ខេត្តព្រះវិហារ ៖ ទើបប្រកាសចូលកាន់មុខតំណែង បានរយៈពេលត្រឹមតែ០២ថ្ងៃ អភិបាលស្រុកឆែប លោក ឃិត សុធារ៉ា បានដាក់បទបញ្ជាដល់កម្លាំងសមត្ថកិច្ច និងមន្ត្រីជំនាញមូលដ្ឋាន…
ខេត្តព្រះវិហារ ៖ ទើបប្រកាសចូលកាន់មុខតំណែង បានរយៈពេលត្រឹមតែ០២ថ្ងៃ អភិបាលស្រុកឆែប លោក ឃិត សុធារ៉ា បានដាក់បទបញ្ជាដល់កម្លាំងសមត្ថកិច្ច និងមន្ត្រីជំនាញមូលដ្ឋាន ចុះបង្ក្រាប និងរឹបអូសឈើប្រភេទលេខ១ ជាច្រើនសន្លឹក ដែលឈ្មួញដឹកយកទៅស្តុកនៅទីតាំងមួយកន្លែង គ្មានច្បាប់អនុញ្ញាត ។
ក្រោមបទបញ្ជារបស់លោកអភិបាលស្រុកថ្មី រូបនេះ សមត្ថកិច្ចបានបើកប្រតិបត្តិការចុះបង្ក្រាបកាលពីថ្ងៃទី២ ខែមេសា ឆ្នាំ២០
២៥ ស្ថិតក្នុងភូមិម្លូព្រៃ ឃុំម្លូព្រៃមួយ ស្រុកឆែប ខេត្តព្រះវិហារ ។
តាមសេចក្តីរាយការណ៍ បានឱ្យដឹងថា នៅក្នុងប្រតិបត្តិការចុះបង្ក្រាបបទល្មើសព្រៃឈើខាងលើ កម្លាំងសមត្ថកិច្ចចម្រុះស្រុកឆែប បានដកហូតឈើសន្និធិ(ឈើគ្មានម្ចាស់) ប្រភេទលេខ១ (ឈើផ្ចឹក) ចំនួន៩៣សន្លឹក ស្មើនឹង ២,៩៧៨ (ពីរម៉ែត្រត្រីគុណ ប្រាំបួនរយចិតសិបប្រាំបី) ។
ក្រោយការបង្ក្រាប និងដកហូត ឈើទាំងនោះ ត្រូវបានដឹកជញ្ជូនតាមគោយន្តកន្ត្រៃ ២គ្រឿង យកទៅប្រគល់ជូនលោក គង់ ប៊ុនហួន នាយរងផ្នែករដ្ឋបាលព្រៃឈើឆែប ជាអ្នកទទួល និងថែរក្សាជាបណ្ដោះអាសន្ន រង់ចាំការសម្រេចពីសមត្ថកិច្ចថ្នាក់លើ ចំពោះមុខផ្នែករដ្ឋបាលព្រៃឈើឆែប និងធ្វើសេចក្ដីប្រកាសជូនដំណឹង ដើម្បីស្វែងរកម្ចាស់ឈើអារខាងលើ ចាត់ការតាមនីតិវិធី ។
សូមជម្រាបថា លោក ឃិត សុធារ៉ា ត្រូវបានប្រកាសចូលកាន់តំណែងជាអភិបាល នៃគណៈអភិបាលស្រុកឆែប ខេត្តព្រះវិហារ នៅថ្ងៃទី៣១ ខែមីនា ឆ្នាំ២០២៥ ៕
ចែករំលែកព័តមាននេះ