ទីក្រុងរ៉ង់ហ្គូន៖ ថ្ងៃនេះ របបសឹកភូមារបស់លោកមីនអុងឡាំងប្រកាសកាន់មរណទុក្ខរយៈពេលមួយសប្ដាហ៍ដើម្បីគោរពវិញ្ញាណក្ខន្ធជនរងគ្រោះទាំងអស់ដែលបានស្លាប់នៅក្នុងហេតុការណ៍រញ្ជួយដីកាលពីថ្ងៃសុក្រសប្ដាហ៍មុន។ ការប្រកាសនេះធ្វើឡើងនៅលើកញ្ចក់ទូរទស្សន៍របស់រដ្ឋ។ រាល់ទង់ជាតិដែលដោតនៅតាមមន្ទីរ-ក្រសួងនានា រួមទាំងវិស័យឯកជនផងដែរនឹងត្រូវបង្ហូតចុះមកនៅត្រឹមពាក់កណ្ដាលដង។
ទូរទស្សន៍របស់រដ្ឋផ្សាយកាលពីថ្ងៃអាទិត្យថាមនុស្សយ៉ាងតិច១៧០០នាក់ត្រូវបានបញ្ជាក់ថាបានស្លាប់ហើយ។ ចំណែកកាសែតវ៉លស្ទ្រីតជើណល (Wall Street Journal) បានដកស្រង់ប្រភពពីមន្ត្រីជាន់ខ្ពស់នៃរបបសឹកភូមាមកផ្សាយថាចំនួនអ្នកស្លាប់បានកើនឡើងដល់២០២៨នាក់។
ក្រឡេកទៅមើលប្រទេសថៃដែលរងគ្រោះដោយសារការរញ្ជួយដីដែរនោះ ចំនួនអ្នកស្លាប់កើនឡើងដល់១៩នាក់គិតត្រឹមល្ងាចថ្ងៃចន្ទ។ គេគិតថាចំនួនអ្នកស្លាប់នៅថៃអាចនឹងកើនឡើងច្រើនជាងនេះដោយសារមនុស្សជាច្រើននៅបាត់ខ្លួននៅឡើយ។ គេសង្ស័យថាពួកគេអាចនឹងកប់ខ្លួននៅក្នុងគំនរបាក់បែកនៃអគារដែលបាក់រលំនៅពេលកំពុងសាងសង់។
ទីភ្នាក់ងារព័ត៌មានស៊ីនហួផ្សាយថាលោកមីនអុងឡាំងបានប្រកាសកាន់មរណទុក្ខរយៈពេលមួយសប្ដាហ៍ចាប់ពីថ្ងៃទី៣១ ខែមីនាដល់ថ្ងៃទី៦ ខែមេសាដើម្បីចូលរួមសោកស្ដាយចំពោះការបាត់បង់ទ្រព្យសម្បត្តិ និងអាយុជីវិតរបស់មនុស្សយ៉ាងច្រើនសន្ធឹកសន្ធាប់ត្រឹមតែមួយប៉ប្រិចភ្នែក។ របបសឹកថ្លែងថាក្រៅពីអ្នកស្លាប់ខាងលើនេះនៅមានអ្នករបួស៣៤០០នាក់ និងបាត់ខ្លួន៣០០នាក់ទៀត៕
ចែករំលែកព័តមាននេះ