ពិភពលោកទាំងមូលបានរង្គោះរង្គើរ ហើយត្រៀមវិធានការឆ្លើយតបចំពោះការសម្រេចចិត្តរបស់លោកប្រធានាធិបតី ដូណាល់ ត្រាំ នៅក្នុងការដំឡើងពន្ធសឹងគ្រប់ប្រទេសក្នុងពិភពលោក ។ ទីផ្សារភាគហ៊ុនក៏ចាប់ផ្តើមធ្លាក់ចុះភ្លាមៗ តែប៉ុន្មានម៉ោងបន្ទាប់ពីលោកបានចុះហត្ថលេខាលើបទបញ្ជាដំឡើងពន្ធទំនិញ ដែលនាំចូលទីផ្សារអាមេរិក ។…
ពិភពលោកទាំងមូលបានរង្គោះរង្គើរ ហើយត្រៀមវិធានការឆ្លើយតបចំពោះការសម្រេចចិត្តរបស់លោកប្រធានាធិបតី ដូណាល់ ត្រាំ នៅក្នុងការដំឡើងពន្ធសឹងគ្រប់ប្រទេសក្នុងពិភពលោក ។
ទីផ្សារភាគហ៊ុនក៏ចាប់ផ្តើមធ្លាក់ចុះភ្លាមៗ តែប៉ុន្មានម៉ោងបន្ទាប់ពីលោកបានចុះហត្ថលេខាលើបទបញ្ជាដំឡើងពន្ធទំនិញ ដែលនាំចូលទីផ្សារអាមេរិក ។ អ្នកវិភាគនិយាយថា ការដំឡើងពន្ឋនេះនឹងមិនត្រឹមតែប៉ះពាល់ដល់ប្រជាជននៃប្រទេសជាច្រើននៅលើពិភពលោកទេ វាថែមទាំងធ្វើអោយប្រជាជនអាមេរិកកាន់តែពិបាកជីវភាពផងដែរ ដោយសារតែទំនិញនឹងអាចឡើងថ្លៃ ។

នៅក្នុងចំណោមប្រទេសដែលមានទំនាក់ទំនងពាណិជ្ជកម្មជាមួយនឹងសហរដ្ឋអាមេរិក១៨០ប្រទេស មានប្រទេសដែលមិនជាប់កំណត់ពន្ធថ្មីជាមួយនឹងមហាអំណាចនេះតែ១១ ប្រទេសប៉ុណ្ណោះ ក្រៅពីនោះជាប់ទាំងអស់ ។ សម្រាប់តំបន់អាស៊ានទាំងមូល ដែលមានសមាជិក១០ប្រទេស មានតែសិង្ហបុរីមួយទេដែលរួចខ្លួនចេញពីបញ្ជីកំណត់ពន្ធថ្មី ក្រៅពីនោះសុទ្ធតែជាប់ទាំងអស់ដោយកំណត់ពន្ធទាបបំផុតត្រឹម១៧ភាគរយរហូតដល់ទៅ៤៩ ភាគរយ ។
ការសម្រេចចិត្តរបស់លោក ប្រធានាធិបតី ដូណាល់ ត្រាំ គឺគ្មានយោគយល់ប្រទេសណាទាំងអស់ទោះជាប្រទេសនោះបានបញ្ជូនអ្នកដែលមានយុទ្ធសាស្ត្រទីផ្សារ និងពូកែបញ្ចុះបញ្ចូលក៏ដូចជា សម្របសម្រួលយ៉ាងណាក៏ដោយ ។
តាមតារាងបញ្ជីពន្ធដែលសហរដ្ឋអាមេរិកកំណត់នោះកម្ពុជា ឡាវ វៀតណាម និងមីយ៉ាន់ម៉ា គឺត្រូវជាប់កំណត់ពន្ធពី៤៤ភាគរយ ទៅដល់៤៩ ភាគរយ ។

តារាងបញ្ជីពន្ធដែលលោកត្រាំ បានប្រកាសនៅថ្ងៃទី០២ ខែមេសា ឆ្នាំ២០២៥ នៅសហរដ្ឋអាមេរិក កម្ពុជាជាប់កំណត់ពន្ធថ្មី៤៩ភាគរយ ឡាវជាប់៤៨ភាគរយ វៀតណាម៤៦ភាគរយ មីយ៉ាន់ម៉ា៤៤ភាគរយ ថៃ៣៦ភាគរយ ឥណ្ឌូនេស៊ី៣២ភាគរយ ម៉ាឡេស៊ី២៤ភាគរយ ប្រុយណេ២៤ភាគរយ ហ្វីលីពីន១៧ភាគរយ ហើយសិង្ហបុរីគឺនៅក្នុងចំណោមប្រទេស១១ ដែលសហរដ្ឋអាមេរិកកំណត់ពន្ធលើមូលដ្ឋានដដែល គឺ១០ភាគរយ ។
