សាយ ប៉ុន្តែសូមប្រុងប្រយ័ត្នពីព្រោះវា គឺជាបណ្តាញដែលប្រៀបបាននឹងអាវុធមុខពីរ ដែលអាចអោយផលផង និងឲ្យទោសផងដែរ…
បណ្តាញសង្គមនានាតាំងពីហ្វេសបុកក្តី តេឡេក្រាមក្តី តិកតក់ក្តី គឺគេបង្កើតសម្រាប់លេង សម្រាប់ចែករំលែក សម្រាប់ផ្សព្វផ្សាយ ប៉ុន្តែសូមប្រុងប្រយ័ត្នពីព្រោះវា គឺជាបណ្តាញដែលប្រៀបបាននឹងអាវុធមុខពីរ ដែលអាចអោយផលផង និងឲ្យទោសផងដែរ ។
កន្លងមក មានមនុស្សជាច្រើនដែលខ្លះមានទោស មានពិរុទ្ធ អស់កិត្តិយស អស់បុណ្យសក្តិ ព្រោះតែលេងបណ្តាញសង្គមនេះ ហើយទន្ទឹមនឹងនោះក៏មានអ្នកដែលទទួលបានផលពីការលេងបណ្តាញនេះ ដោយបានទាំងលុយបានទាំងកិត្តិយស បានទាំងកិត្តិនាម ។
គុណវិបត្តិដ៏ប្រត្យកដែលបានឆ្លុះបញ្ចាំងថា ការលេងបណ្តាញសង្គម គឺជាអាវុធអាចនឹងចាក់យើងនោះករណីដូចជា មន្ត្រីយោធាជាន់ខ្ពស់ឋានៈឧត្តមសេនីយត្រីម្នាក់ដែលពេលនេះកំពុងតែជាប់កុនខ្លួនឯង ពីព្រោះតែការលេងបណ្តាញសង្គមនេះឯង ។ មន្ត្រីយោធាម្នាក់នេះ ឥឡូវនេះត្រូវបានក្រសួងការពារជាតិសម្រេចបង្កើតក្រុមប្រឹក្សាវិន័យដាក់ទណ្ឌកម្មហើយ ក្រោយពេលដែលរាំដាក់កម្មវិធី តិកតក់ ខុសទំនងប៉ះពាល់ដល់តួនាទី និងស្ថាប័នរបស់ជាតិ ។
មន្ត្រីយោធារូបនេះបានបង្ហាញ អាកប្បកិរិយាមិនសមរម្យក្នុងវីដេអូដែលបង្ហោះលើបណ្តាញសង្គម ដែលបង្កឱ្យមានការរិះគន់ពីសាធារណៈជនជាច្រើនធ្វើអោយប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងឧត្តមភាពរបស់ក្រសួងការពារជាតិ និងកងយោធពលខេមរភូមិន្ទទាំងមូល ។
ក្រោយការលេង ពោលគឺក្រោយការផ្សព្វផ្សាយជាក់ស្តែងបណ្តាអ្នកលេងTikTok ជាច្រើនបានចូលទៅបញ្ចេញមតិរិះគន់បុគ្គលដែលជាមន្ត្រីយោធាពាក់ផ្កាយមួយនោះ ក្រោយពេលដែលមន្ត្រីយោធារូបនោះយកកន្លែងធ្វើការមកថតរាំទាំងពាក់អាវស៊ីវិលដាក់TikTok ដូចគ្មានញញើតនឹងវិន័យកងទ័ព ។
ពាក់ព័ន្ធនឹងករណីនេះលោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិបានសម្រេចចាត់តាំងឱ្យអង្គភាពជំនាញរៀបចំបង្កើតក្រុមប្រឹក្សាវិន័យ ក្នុងគោលបំណងធ្វើការពិនិត្យ និងវាយតម្លៃនូវរាល់ទង្វើទាំងឡាយដែលបុគ្គលខាងលើនេះ បានប្រព្រឹត្តខុសឆ្គង ដើម្បីដាក់ទណ្ឌកម្មឱ្យស្របទៅនឹងច្បាប់ស្តីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ ដើម្បីធានាការអនុវត្តឱ្យបានម៉ឺងម៉ាត់នូវបទវិន័យ ក៏ដូចជា ការរក្សាឱ្យបាននូវក្រមសីលធម៌វិជ្ជាជីវៈរបស់កងទ័ព ។
