ទីផ្សារ​ភាគហ៊ុន​ចលាច.ល តម្លៃ​មាស​បន្ត​បំបែក​កំណត់​ត្រា ក្រោយ​លោក ត្រាំ ប្រកាសដំឡើ.ង​ពន្ធ​ទ្រង់ទ្រាយ​ធំ

បរទេស ៖ ទីផ្សារ​ភាគហ៊ុន​អាស៊ី និង​អនាគត​ភាគហ៊ុន​របស់​សហរដ្ឋអាមេរិក​ដាំ​ក្បាល​ចុះ នៅ​ថ្ងៃ​ទី​៣ ខែមេសា ឆ្នាំ​២០២៥ បន្ទាប់​ពី​ការ​ប្រកាស​របស់​ប្រធានាធិបតី​អា​មេ​រិ​ក លោក ដូ​ណា​ល់ ត្រាំ កាលពី​ថ្ងៃ​ទី​២ ខែមេសា អំពី​ការ​ដំឡើង​ពន្ធ​ទ្រង់ទ្រាយ​ធំ​លើ​ការ​នាំ​ចូល​ទំនិញ​ពី​ជុំវិញ​ពិភពលោក​។ នេះ​បើ​យោង​តាម​ប្រភព​ពី​ទីភ្នាក់ងារសារព័ត៌មាន AP បាន​ចេញផ្សាយ​។

ស​ន្ទ​ស្សន៍​ភាគហ៊ុន Nikkei 225 របស់​ប្រទេស​ជប៉ុន​បាន​ធ្លាក់​ចុះ​ជាង ៤% ប៉ុន្តែ​បាន​ងើបឡើង​វិញ​បន្តិច​នៅ​កម្រិត​ធ្លាក់​ចុះ ២.៩% ដ្បិត​លោក ត្រាំ កំពុង​ដាក់​ពន្ធ ២៤% លើ​ជប៉ុន​ដែល​ជា​សម្ព័ន្ធមិត្ត​ជិត​ស្និទ្ធ​បំផុត​របស់​អា​មេ​រិ​ក​។ កូរ៉េ​ខាងត្បូង​ដែល​ជា​សម្ព័ន្ធមិត្ត​អា​មេ​រិ​ក​ផង​ដែរ​នោះ ក៏​រង​ផល​ប៉ះពាល់​ដោយ​ពន្ធ ២៥% ផង​ដែរ ខណៈស​ន្ទ​ស្សន៍​ភាគហ៊ុន​គោល Kospi របស់​ប្រទេស​នេះ​ធ្លាក់​ចុះ ១.៥%​។ ស​ន្ទ​ស្សន៍​ភាគហ៊ុន Hang Seng របស់​ហុងកុង​បាន​ធ្លាក់​ចុះ ១.៤% ស្រប​ពេល​ស​ន្ទ​ស្សន៍​ភាគហ៊ុន Shanghai Composite របស់​ចិន​បាន​ធ្លាក់​ចុះ​តិច​ជាង ០.១%​។

ស​ន្ទ​ស្សន៍​ភាគហ៊ុន​អូស្ត្រាលី S&P/ASX 200 បាន​ធ្លាក់​ចុះ ១.៣%​។ ចំណែកឯ​អនាគត​ភាគហ៊ុន​អា​មេ​រិ​ក S&P 500 បាន​ធ្លាក់​ចុះ ៣% ចំ​ពេល​ស​ន្ទ​ស្សន៍​ភាគហ៊ុន Dow Jones Industrial Average បាន​បាត់បង់ ២% ដែល​ជា​ការ​ខាតបង់​ដ៏​ធំ​មួយ​នៅ​ពេល​ដែល​ទីផ្សារ​ភាគហ៊ុន​អា​មេ​រិ​ក​បើក​ឡើង​វិញ​នៅ​ថ្ងៃ​ទី​៣ ខែមេសា​។

លោក Yeap Junrong អ្នក​យុទ្ធសាស្ត្រ​ទីផ្សារ​នៅ​ក្រុមហ៊ុន​វេទិកា​ពាណិជ្ជកម្ម IG បាន​ថ្លែង​ក្នុង​ការ​អត្ថាធិប្បាយ​មួយ​ថា ការ​ប្រកាស​ពន្ធគយ​ថ្មី​នេះ​របស់​ប្រធានាធិបតី​អា​មេ​រិ​កបាន​កើត​ឡើងជា​រឿង​ភ្ញាក់ផ្អើល​យ៉ាង​ខ្លាំង ជា​ពិសេស​សម្រាប់​ប្រទេស​ចិន​ត្រូវ​បាន​វាយប្រហារ​ជាមួយ​ពន្ធ​បន្ថែម ៣៤% ដែល​នាំ​មក​នូវ​បន្ទុក​ពន្ធ​សរុប​កើនឡើង​ដល់ ៦៤%​។

