សង្គ្រាមអ៉ីរ៉ង់ ៖ មុនការចរចា ជាមួយអាមេរិកនៅប៉ាគីស្ថាន អ៉ីរ៉ង់បានលើកលក្ខខណ្ឌមួយចំនួនសម្រាប់ការឈប់បាញ់គ្នាដ៏ស្ថិតស្ថេរ ដែលលក្ខខណ្ឌទាំងនោះ មានក្នុងសាររបស់មេដឹកនាំំកំពូលលោកម៉ូស្តាបាខាមេនី និងសាររបស់ប្រធានាធិបតីអ៉ីរ៉ង់ លោកម៉ាស់ស៊ូដប៉េហ្សេស្គីយ៉ាន់ ។…
សង្គ្រាមអ៉ីរ៉ង់ ៖ មុនការចរចា ជាមួយអាមេរិកនៅប៉ាគីស្ថាន អ៉ីរ៉ង់បានលើកលក្ខខណ្ឌមួយចំនួនសម្រាប់ការឈប់បាញ់គ្នាដ៏ស្ថិតស្ថេរ ដែលលក្ខខណ្ឌទាំងនោះ មានក្នុងសាររបស់មេដឹកនាំំកំពូលលោកម៉ូស្តាបាខាមេនី និងសាររបស់ប្រធានាធិបតីអ៉ីរ៉ង់ លោកម៉ាស់ស៊ូដប៉េហ្សេស្គីយ៉ាន់ ។
ប្រធានាធិបតីអ៉ីរ៉ង់អះអាងថា បទឈប់បាញ់គ្នានៅលីបង់ គឺជាលក្ខខណ្ឌសំខាន់បំផុតនៃផែនការកិច្ចព្រមព្រៀងដែលស្នើឡើងដោយអាមេរិក ។ ក្នុងកិច្ចសន្ទនាតាមទូរស័ព្ទជាមួយប្រធានាធិបតីបារាំងលោកអេមម៉ាណុយអែលម៉ាក្រុង ប្រធានាធិបតីអ៉ីរ៉ង់អះអាងថា ការទទួលយកបទឈប់បាញ់របស់អ៉ីរ៉ង់ជាសញ្ញាច្បាស់មួយនៃការទទួលខុសត្រូវរបស់ខ្លួននិងឆន្ទៈពិតប្រាកដចង់ដោះស្រាយជម្លោះតាមផ្លូវការទូត ។
ប្រធានាធិបតីអ៉ីរ៉ង់ក៏ទទូចផងដែរ លើភាពចាំបាច់នៃបទឈប់បាញ់គ្នាមួយនៅលីបង់ និងរំឭកថា ការទាមទារនេះ ជាលក្ខខណ្ឌមួយក្នុងចំណោមលក្ខខណ្ឌសំខាន់នៃផែនការ១០ចំណុចរបស់អ៉ីរ៉ង់ ដែលប្រធានាធិបតីអាមេរិកលោកដូណាល់ត្រាំ ចាត់ទុកជាមូលដ្ឋានគត់មត់មួយ សម្រាប់ការចរចាជាមួយក្រុងតេហេរ៉ង់ លើសពីបទឈប់បាញ់គ្នា២សប្ដាហ៍ សម្រេចបានកាលពីយប់ថ្ងៃទី៧
មេសា។
ក្រសួងសុខាភិបាលលីបង់បានចេញតុល្យការថ្មីមួយនៃការវាយប្រហាររបស់អ៉ីស្រាអែលលើលំបង់ដ៏បង្ហូរឈាមបំផុត ពុំធ្លាប់មានតាំងពីចាប់ផ្ដើមសង្ក្រាមថ្មីនៅប្រទេសនេះ ពីដើមខែមីនាមកថា ចំនួនអ្នកស្លាប់ឡើងដល់ជាង៣០០នាក់ហើយមនុស្សយ៉ាងតិច១១៥០នាក់រងរបួសក្នុងពេលតែមួយថ្ងៃ។ ការវាយប្រហាររបស់អ៉ីស្រាអែលនោះ សំដៅលើបណ្ដាសង្កាត់ប្រជាជនរស់នៅកុះករនាកណ្ដាលក្រុងបេរូត ជាយក្រុងភាគខាងត្បូងព្រមទាំងនៅភាគខាងត្បូង និងភាគខាងកើតលិបង់។
អ៉ីស្រាអែលអះអាងថា ខ្លួនវាយប្រហារលើសមាជិកហេសប៊ុលឡាហ៍ស្និទ្ធអ៉ីរ៉ង់ច្រើនរយនាក់ ។
ម្យ៉ាងទៀត អាជ្ញាធរអ៉ីរ៉ាក់បានថ្កោលទោសការវាយប្រហារទាំងនេះដែលបង្ហាញថា អ៉ីស្រាអែលមានបំណង់បំផ្លាញបទឈប់បាញ់គ្នា រវាងសហរដ្ឋអាមេរិក និងអ៉ីរ៉ង់ ។នាយករដ្ឋមន្ត្រីអ៉ីស្រាអែលលោកបេនចាមីននេតាន់យ៉ាហ៊ូ និយាយកាលពីថ្ងៃទី៩ មេសា ថា លោកបានបញ្ជាឲ្យរដ្ឋាភិបាលលោកធ្វើការចរចាដោយផ្ទាល់ជាមួយលីបង់ ក្នុងពេលដ៏ឆាប់ខាងមុខនេះ ផ្ដោតជាពិសេស លើការរំសាយអាវុធរបស់ក្រុមហេសប៊ុលឡាហ៍ ។
សេចក្ដីថ្លែងការណ៍នោះរបស់លោកនេតាន់យ៉ាហ៊ូ ធ្វើឡើងបន្ទាប់ពីការទាក់ទងគ្នាតាមទូរស្ទ័ព្ទជាមួយប្រធានាធិបតីអាមេរិក និងបេសកជនពិសេសរបស់លោក គឹលោកSTEVE WITKOFF។ តាមបណ្ដាអ្នកទទួលខុសត្រូវអាមេរិកថា លោកSTEVE WITKOFF បានស្នើដល់លោកនេតាន់យ៉ាហ៊ូឲ្យផ្អាកការវាយប្រហារលើលីបង់ និងបើកការចរចា។ អ្នកទទួលខុសត្រូវអ៉ីស្រាអែលម្នាក់អះអាងថា ការចរចាដោយផ្ទាល់រវាងអ៉ីស្រាអែល និងលីបង់ត្រូវចាប់ផ្ដើមនាសប្ដាហ៍ខាងមុខនៅក្រុងវ៉ាស៊ីនតោន ៕
ចែករំលែកព័តមាននេះ