ដូចដែលបានលើកឡើងខាងលើ មនុស្សគ្រប់រូបសុទ្ធតែអាចលេងបណ្តាញសង្គមបានគ្រប់គ្នា ប៉ុន្តែដាច់ខាតយើងក៏ត្រូវតែចេះថ្លឹងថ្លែងហើយកំណត់ព្រំដែន និងពិនិត្យភាពសមរម្យនៃការលេងកម្សាន្ត ក៏ដូចជា ចែកចាយ ឬ ផ្សព្វផ្សាយនៅលើបណ្តាញសង្គម ។
នៅក្នុងករណីយើងជាពលរដ្ឋសាមញ្ញចង់លេងយ៉ាងម៉េចក៏បាន កុំអោយតែប៉ះពាល់ដល់សិទ្ធិអ្នកដទៃ ប៉ះពាល់ដល់កិត្តិយសរបស់គេ ប៉ះពាល់ដល់ច្បាប់ ទំនៀមទម្លាប់សង្គម ប៉ុន្តែនៅពេលដែលយើងក្លាយជាមន្ត្រីដែនកំណត់នៃការលេងក៏គួរតែបង្រួមបន្តិច ។ លេងអីលេងទៅ គឺក្រៅពីគោរពក្រមសីលធម៌សង្គមដែលរៀបរាប់ចេញក៏គួរតែបន្ថែម និងពិនិត្យលើសេចក្តីថ្លៃថ្នូរចំពោះកន្លែងការងារ និងតួនាទីបន្ថែមមួយកម្រិតទៀត ។ នៅពេលដែលយើងក្លាយជាបុគ្គលសាធារណៈនោះការដាក់កម្រិត និងកំណត់ព្រំដែននៃការលេងបណ្តាញសង្គម គឺគួរតែបន្ថយបន្ថែមបន្តិចទៀត ។
រាល់សកម្មភាពនៃការលេង គឺអាចលេងបាន តែនៅក្នុងលក្ខណៈនៅក្នុងក្រុម ពោល គឺនៅក្នុងដែនកំណត់មួយច្បាស់លាស់ ហើយត្រូវតែប្រុងប្រយ័ត្ននូវការលេចធ្លាយទៅទីសាធារណៈ ។ ការលេងនេះ មានលក្ខណៈនៅក្នុងគ្រួសារ នៅក្នុងក្រុមមិត្តភក្តិជិតស្និទ ។ បើនៅតាមគណនី ឬក៏ channel ដែលមានឈ្មោះមានតួនាទីត្រឹមត្រូវ ត្រូវតែប្រុងប្រយ័ត្នឲ្យមែនទែ ។
រាល់ការផ្សព្វផ្សាយការផុស គឺគួរតែជាសារមានលក្ខណៈអប់រំ លើកកម្ពស់ការយល់ដឹងការផ្តល់ព័ត៌មាន ការផ្តល់ដំណោះស្រាយ ឬការបញ្ចេញមតិនៅក្នុងន័យស្ថាបនា ពោល គឺផ្សួព្វផ្សាយនូវអ្វីដែលជាប្រយោជន៍សម្រាប់សង្គម និងជាចំណេះដឹងទូទៅ ។
សរុបទៅ អ្នកដែលលេងបណ្តាញសង្គមជោគជ័យ គឺមកពីគេសិក្សា និងកំណត់គោលដៅគេលេងច្បាស់លាស់ ហើយការដែលយើងលេងបណ្តាញសង្គមដែរមានទោស គឺយើងខ្វះការប្រុងប្រយ័ត្ន និងខ្វះការសិក្សាស្វែងយល់ពីផលប៉ះពាល់នៃការលេងវា ។ ដើម្បីបញ្ចៀសពីបញ្ហា សូមសិក្សាស្វែងយល់បន្ថែមពីបណ្តាញសង្គមទាំងនោះ ហើយការលេងក៏គួរតែកំណត់ព្រំដែន និងគោលដៅច្បាស់លាស់ដែរ មិនមែនគេបង្កើតឲ្យលេងយើងចេះតែលេងមួយទំហឹងនោះឡើយ ៕
ចែករំលែកព័តមាននេះ