ប្រទេសមីយ៉ាន់ម៉ា ៖ ការិយាល័យពាណិជ្ជកម្មរបស់វៀតណាមប្រចាំប្រទេសមីយ៉ាន់ម៉ាបានប្រកាសថា បន្ទាប់ពីគ្រោះរញ្ជួយដីកម្រិត ៧,៧រ៉ិចទ័រ នៅប្រទេសមីយ៉ាន់ម៉ា កាលពីថ្ងៃទី ២៨ ខែមីនា ឆ្នាំ២០២៥…
ប្រទេសមីយ៉ាន់ម៉ា ៖ ការិយាល័យពាណិជ្ជកម្មរបស់វៀតណាមប្រចាំប្រទេសមីយ៉ាន់ម៉ាបានប្រកាសថា បន្ទាប់ពីគ្រោះរញ្ជួយដីកម្រិត ៧,៧រ៉ិចទ័រ នៅប្រទេសមីយ៉ាន់ម៉ា កាលពីថ្ងៃទី ២៨ ខែមីនា ឆ្នាំ២០២៥ អាជីវកម្មវៀតណាមទាំងអស់ត្រូវបានរាយការណ៍ថាមានសុវត្ថិភាព ប៉ុន្តែសកម្មភាពពាណិជ្ជកម្មនឹងត្រូវប្រឈមមុខនឹងឧបសគ្គដ៏ធំ។ នេះបើតាមប្រភពពីសារព័ត៌មានវៀតណាម VietnamPlus និង Sai Gon Giai Phong ចេញផ្សាយកាលពីថ្ងៃទី៣១ ខែមីនា កន្លងទៅ។
ការរញ្ជួយដីមិនត្រឹមតែប៉ះពាល់ប្រទេសមីយ៉ាន់ម៉ាប៉ុណ្ណោះទេ ថែមទាំងបានអង្រួនទីក្រុងមួយចំនួននៅក្នុងប្រទេសវៀតណាមផងដែរ។ បើតាមការចេញផ្សាយពីទីភ្នាក់ងារសារព័ត៌មាន Reuters នៅថ្ងៃទី១ ខែមេសា ឆ្នាំ២០២៥ ដោយស្រង់របាយការណ៍ពីអាជ្ញាធរមីយ៉ាន់ម៉ាមកថា ចំនួនអ្នកស្លាប់ដោយគ្រោះរញ្ជួដីដ៏អាក្រក់នៅមីយ៉ាន់ម៉ា កើនឡើងដល់យ៉ាងតិច ២០៦៥នាក់ អ្នករបួសជាង ៣,៩០០នាក់ និងជាង ២៧០នាក់បានបាត់ខ្លួន។ ចំនួនអ្នកស្លាប់អាចនឹងកើនឡើង ខណៈដែលអាជ្ញាធរបន្តវាយតម្លៃពីទំហំនៃការខូចខាតទាំងស្រុង។
ការរញ្ជួយដីក៏បានបណ្តាលឱ្យខូចខាតហេដ្ឋារចនាសម្ព័ន្ធធំៗ និងសំខាន់ជាច្រើន ព្រមទាំងរំខានដល់ការផ្គត់ផ្គង់អគ្គិសនី និងបណ្តាញទូរគមនាគមន៍។ នៅទីក្រុងយ៉ាំងហ្គោន តំបន់មួយចំនួនគ្មានសេវាទូរស័ព្ទ ហើយអគារជាច្រើនបានរងការខូចខាតយ៉ាងធ្ងន់ធ្ងរ។ កិច្ចខិតខំប្រឹងប្រែងជួយសង្គ្រោះបន្ទាន់កំពុងដំណើរការ ប៉ុន្តែទំហំនៃការបំផ្លិចបំផ្លាញគឺធំធេងខ្លាំងណាស់។ ការរញ្ជួយនាពេលថ្មីៗនេះ គឺជាបញ្ហាប្រឈមមួយបន្ថែមទៀតនៅក្នុងចំណោមបញ្ហាជាច្រើនដែលមីយ៉ាន់ម៉ាកំពុងជួបប្រទះ ដ្បិតប្រទេសនេះកំពុងដោះស្រាយអស្ថិរភាពនយោបាយ ជម្លោះ និងជាពិសេសបញ្ហាសេដ្ឋកិច្ចដ៏ផុយស្រួយអស់រយៈពេលជាយូរណាស់មកហើយ។
