(ជប៉ុន) ៖ អ្នកជំនាញជប៉ុនព្រមានទុកជាមុនពីភាពត្រឹមត្រូវនៃការព្យាករណ៍ដល់៨០% ស្តីពីគ្រោះរញ្ជួយដីក្រោមបាតសមុទ្រ Nankai Trough ដែលនឹងឆក់អាយុជីវិតមនុស្សខ្ទង់៣០ម៉ឺននាក់ក្នុងរយៈពេល៣០ឆ្នាំខាងមុខ ។ រដ្ឋាភិបាលជប៉ុន បានចេញផ្សាយរបាយការណ៍វាយតម្លៃគ្រោះរញ្ជួយដី…
(ជប៉ុន) ៖ អ្នកជំនាញជប៉ុនព្រមានទុកជាមុនពីភាពត្រឹមត្រូវនៃការព្យាករណ៍ដល់៨០% ស្តីពីគ្រោះរញ្ជួយដីក្រោមបាតសមុទ្រ Nankai Trough ដែលនឹងឆក់អាយុជីវិតមនុស្សខ្ទង់៣០ម៉ឺននាក់ក្នុង
រយៈពេល៣០ឆ្នាំខាងមុខ ។
រដ្ឋាភិបាលជប៉ុន បានចេញផ្សាយរបាយការណ៍វាយតម្លៃគ្រោះរញ្ជួយដី ដោយបង្ហាញពីតំបន់មួយចំនួន ដែលនឹងត្រូវទទួលរងហានិភ័យពីគ្រោះរញ្ជួយដីដ៏មហន្តរាយឈ្មោះថា Nankai Trough ដោយប៉ាន់ប្រមាណទុកជាមុនថា គ្រោះរញ្ជួយដីក្រោមបាតសមុទ្រដែលត្រូវគេចាត់ទុកថា megaquake មានឱកាសកើតមានពី៧០ ទៅ៨០ភាគរយ ជាមួយកម្លាំងញ័ររញ្ជួយចាប់ពី 8 ទៅ9រ៉ិចទ័រ បង្កជារលកយក្សស៊ូណាមិកម្ពស់៣០ម៉ែត្រ ដែលនឹងឆក់យកអាយុជីវិតពលរដ្ឋជប៉ុនខ្ទង់៣០ម៉ឺននាក់ សំណង់អគារជាង២លាននឹងត្រូវកម្ទេច រួមទាំងផលខូចខាតដល់សេដ្ឋកិច្ចខ្ទង់ ១,៨ពាន់ពាន់លានដុល្លារសហរដ្ឋអាមេរិក។ នេះបើយោងតាមការចុះផ្សាយរបស់សារព័ត៌មានជប៉ុនផ្លូវការ NHK នៅថ្ងៃទី៣១ ខែមីនា ឆ្នាំ២០២៥។
សាស្ត្រាចារ្យ Fukuwa Nobuo ប្រចាំនៅសាកលវិទ្យាល័យ Nagoya បានផ្ញើរបាយការណ៍មួយនេះទៅកាន់គណៈកម្មាការរដ្ឋាភិបាលជប៉ុន ដោយបញ្ជាក់ពីសេណារីយ៉ូដ៏អាក្រក់បំផុតនៃគ្រោះរញ្ជួយដី Nankai Trough ដែលនឹងវាយប្រហារតាមបណ្តោយឆ្នេរសមុទ្រប៉ាស៊ីហ្វិករបស់ប្រទេសជប៉ុននៅពេលយប់ក្នុងរដូវរងារនាឆ្នាំណាមួយក្នុងរយៈពេល៣០ឆ្នាំខាងមុខ ដែលអាចសម្លាប់មនុស្សរហូតដល់ 298,000នាក់ បំផ្លាញអគារចំនួន 2.35លាន រួមទាំងផ្ទះសម្បែងជាច្រើនខ្នង និងត្រូវជម្លៀសមនុស្សរាប់លាននាក់។
យ៉ាងណាក៏ដោយ របាយការណ៍ប៉ះពាល់ដែលព្យាករណ៍ថ្មីបំផុតចុងក្រោយនេះ មានទំហំតិចជាងមុនបន្តិច បើធៀបទៅនឹងការប៉ាន់ស្មានដែលបានធ្វើឡើងកាលពីជាង១០ឆ្នាំមុន។ លោក Sakai Manabu រដ្ឋមន្ត្រីគ្រប់គ្រងគ្រោះមហន្តរាយបានបង្ហាញជំនឿទំហំនៃការខូចខាតអាចកាត់បន្ថយអោយតិចជាងនេះ ដរាបណាវិធានការការពារត្រូវបានអនុវត្ត ដោយផ្អែកតាមផែនការច្បាស់លាស់ ។ លោករដ្ឋមន្ត្រីសង្កត់ធ្ងន់ថា រដ្ឋាភិបាលនឹងធ្វើអ្វីគ្រប់បែបយ៉ាងដែលខ្លួនអាចធ្វើបានដើម្បីជំរុញវិធានការទប់ស្កាត់ឱ្យមានប្រសិទ្ធភាព ។
គួរកត់សម្គាល់ថា ទោះជាការព្យាករណ៍ថា កម្រិតអតិបរមានៃការរញ្ជួយដីនឹងស្ថិតក្នុងកម្រិត៩រិចទ័រ និងរលកយក្សស៊ូណាមិ កម្ពស់៣០ម៉ែត្រក៏ពិតមែន ប៉ុន្តែរលកយក្សស៊ូណាមិ ដែលអាចទៅដល់ទីក្រុងតូក្យូ និងខេត្ត១២ផ្សេងទៀតរវាងតំបន់ Kanto និង Kyushuគឺមានកម្ពស់ខ្ទង់១០ម៉ែត្រប៉ុណ្ណោះ ខណៈដែលរលកយក្សស៊ូណាមិដែលមានកម្ពស់លើសពី ៣០ម៉ែត្រអាចវាយប្រហារផ្នែកខ្លះនៃខេត្តពីរគឺ Kochi និង Shizuoka ។
ជាមួយនឹងការព្យាករណ៍ពីចំនួនអ្នកស្លាប់រង្វង់ដល់ខ្ទង់ជិត៣០ម៉ឺននាក់បែបនេះ ជប៉ុនមិនអាចរង់ចាំស្លាប់បានឡើយ ដោយនៅពេលនេះ ក្រុមអ្នកជំនាញកំពុងសិក្សារកវិធីសាស្ត្រការពារជាជំហានៗ ដោយរៀបចំយុទ្ធសាស្ត្រជម្លៀស ការកែលម្អហេដ្ឋារចនាសម្ព័ន្ធ រួមមានទាំងការសាងសង់ជញ្ជាំងនៅតាមឆ្នេរសមុទ្រ និងការដំឡើងប៉មប្រកាសអាសន្នដើម្បីបង្កើនល្បឿនជម្លៀសខ្លួន ដែលមានន័យចំនួនអ្នកស្លាប់ពិតប្រាដកអាចនឹងមានកម្រិតទាបជាងការរំពឹងទុក ប្រសិនបើមានវិធានការបន្ថែមទៀត ៕
ចែករំលែកព័តមាននេះ