ទីក្រុងអ៊ីស្លាម៉ាបាដ ៖ ខណៈពេលដែលពិភពលោកកំពុងផ្តោតទៅលើទីក្រុងអ៊ីស្លាម៉ាបាដ (Islamabad) នាចុងសប្តាហ៍នេះ ជាពេលដែលប្រទេសប៉ាគីស្ថានធ្វើជាម្ចាស់ផ្ទះជំនួបការទូតដ៏សំខាន់បំផុត គឺកិច្ចចរចារវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្គ្រាមនោះ អ្វីដែលគ្រប់គ្នាកាន់តែចាប់អារម្មណ៍ខ្លាំងទៀតនោះ…
ទីក្រុងអ៊ីស្លាម៉ាបាដ ៖ ខណៈពេលដែលពិភពលោកកំពុងផ្តោតទៅលើទីក្រុងអ៊ីស្លាម៉ាបាដ (Islamabad) នាចុងសប្តាហ៍នេះ ជាពេលដែលប្រទេសប៉ាគីស្ថានធ្វើជាម្ចាស់ផ្ទះជំនួបការទូតដ៏សំខាន់បំផុត គឺកិច្ចចរចារវាងសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្គ្រាមនោះ អ្វីដែលគ្រប់គ្នាកាន់តែចាប់អារម្មណ៍ខ្លាំងទៀតនោះ គឺខែលការពារមេឃរបស់ប៉ាគីស្ថាន។ នេះបើតាមប្រភពពីសារព័ត៌មាន India Today ចេញផ្សាយនៅថ្ងៃទី១០ ខែមេសា ឆ្នាំ២០២៦។
ជាមួយកិច្ចចរចាដែលមានហានិភ័យខ្ពស់ នៅថ្ងៃទី១១ ខែមេសា ឆ្នាំ២០២៦ ប៉ាគីស្ថានហាក់ដូចជាមិនប្រថុយប្រថាននឹងរឿងនេះឡើយ ពិសេសដើម្បីធានាសុវត្ថិភាពយន្តហោះគណៈប្រតិភូអ៊ីរ៉ង់ពីគ្រោះថ្នាក់ជាយថាហេតុណាមួយនោះ កងទ័ពអាកាសប៉ាគីស្ថានបានបង្កើតប្រតិបត្តិការសន្តិភាពដ៏ធំបំផុតមួយ ដោយប្រញាប់ប្រញាល់បញ្ជូនកងយន្តហោះចម្បាំង យន្តហោះដឹកជញ្ជូន C-130 យន្តហោះចាក់ប្រេង និងយន្តហោះស៊ើបការណ៍ និងគ្រប់គ្រងដែនអាកាសកម្រិតខ្ពស់ AWACS ទៅកាន់មជ្ឈិមបូព៌ា។
ទំហំខែលការពារអាកាស ដែលត្រូវបានអ្នកជំនាញខ្លះហៅថា «អ្នកអមដំណើរដែកថែប» បានគូសបញ្ជាក់ពីសម្ពាធដ៏ធំដែលប៉ាគីស្ថានកំពុងស្ថិតក្នុងនាមជាម្ចាស់ផ្ទះជំនួបការទូតដ៏សំខាន់បំផុតក្នុងរយៈពេលប៉ុន្មានឆ្នាំចុងក្រោយនេះ។ ទីក្រុងអ៊ីស្លាម៉ាបាដប្រែក្លាយទៅជាបន្ទាយដ៏រឹងមាំ ស្របពេលប៉ាគីស្ថានបានធ្វើឱ្យប្រព័ន្ធការពារដែនអាកាសរបស់ខ្លួនសកម្មខ្លាំងនៅក្នុងដែនភាគខាងត្បូង និងខាងលិច។ រដ្ឋមន្ត្រីមហាផ្ទៃប៉ាគីស្ថាន លោក Mohsin Naqvi បានប្រាប់កាសែតនៅក្នុងស្រុក The Dawn ថា ផែនការដ៏ទូលំទូលាយមួយត្រូវបានរៀបចំឡើង ដើម្បីផ្តល់សន្តិសុខដ៏រឹងមាំបំផុតដល់ភ្ញៀវបរទេសទាំងអស់។
