ប្រសិនបើមិនមានការប្រែប្រួលទេនោះ កំពូលមេដឹកនាំចិន លោក ស៊ី ជីនពីងនឹងមកបំពេញទស្សនៈកិច្ចនៅកម្ពុជាជាថ្មីនៅរង្វង់ពាក់កណ្តាលខែមេសា នៅក្នុងដំណើរទស្សនៈកិច្ចបីប្រទេសមកកាន់ប្រជាជាតិនៅអាស៊ីអាគ្នេយ៍ ។ គម្រោងនៃដំណើរទស្សនៈកិច្ចនេះ ត្រូវបានបង្ហើបដោយប្រភពការទូតប្រាប់សារព័ត៌មាន The…
ប្រសិនបើមិនមានការប្រែប្រួលទេនោះ កំពូលមេដឹកនាំចិន លោក ស៊ី ជីនពីងនឹងមកបំពេញទស្សនៈកិច្ចនៅកម្ពុជាជាថ្មីនៅរង្វង់ពាក់កណ្តាលខែមេសា នៅក្នុងដំណើរទស្សនៈកិច្ចបីប្រទេសមកកាន់ប្រជាជាតិនៅអាស៊ីអាគ្នេយ៍ ។
គម្រោងនៃដំណើរទស្សនៈកិច្ចនេះ ត្រូវបានបង្ហើបដោយប្រភពការទូតប្រាប់សារព័ត៌មាន The South China Morning Post កាលពីថ្ងៃទី៣១ ខែមីនា ។
ដំណើរទស្សនកិច្ចរបស់លោកប្រធានាធិបតី ស៊ី ជីនពីង មកកម្ពុជានឹងបង្ហាញភាពស៊ីជម្រៅនៃទំនាក់ទំនងដ៏រឹងមាំរវាងប្រទេសទាំងពីរ ។ វានឹងផ្តល់ផលប្រយោជន៍ទាំងនយោបាយ សេដ្ឋកិច្ច សង្គម និងវប្បធម៌ស្រាប់កម្ពុជា ដែលប្រទេសចិនបានផ្តល់ជំនួយដ៏ច្រើនសន្ធឹកសន្ធាប់ ហើយក៏បណ្តាក់ទុនច្រើននៅកម្ពុជាផងដែរ ។
ដំណើរទស្សនកិច្ចរបស់លោកស៊ី នៅកម្ពុជានឹងស្ថិតក្នុងក្រសែភ្នែកតាមដានយ៉ាងយកចិត្តទុកដាក់របស្រ់បជាជនកម្ពុជា និងពិភពលោក ។ រហូតមកទល់ពេលនេះ មន្ត្រីកម្ពុជាមិនទាន់បង្ហើបអោយដឹងនៅឡើយទេ អំពីទស្សនកិច្ចរបស់លោក ស៊ី នៅកម្ពុជា ។
ប៉ុន្តែ តាមសេចក្តីរាយការណ៍របស់សារព័ត៌មាននេះ លោក ស៊ី អាចនឹងចេញដំណើរមកបំពេញទស្សនៈកិច្ចមកកាន់ប្រទេសវៀតណាម ដែលជាដៃគូសេដ្ឋកិច្ចដ៏ចម្បងមួយរបស់ខ្លួន ទោះជាមានអរិយភាព និងភាពតានតឹងការទូតពាក់ព័ន្ធនឹងសមុទ្រចិនខាងត្បូងដែលកំពុងតែអូសបន្លាយដល់បច្ចុប្បន្នក៏ដោយ ។ បន្ទាប់មកលោកនឹងបន្តដំណើរមកកាន់ម៉ាឡេស៊ី ដែលជាប្រធានប្តូរវេនអាស៊ាន និងជាមេដឹកនាំម៉ាឡេស៊ី ដែលមានទំនោរចង់ស្តារទំនាក់ទំនង និងពង្រឹងកិច្ចសហប្រតិបត្តិការសេដ្ឋកិច្ច និងវិនិយោគទុនឡើងវិញជាមួយនឹងចិន ក្រោយមានបញ្ហាចម្រូងចម្រាស់កន្លងមក ។ លោកអាចនឹងបញ្ចប់ត្រឹមដំណើរទស្សនៈកិច្ចមកកាន់កម្ពុជាជាថ្មី ក្រោយពេលដែលលោកបានមកកម្ពុជា២ដងរួចមកហើយនោះ ។