លោក Nguyen Duong Kien ទីប្រឹក្សាពាណិជ្ជកម្មនៃការិយាល័យពាណិជ្ជកម្មរបស់វៀតណាមប្រចាំប្រទេសមីយ៉ាន់ម៉ាបានថ្លែងថា ការខូចខាតហេដ្ឋារចនាសម្ព័ន្ធជាច្រើនប្រាកដជានឹងបង្កើតឧបសគ្គបន្ថែមទៀតដល់ពាណិជ្ជកម្មរវាងប្រទេសទាំងពីរ។ ប្រទេសមីយ៉ាន់ម៉ាកំពុងប្រឈមនឹងវិបត្តិនយោបាយរួចទៅហើយ ដែលបានធ្វើឱ្យជាងពាក់កណ្តាលនៃតំបន់ទីប្រជុំជនចំនួន៣៣០តំបន់របស់ខ្លួនមានជម្លោះ។
ការធ្វើដំណើរឆ្លងតំបន់បានក្លាយជាការលំបាកកាន់តែខ្លាំង ដែលនាំឱ្យតម្លៃដឹកជញ្ជូនកើនឡើងខ្ពស់ និងធ្វើឱ្យប្រតិបត្តិការអាជីវកម្មកាន់តែស្មុគស្មាញខ្លាំង ខណៈអស្ថិរភាព និងជម្លោះកំពុងបន្តបាននាំទៅដល់ការបិទស្ថានីយគយជាច្រើននៅតាមបណ្តោយព្រំដែនមីយ៉ាន់ម៉ា-ចិន និងមីយ៉ាន់ម៉ា-ថៃ ដែលកាន់តែរឹតត្បិតពាណិជ្ជកម្មបន្ថែមទៀត។
សេដ្ឋកិច្ចមីយ៉ាន់ម៉ា ដែលមានភាពផុយស្រួយរួចទៅហើយ ដោយសារជម្លោះផ្ទៃ ហើយឥឡូវនេះកំពុងប្រឈមមុខនឹងវិបត្តិកាន់តែខ្លាំង។ ការខ្វះខាតថាមពលអគ្គិសនីកើតឡើងជាញឹកញាប់ ដោយតំបន់ឧស្សាហកម្មជាច្រើនមានអគ្គិសនីត្រឹមតែ៤ម៉ោងក្នុងមួយថ្ងៃប៉ុណ្ណោះ។ កង្វះការផ្គត់ផ្គង់អគ្គិសនីជាប់លាប់នេះ បានបង្ខំឱ្យអាជីវកម្មជាច្រើនពឹងផ្អែកលើម៉ាស៊ីនភ្លើងថ្លៃៗ ដែលជំរុញឱ្យតម្លៃប្រតិបត្តិការកើនឡើង។ តាមរយៈបញ្ហាប្រឈមទាំងនេះ ការស្ទុះងើបឡើងវិញនៃសេដ្ឋកិច្ចមីយ៉ាន់ម៉ាក្នុងរយៈពេលខ្លីមើលទៅហាក់ដូចជាមិនមានការកើនឡើងនោះទេ។
ពាណិជ្ជកម្មរបស់វៀតណាមជាមួយមីយ៉ាន់ម៉ាបានធ្លាក់ចុះរួចហើយ ហើយការរញ្ជួយដីត្រូវបានរំពឹងថានឹងធ្វើឱ្យបញ្ហានេះកាន់តែធ្ងន់ធ្ងរ។ នៅក្នុងឆ្នាំ ២០២៤ ទំហំពាណិជ្ជកម្មទ្វេភាគីរវាងមីយ៉ាន់ម៉ា-វៀតណាមត្រូវបានរាយការណ៍ថាមានចំនួន ៥៧៤លានដុល្លារ ធ្លាក់ចុះ ៦១% ធៀបនឹងឆ្នាំ ២០២៣។
ក្នុងរយៈពេលពីរខែដំបូងឆ្នាំ ពាណិជ្ជកម្មទ្វេភាគីមានការធ្លាក់ចុះយ៉ាងខ្លាំងរហូតដល់ ២៩% លើទំហំនៃការនាំចូល-នាំចេញសរុប ដែលមានតម្លៃត្រឹមតែ៧២លានដុល្លារប៉ុណ្ណោះ ខណៈដែលវៀតណាមបាននាំចេញផលិតផលវាយនភ័ណ្ឌ និងសម្ភារៈកាត់ដេរ ស្បែកជើង ជី ប្លាស្ទិក និងផលិតផលផ្សេងៗទៀតទៅកាន់ប្រទេសមីយ៉ាន់ម៉ា៕
ចែករំលែកព័តមាននេះ