ទីក្រុងសេអ៊ូល៖ ប្រធានាធិបតីស្ដីទីកូរ៉េខាងត្បូង លោកហានដុកស៊ូ (Han Duck-soo) អំពាវនាវឲ្យប្រជាជនរក្សាភាពស្ងប់ស្ងាត់មុនពេលតុលាការធម្មនុញ្ញចេញសេចក្ដីសម្រេចនៅក្នុងសំណុំរឿងដកតំណែងលោកយូនស៊ុកយូលតាមសំណើរបស់សភា។ លោកហានយល់ថាទោះបីតុលាការសម្រេចបែបណាក៏យើងត្រូវតែទទួលយកការបែបនោះជានិច្ច។
ទន្ទឹមនឹងនោះ សមត្ថកិច្ចចាប់ផ្ដើមដាក់ពង្រាយកម្លាំងការពារជុំវិញបរិវេណតុលាការធម្មនុញ្ញព្រោះមានសញ្ញាថាអាចនឹងមានករណីហែបាតុកម្មចេញពីក្រុមអ្នកគាំទ្រលោកយូនស៊ុកយូល ឬក្រុមអ្នកប្រឆាំងនឹងលោកបើសិនការសម្រេចរបស់តុលាការផ្ទុយពីឆន្ទៈរបស់ពួកគេ។ នៅឯកិច្ចប្រជុំគណៈរដ្ឋមន្ត្រីថ្ងៃនេះ លោកហានដុកស៊ូបានស្នើសុំយ៉ាងទទូចទៅកាន់អ្នកនយោបាយទាំងឡាយសូមកុំធ្វើអត្ថាធិប្បាយ ឬនិយាយពន្យុះឱ្យមានអំពើហិង្សា។
លោកថ្លែងថារដ្ឋាភិបាលនឹងមិនអនុគ្រោះជាដាច់ខាតចំពោះការប្រព្រឹត្តអំពើខុសច្បាប់ ឬការបង្កហិង្សា។ ទោះបីតុលាការសម្រេចបែបណាក៏ដោយ ក៏យើងត្រូវតែទទួលយកការសម្រេចនោះដោយស្ងៀមស្ងាត់ដោយផ្អែកទៅលើគោលការណ៍នីតិរដ្ឋ។ បើយើងតាំងចិត្តឱ្យបានរឹងមាំ និងមានគតិបណ្ឌិតច្បាស់លាស់ យើងអាចឆ្លងកាត់វិបត្តិនៃភាពចលាចល និងជម្លោះនេះ។
តុលាការធម្មនុញ្ញនឹងសម្រេចទៅលើសំណុំរឿងលោកយូនស៊ុកយូលនៅថ្ងៃសុក្រសប្ដាហ៍នេះ។ លោកត្រូវរដ្ឋសភាបោះឆ្នោតដកតំណែងកាលពីខែធ្នូ ឆ្នាំ២០២៤។ បន្ទាប់មក សភាបានរុញសំណុំរឿងនេះទៅតុលាការធម្មនុញ្ញដើម្បីសម្រេចថាតើត្រូវទទួលយកសំណើរបស់សភាដើម្បីដកតំណែងជាស្ថាពរ? ឬក៏ត្រូវច្រានចោលសំណើនេះ ហើយផ្ដល់នីតិសម្បទាជូនលោកវិញ? បើតុលាការផ្ដល់សុពលភាពឡើងវិញមានន័យថាលោកយុនសុខយុលអាចបន្តកាន់អំណាចរហូតដល់ឆ្នាំ២០២៧។
បើតុលាការសម្រេចដកតំណែងរបស់លោកជាស្ថាពរ ពេលនោះ កូរ៉េខាងត្បូងត្រូវរៀបចំការបោះឆ្នោតជ្រើសរើសប្រធានាធិបតីថ្មីនៅក្នុងរង្វង់៦០ថ្ងៃ។ ប៉ុន្តែបើទុកជាតុលាការកាត់សេចក្ដីឱ្យលោកយុនសុខយុលឈ្នះក្ដីនៅក្នុងរឿងនេះ ក៏លោកមិនទាន់រួចខ្លួនទាំងស្រុងទេ។ លោកនៅជាប់បណ្ដឹងព្រហ្មទណ្ឌ១ទៀតពាក់ព័ន្ធនឹងទោសក្បត់ជាតិ, រំលោភអំណាច និងពុករលួយ។ ទោះជាយ៉ាងណាក្ដី គេកំពុងរង់ចាំអ៊ុតលទ្ធផលនៃការសម្រេចរបស់តុលាការធម្មនុញ្ញជាមុនសិនព្រោះការចោទប្រកាន់ដទៃទៀតអាចនឹងត្រូវទម្លាក់ចោល៕
ចែករំលែកព័តមាននេះ