យោង​តាម​ប្រភព​ពី​ទីភ្នាក់ងារសារព័ត៌មាន Reuters នៅ​ថ្ងៃ​ទី​៣ ខែមេសា ឆ្នាំ​២០២៥ បាន​រាយការណ៍​ថា ចំ​ពេល​ដែល​បណ្តា​ទីផ្សារ​ភាគហ៊ុន​សំខាន់​ៗ​កំពុង​ចលាចល ក្រឡេក​ទៅ​តម្លៃ​មាស​អន្តរជាតិ​បាន​ហក់​ឡើង​ដល់​កម្រិត​ខ្ពស់​បំផុត​លើស​ពី ៣,១៦០​ដុល្លារ​ក្នុង​១​អោន ឬ​លើស​ពី ៣,៨០៧​ដុល្លារ​ក្នុង​១​តម្លឹង មុន​ពេល​ធ្លាក់​មក​នៅ​តម្លៃ ៣,១៤៧​ដុល្លារ​ក្នុង​១​អោន ឬ ៣,៧៩០​ដុល្លារ​ក្នុង​១​តម្លឹង គិត​ត្រឹម​វេលា​ម៉ោង ១០:៤០​នាទី​ព្រឹក​ថ្ងៃ​ទី​៣ ខែមេសា​។ ចំណែកឯ​តម្លៃ​ប្រេង​ដែល​ជា​ច​លករ​សម្រាប់​កំណើន​ពិភពលោក​បាន​ធ្លាក់​ចុះ​ជាង ២% ដើម្បី​ដាក់​តម្លៃ​គោល​អនាគត​សម្រាប់​ប្រេង​ឆៅ Brent នៅ​ក្នុង​តម្លៃ ៧៣,២៤​ដុល្លារ​ក្នុង​១​បារ៉ែល​។

ប្រភព​ពី Reuters ដដែល​បាន​បន្ត​ថា ប្រាក់​យន់​ចិន​បាន​ធ្លាក់​ចុះ​ដល់​កម្រិត​ទាប​បំផុត ចាប់តាំងពី​ថ្ងៃ​ទី​១៣ ខែកុម្ភៈ ឆ្នាំ​២០២៥ នៅ​ក្នុង​ទីផ្សារ​ជាមួយ​តម្លៃ​៧.៣០៦០​យន់​ក្នុង​១​ដុល្លារ​អា​មេ​រិ​ក​។ ចំណែក​ប្រាក់​ដុល្លារ​អា​មេ​រិ​កបាន​កើនឡើង​ខ្ពស់​បើ​ធៀប​នឹង​រូបិយប័ណ្ណ​សំខាន់​ៗ​អាស៊ី លើកលែងតែ​ប្រាក់​យ៉េន​ជប៉ុន​ដែល​មាន​សុវត្ថិភាព ពោល​បាន​កើនឡើង​នៅ​ក្នុង​ជួញដូរ ១៤៨​យ៉េន​ក្នុង​១​ដុល្លារ​អា​មេ​រិ​ក​។

វិស័យ​បច្ចេកវិទ្យា​កម្រិត​ខ្ពស់​រង​ផល​ប៉ះពាល់​យ៉ាង​ខ្លាំង នៅ​ពេល​មជ្ឈមណ្ឌល​ផលិតកម្ម​នៅ​ក្នុង​ប្រទេស​ចិន និង​តៃវ៉ាន់​ប្រឈម​មុខ​នឹង​ការ​យកពន្ធ​ថ្មី​លើស​ពី ៣០% ដែល​នាំ​ឱ្យ​ពន្ធ​ថ្មី​សរុប​កើនឡើង​ដល់ ៥៤% លើ​ការ​នាំ​ចូល​ពី​ប្រទេស​ចិន​។ អនាគត​ទីផ្សារ​អេ​ឡិច​ត្រូ​និក​សកល Nasdaq បាន​ធ្លាក់​ចុះ ៣.៣% បន្ទាប់​ពី​ការ​ជួញដូរ​ប្រមាណ​៧៦០​ពាន់​លាន​ដុល្លារ​ត្រូវ​បាន​លុប​ចេញពី​តម្លៃ​ទីផ្សារ​នៃ​ក្រុមហ៊ុន​បច្ចេកវិទ្យា​ធំ​បំផុត​ទាំង ៧ លើ​ពិភពលោក Apple, Microsoft, Google, Amazon, Nvidia, Meta Platforms និង Tesla ។ ភាគហ៊ុន​ក្រុមហ៊ុន Apple រង​ផល​ប៉ះពាល់​ខ្លាំង​បំផុត ចំ​ពេល​ដែល​ក្រុមហ៊ុន​ផលិត​ទូរស័ព្ទ iPhone នៅ​ប្រទេស​ចិន​បាន​ធ្លាក់​ចុះ​ជិត ៧%​។

លោក Zhiwei Zhang ប្រធាន​សេដ្ឋវិទូ​នៅ​ក្រុមហ៊ុន Pinpoint Asset Management មាន​មូលដ្ឋាន​នៅ​ទីក្រុង​ហុងកុង​បាន​លើក​ឡើង​ថា «​ពន្ធ​ដែល​បាន​ប្រកាស​ថ្មី​ៗ​នេះ នាំ​ឱ្យ​មាន​ហានិភ័យ​យ៉ាង​ខ្លាំង​ចំពោះ​ពាណិជ្ជកម្ម​ពិភពលោក ហើយ​ខ្សែ​សង្វា​ក់​ផ្គត់ផ្គង់​នៅ​អាស៊ី​បូព៌ា​ប្រឈម​នឹង​សម្ពាធ​ជា​ពិសេស​តែ​ម្តង​»​។

លោក Tony Sycamore អ្នកវិភាគ​ទីផ្សារ​នៅ IG ក៏​បាន​លើក​ឡើង​ផង​ដែរ​ថា «​អត្រាពន្ធ​ដែល​បាន​បង្ហាញ​ថ្មី​នេះ លើស​ពី​ការ​រំពឹង​ទុកជា​មូលដ្ឋាន ហើយ​ប្រសិនបើ​គ្មាន​ការ​ចរចារ​ណាមួយ​កើតឡើង​ភ្លាម​ៗ​នោះ​ទេ ការ​រំពឹង​ទុក​សម្រាប់​ការ​ធ្លាក់​ចុះ​សេដ្ឋកិច្ច​នៅ​អា​មេ​រិ​ក​នឹង​កើនឡើង​យ៉ាង​ខ្លាំង​»៕ ប្រភព ៖ AP និង Reuters