ប្រភពដដែលបានបង្ហើបថា នៅក្នុងដំណើរមកកាន់ប្រជាជាតិទាំងបីនេះ លោកស៊ី ត្រូវបានគេរំពឹងថា នឹងសំដៅពន្លឿនកិច្ចខិតខំប្រឹងប្រែងរបស់ខ្លួនក្នុងការធ្វើឱ្យកាន់តែស៊ីជម្រៅនូវទំនាក់ទំនងក្នុងតំបន់ចំពេលមានការព្រួយបារម្ភក្នុងតំបន់អំពីគោលនយោបាយការបរទេសរបស់សហរដ្ឋអាមេរិក ក្នុងអំឡុងពេលរដ្ឋបាលលើកទីពីររបស់លោក ដូណាល់ ត្រាំ ។
ចាប់តាំងពីក្លាយជាមេដឹកនាំកំពូលរបស់ចិន នៅក្នុងរង្វង់ខែវិច្ឆិកា ឆ្នាំ២០១២ លោកស៊ី បានចាកចេញពីប្រទេសនៅក្នុងដំណើរទស្សនៈកិច្ចផ្លូវការ សរុបប្រមាណជាជាង៥០លើក ទៅកាន់ប្រទេសជាង៧០ នៅក្នុងនោះសម្រាប់កម្ពុជា គឺម្តងនៅខែតុលា ឆ្នាំ២០១៦ ហើយបើដូចការរំពឹងទុក សម្រាប់ដំណើរនៅពាក់កណ្តាលខែនេះ កម្ពុជាអាចទទួលស្វាគមន៍វត្តមានលោកស៊ី នៅក្នុងនាមជាប្រធានាធិបតីជាលើកទី២ ។
គួររំលឹកថា កាលពីឆ្នាំ២០០៩ នៅពេលដែលលោកនៅជាអនុប្រធានាធិបតី លោក ស៊ី ក៏ធ្លាប់បានមកបំពេញទស្សនៈកិច្ចនៅកម្ពុជាម្តងរួចហើយផងដែរ ។
បើនិយាយអំពីផលប្រយោជន៍សេដ្ឋកិច្ច និងពាណិជ្ជកម្ម ទំនាក់ទំនងរវាងកម្ពុជា និងចិនមិនធំទេ ប៉ុន្តែទោះបីជាយ៉ាងណាក៏ដោយ កម្ពុជា និងចិន គឺមានផលប្រយោជន៍ផ្នែកការទូត និងមនោសញ្ចេតនាខាងនយោបាយនឹងគ្នាជាយូរយារណាស់មកហើយ ។ ចំណងមិត្តភាព និងភាពរាប់អានគ្នាជាប្រវត្តិសាស្ត្រនេះ បានបន្តរហូតដល់សព្វថ្ងៃរហូតដល់ប្រទេសទាំងពីរបានប្រសិទ្ធនាមហៅទំនាក់ទំនងនេះថា ជាទំនាក់ទំនងមិត្តដែកថែប ។
សម្រាប់ទំនាក់ទំនងជាមួយនឹងវៀតណាមវិញ ផលប្រយោជន៍នៃសេដ្ឋកិច្ច គឺសំខាន់ ដោយសារតែប្រទេសទាំងពីរមានទំហំពាណិជ្ជកម្មទ្វេភាគីច្រើន ។ កាលពីឆ្នាំ២០២៤ កន្លងទៅនេះ ទំហំពាណិជ្ជកម្មរវាងប្រទេសទាំងពីរមានតម្លៃប្រមាណជា ២០៥ពាន់លានដុល្លារឯណោះ ពោល គឺកើនឡើងដល់ទៅជាង៣៣ ពាន់លានដុល្លារបើធៀបនឹងឆ្នាំ២០២៣ ។ មកដល់ពេលនេះ បើនិយាយអំពីបញ្ហានយោបាយ និងការទូតទំនងជាមិនមានអ្វីប្លែកទេ ប៉ុន្តែទោះបីជាយ៉ាងណាក៏ដោយទំនាក់ទំនងរវាងប្រទេសទាំងពីរកំពុងតែបន្តល្អក់កករនឹងគ្នាដោយសារតែបញ្ហាទំនាស់ព្រំដែននៅសមុទ្រចិនខាងត្បូង ។