អនុប្រធានាធិបតីអាមេរិក លោក JD Vance ត្រូវបានរាយការណ៍កំពុងតែដឹកនាំគណៈប្រតិភូអាមេរិកធ្វើដំណើរទៅកាន់ទីក្រុងអ៊ីស្លាម៉ាបាដរួចហើយ។ ចំណែកខាងអ៊ីរ៉ង់ ការចរចាទំនងជាដឹកនាំដោយប្រធានសភា លោក Mohammad Ghalibaf និងរដ្ឋមន្ត្រីការបរទេស លោក Abbas Araghchi។ ប្រសិនបើការចរចាកើតឡើងមែន នោះវានឹងក្លាយជាជំនួបទល់មុខគ្នាកម្រិតខ្ពស់បំផុតរវាងគូប្រជែងទាំងពីរ ចាប់តាំងពីបដិវត្តន៍អ៊ិស្លាមឆ្នាំ ១៩៧៩។
ដោយសារតែកងទ័ពអាកាសអ៊ីរ៉ង់ស្ទើរតែទាំងស្រុងត្រូវបានបំផ្លាញក្នុងសង្គ្រាមនោះ ប៉ាគីស្ថានបានដាក់ពង្រាយកងយន្តហោះរបស់ខ្លួនយ៉ាងច្រើន ដើម្បីបង្កើតខែលការពារពីលើអ៊ីរ៉ង់ និងឈូងសមុទ្រពែរ្ស សម្រាប់អមដំណើរគណៈប្រតិភូប្រទេសនេះ។
ទិន្នន័យតាមដានជើងហោះហើរសកលបានបង្ហាញថា បណ្តាយន្តហោះចម្បាំងប៉ាគីស្ថាន JF-17 Thunder និង F-16 បានបង្ហាញវត្តមាននៅជិតទីក្រុងកំពង់ផែ បានដា អាបាស់ (Bandar Abbas) របស់អ៊ីរ៉ង់។ យន្តហោះទាំងនេះ នឹងអមដំណើរយន្តហោះដឹកគណៈប្រតិភូអ៊ីរ៉ង់ទៅកាន់ទីក្រុងអ៊ីស្លាម៉ាបាដ ដែលចំណាយពេលប្រហែល៣ម៉ោង។ ក្រៅពីនេះ កងទ័ពអាកាសប៉ាគីស្ថានក៏បានដាក់ពង្រាយបណ្តាយន្តហោះដឹកប្រេង IL-78 ដើម្បីរក្សាឱ្យយន្តហោះចម្បាំងហោះហើរលើអាកាសបានយូរ។
មិនត្រឹមតែប៉ុណ្ណោះ ប៉ាគីស្ថានក៏បានដាក់ពង្រាយយន្តហោះ C-130 Hercules សម្រាប់ភស្តុភារ និងការគាំទ្រ។ ក្នុងពេលជាមួយគ្នានេះ ប្រព័ន្ធព្រមាន និងគ្រប់គ្រងដែនអាកាស ឬយន្តហោះស៊ើបការ AWACS រហស្សនាមថា «គ្រាប់ភ្នែកនៅលើមេឃ» កំពុងរក្សាការឃ្លាំមើលជាបន្តបន្ទាប់លើដែនអាកាសពីប្រទេសប៉ាគីស្ថានទៅឈូងសមុទ្រពែរ្ស។
គួរឱ្យចាប់អារម្មណ៍ការដាក់ពង្រាយនេះ មិនត្រឹមតែកំណត់ចំពោះដែនអាកាសរបស់អ៊ីរ៉ង់ប៉ុណ្ណោះទេ ប៉ុន្តែយន្តហោះចម្បាំងប៉ាគីស្ថានក៏ត្រូវបានគេប្រទះឃើញនៅជិតប្រទេសអេមីរ៉ាតអារ៉ាប់រួម និងអារ៉ាប៊ីសាអូឌីត ដែលប៉ាគីស្ថានមានកិច្ចព្រមព្រៀងការពារជាតិជាយុទ្ធសាស្ត្រជាមួយផងដែរ។
ទាំងនេះ គឺជាការសម្គាល់លើការដាក់ពង្រាយកងទ័ពអាកាស ដែលមិនធ្លាប់មានពីមុនមក ហើយសម្រាប់ប៉ាគីស្ថានអត្ថន័យ គឺ ច្បាស់លាស់ និងកុំប្រថុយប្រថាន។ លោក Ishtiaq Ahmad សាស្ត្រាចារ្យសាកលវិទ្យាល័យ Quaid-e-Azam ទីក្រុងអ៊ីស្លាម៉ាបាដ បានលើកឡើងថា «ពិភពលោកទាំងមូលកំពុងតាមដានដោយអន្ទះសារ ចំពោះលទ្ធផលនៃការចរចានេះ ដោយសារអនាគតនៃតំបន់អាស្រ័យលើកិច្ចចរចានេះឯង»៕
ចែករំលែកព័តមាននេះ