តាមសេចក្តីរាយការណ៍ដែលសារព័ត៌មានធំៗនៅលើពិភពលោកបានរាយការណ៍ មូលដ្ឋានចំបងដែលលោកត្រាំកំណត់ពន្ធនេះ គឺផ្អែកលើទំហំភាគរយនៃឱនភាពពាណិជ្ជកម្មរវាងសហរដ្ឋអាមេរិក និងប្រទេសដែលនាំចូលទាំងអស់ ។ ដោយនៅក្នុងនោះ កម្ពុជាមានឱនភាពពាណិជ្ជកម្មជាមួយនឹងសហរដ្ឋអាមេរិក៩៧ភាគរយ ឡាវ៩៥រយ វៀតណាម៩០ភាគរយ មីយ៉ាន់ម៉ា៨៨ភាគរយ ថៃ៧២ភាគរយ ឥណ្ឌូនេស៊ី៦៤ភាគរយ ម៉ាឡេស៊ី៤៧ភាគរយ ប្រុយណេ៤៧ភាគរយ ហើយហ្វីលីពីនគឺ៣៤ភាគរយ ។
កាលពីឆ្នាំ២០២៤ ការិយាល័យតំណាងពាណិជ្ជកម្មអាមេរិកបានឲ្យដឹងថា កម្ពុជា និងអាមេរិកមានទំហំពាណិជ្ជកម្ម១៣ពាន់លានដុល្លារ ហើយអាមេរិកមានឱនភាពពាណិជ្ជកម្ម១២,៣ពាន់លានដុល្លារ ។
ប្រភពដដែលបានបន្តថា ឡាវ និងអាមេរិក មានទំហំពាណិជ្ជកម្ម៨៤៤លានដុល្លារ រីឯឱនភាពពាណិជ្ជកម្ម គឺជិត៧៦៣លានដុល្លារ ។ វៀតណាម និងអាមេរិក មានទំហំពាណិជ្ជកម្ម១៤៩,៦ពាន់លានដុល្លារ មានឱនភាពពាណិជ្ជកម្ម១២៣,៥ពាន់លានដុល្លារ ។ មីយ៉ាន់ម៉ា និងអាមេរិក មានទំហំពាណិជ្ជកម្ម៧៣៤លានដុល្លារ ហើយឱនភាពពាណិជ្ជកម្ម គឺ៥៧៩,៣លានដុល្លារ ។
ថៃ និងអាមេរិក មានទំហំពាណិជ្ជកម្ម៨១ពាន់លានដុល្លារ ហើយឱនភាពពាណិជ្ជកម្ម៤៥,៦ពាន់លានដុល្លារ ។ ឥណ្ឌូនេស៊ី និងអាមេរិក មានទំហំពាណិជកម្ម៣៨,៣ពាន់លានដុល្លារ ហើយឱនភាពពាណិជ្ជកម្មជិត១៨ពាន់លានដុល្លារ ។
ម៉ាឡេស៊ី និងអាមេរិក មានទំហំពាណិជ្ជកម្មទំហំ៨០,២ពាន់លានដុល្លារ ហើយឱនភាពពាណិជ្ជកម្ម គឺ២៤,៨ពាន់លានដុល្លារ ។ ប្រុយណេ និងអាមេរិកមានទំហំពាណិជ្ជកម្ម៣៦៦លានដុល្លារ ហើយឱនភាពពាណិជ្ជកម្ម គឺ១១១,៦ លានដុល្លារ ។ ហ្វីលីពីន និងអាមេរិក មានទំហំពាណិជ្ជកម្មសរុប២៣,៥ពាន់លានដុល្លារ ហើយឱនភាពពាណិជ្ជកម្ម គឺមាន៤,៩ពាន់លានដុល្លារ ។
សម្រាប់សិង្ហបុរីមួយមានទំហំពាណិជ្ជកម្មជាមួយនឹងអាមេរិកសរុប៨៩,២ពាន់លានដុល្លារនៅក្នុងនោះអាមេរិកមានអតិរេកពាណិជ្ជកម្ម ២,៨ពាន់លានដុល្លារ ដូច្នេះហើយបានជាសិង្ហបុរីនៅជាប់កម្រិតពន្ធតាមមូលដ្ឋានចាស់ ៕
ចែករំលែកព័តមាននេះ