សម្រាប់ម៉ាឡេស៊ីវិញ ក៏ជាប្រទេសភាគីជម្លោះមួយនៅក្នុងសមុទ្រចិនខាងត្បូងដែរ ហើយរដ្ឋាភិបាលមុនក៏មានបញ្ហាអរិយភាពមួយចំនួនជាមួយនឹងចិន ប៉ុន្តែក្រោមការដឹកនាំដោយលោក អានវ៉ា អ៊ីប្រាហ៊ីម ជានាយករដ្ឋមន្ត្រី ភាពសៅហ្មងរវាងប្រទេសទាំងពីរហាក់រំសាយហើយឈានទៅប្រសើរដោយម៉ាឡេស៊ី មានបំណងជំរុញកិច្ចសហប្រតិបត្តិការសេដ្ឋកិច្ចឡើងវិញជាមួយនឹងចិន ។
ប្រភពមួយដែលបាននិយាយក្នុងលក្ខខណ្ឌមិនបញ្ចេញឈ្មោះហើយដកស្រង់ដោយប្រភពខាងលើបានបង្ហើបថា ផែនការកំពុងត្រូវបានធ្វើឡើងសម្រាប់មេដឹកនាំចិន ដើម្បីចំណាយពេលបីថ្ងៃក្នុងប្រទេសម៉ាឡេស៊ីនៅក្នុងឋានៈជាប្រធានអាស៊ាន ហើយក៏អាចនឹងធ្វើឲ្យប្រសើបន្ថែមទៀតនូវអ្វីដែលលោក អានវ៉ា បានលើកឡើងនៅក្នុងអំឡុងពេលលោកបំពេញទស្សនៈកិច្ចនៅទីក្រុងប៉េកាំងកាលពីខែវិច្ឆិកា កន្លងទៅ ។
សរុបទៅ នៅក្នុងក្រសែភ្នែកលោកស៊ី នៅពេលនេះ ប្រជាជាតិនៅតំបន់អាស៊ីគ្នេយ៍ គឺអាចជាស្នូលនៃគោលនយោបាយការបរទេសមួយរបស់ចិន ដោយសារតែដំណើរទស្សនកិច្ចនៅខែមេសា នេះជា ដំណើរទស្សនកិច្ចក្រៅប្រទេសលើកដំបូងរបស់លោក ស៊ី ក្នុងឆ្នាំ២០២៥ ។
នៅក្នុងអំឡុពេលនេះ ប្រទេសចិនកំពុងព្យាយាមស្អំ និងពូនជ្រុំក៏ដូចជា ជំរុញឱ្យមានទំនាក់ទំនងកាន់តែរឹងមាំជាមួយប្រទេសជិតខាង ខណៈដែលខ្លួនកំពុងស្វែងរកការបង្ហាញខ្លួនឯងថា ជាដៃគូក្នុងតំបន់ដ៏គួរឱ្យទុកចិត្ត និងមានការទទួលខុសត្រូវ ស្របពេលដែលសហរដ្ឋអាមេរិកកំពុងដាក់គំនាបពន្ធលើចិន និងប្រទេសនានា ហើយក៏ស្របពេលដែលអាស៊ានកំពុងព្រួយបារម្ភនឹងបញ្ហាសំពាធពន្ធដែលលោកត្រាំ គ្រោងចេញមកតំបន់នេះផងដែរដោយសារតែប្រជាជាតិអាស៊ានជាច្រើនមានអតិរេកពាណិជ្ជកម្មជាមួយនឹងសហរដ្ឋអាមេរិកដ៏ច្រើនសន្ធឹកសន្ធាប់ ៕
ចែករំលែកព័តមាននេះ