ខេត្តព្រៃវែង ៖ រថយន្តវេអងដឹកដំឡូងមួយគ្រឿង ដោយ សារតែបើកលឿនខ្លាំងពេក ពេលអកស៊ើរថយន្តនៅខាងមុខ ចាប់ហ្វ្រាំងមិនស៊ី ព្យាយាមបួងចង្កូតគេច ធ្វើឲ្យក្រឡាប់រថយន្តធ្លាក់ចូលក្នុងប្រឡាយខ្ចាយដំឡូងពេញប្រឡាយ តែសំណាងល្អអ្នកបើក…
ខេត្តព្រៃវែង ៖ រថយន្តវេអងដឹកដំឡូងមួយគ្រឿង ដោយ សារតែបើកលឿនខ្លាំងពេក ពេលអកស៊ើរថយន្តនៅខាងមុខ ចាប់ហ្វ្រាំងមិនស៊ី ព្យាយាមបួងចង្កូតគេច ធ្វើឲ្យក្រឡាប់រថយន្តធ្លាក់ចូលក្នុងប្រឡាយខ្ចាយដំឡូងពេញប្រឡាយ តែសំណាងល្អអ្នកបើក បរនិងព្រូរថយន្ត ពុំមានរងរបួស។
ហេតុការណ៍គ្រោះថ្នាក់ចរាចរណ៍នេះ បានកើត ឡើងកាលពីវេលាម៉ោង4និង40នាទីព្រឹកថ្ងៃទី1 មេសា នៅលើកំណាត់ផ្លូវជាតិលេខ 8A ត្រង់ចំណុចស្ពានបូម ក្នុងភូមិចុងក្រូច ឃុំរាប ស្រុកពារាំង ខេត្តព្រៃវែង។
យោងតាមការអះអាងរបស់ប្អូនប្រុសដែលជាព្រូរថយន្តខាងលើបានបញ្ជាក់ថា រថយន្តវ៉េអងដឹកដំឡូងនេះ បើកមកពីខេត្តបាត់ដំបង គោលដៅយកទៅលក់ឲ្យឈ្មួញវៀតណាមនៅច្រកទ្វារព្រំដែនអន្តរជាតិម៉ឺនជ័យ ប៉ុន្តែពេលមកដល់កន្លែងកើតហេតុ មានរថយន្តមួយគ្រឿងផ្សេងទៀត បើកនៅខាងមុខ ក្នុងទិសដៅស្របគ្នា បានជាន់ហ្វ្រាំងឈប់ ដោយខ្លាចបុកគូទរថយន្តខាងមុខនោះ ទើបអ្នកបើកបររថយន្តវ៉េអងនេះ បួងចង្កូតគេចហើយក៏បុករះបង្គោលថ្មដែលនៅតាមបណ្ដោយផ្លូវ បាក់អស់ចំនួន 6 ដើម រួចទើបរថយន្តក្រឡាប់ធ្លាក់ពីលើផ្លូវ ចូលទៅក្នុងប្រឡាយទឹកតែម្នាក់ឯង ដោយគ្មានបង្កផលប៉ះពាល់ដល់អ្នកដំណើរណាផ្សេងទៀតនោះទេ។
ទោះជាយ៉ាងណាក៏ដោយ ក្រោយពីកើតហេតុគេឃើញសមត្ថកិច្ចនគរបាលស្រុកពារាំង បានចុះទៅដល់កន្លែងកើតហេតុ ជួយធ្វើអន្តរាគមសម្រួលចរាចរណ៍ និងបាននាំខ្លួនអ្នកបើកបររថយន្តដឹកដំឡូងយកទៅសាកសួរផងដែរ ចំណែកបង្គោលថ្មដែលត្រូវបុកបាក់ចំនួន 6 ដើមនោះ ក៏តម្រូវឲ្យម្ចាស់រថយន្តធ្វើការទូទាត់សងមកវិញផងដែរ ៕
ចែករំលែកព័តមាននេះ