សហរដ្ឋអាមេរិក ៖ The Business Roundtable ដែលជាក្រុមនៃបណ្តានាយកប្រតិបត្តiក្រុមហ៊ុនកំពូលៗរបស់សហរដ្ឋអាមេរិកបានព្រមានថា ពន្ធថ្មីទ្រង់ទ្រាយធំរបស់លោកប្រធានាធិបតី ដូណាល់ ត្រាំ អាចនឹងធ្វើឱ្យខូចខាតសេដ្ឋកិច្ចរបស់សហរដ្ឋអាមេរិក។…
សហរដ្ឋអាមេរិក ៖ The Business Roundtable ដែលជាក្រុមនៃបណ្តានាយកប្រតិបត្តiក្រុមហ៊ុនកំពូលៗរបស់សហរដ្ឋអាមេរិកបានព្រមានថា ពន្ធថ្មីទ្រង់ទ្រាយធំរបស់លោកប្រធានាធិបតី ដូណាល់ ត្រាំ អាចនឹងធ្វើឱ្យខូចខាតសេដ្ឋកិច្ចរបស់សហរដ្ឋអាមេរិក។
លោក ត្រាំ កាលពីថ្ងៃពុធបានបង្កើនភាពតានតឹងពាណិជ្ជកម្មសកល តាមរយៈការដាក់ពន្ធ ១០% លើការនាំចូលទំនិញទាំងអស់ រួមជាមួយការយកពន្ធបន្ថែមលើដៃគូពាណិជ្ជកម្មសំខាន់ៗ ដោយក្នុងនោះរួមទាំងការយកពន្ធដល់ ៤៩% លើប្រទេសកម្ពុជាផងដែរ។ តាមរយៈការផ្លាស់ប្តូរនេះ លោក Joshua Bolten នាយកប្រតិបត្តិនៃក្រុម Business Roundtable បានថ្លែងថា «ដំណើរការពន្ធសកលចាប់ពី ១០% រហូតដល់ ៥០% គឺជាហានិភ័យនៃការបង្កគ្រោះថ្នាក់ធំដល់បណ្តាក្រុមហ៊ុនផលិត កម្មករ គ្រួសារ និងអ្នកនាំចេញរបស់អាមេរិក»។
បច្ចុប្បន្ន Business Roundtable មានសមាជិកជាង២០០នាក់ ដែលសុទ្ធតែជាបណ្តានាយកប្រតិបត្តិក្រុមហ៊ុនកំពូលៗរបស់អាមេរិក ដោយក្រុមប្រឹក្សាភិបាលរបស់ក្រុមនេះ រួមមានលោក លោក Mary Barra នាយកប្រតិបត្តិក្រុមហ៊ុនផលិតរថយន្ត General Motors (GM) លោក Tim Cook នាយកប្រតិបត្តិក្រុមហ៊ុន Apple និងលោក Jamie Dimon នាយកប្រតិបត្តិក្រុមហ៊ុនសេវាកម្មហិរញ្ញវត្ថុ JPMorgan Chase។
លោក Joshua Bolten បានកត់សម្គាល់ថា ផលប៉ះពាល់សេដ្ឋកិច្ចនឹងកាន់តែអាក្រក់នៅពេលពន្ធចូលជាធរមាន ហើយអាចកាន់តែអាក្រក់ខ្លាំង ដោយសារការសងសឹកពីប្រទេសផ្សេង។ Business Roundtable កំពុងអំពាវនាវឱ្យរដ្ឋបាលលោក ត្រាំ និងដៃគូពាណិជ្ជកម្មសំខាន់ៗធ្វើការយ៉ាងលឿនឆ្ពោះទៅរកកិច្ចព្រមព្រៀងមួយ ដើម្បីឈានដល់ការដកពន្ធគយ ដែលត្រូវបានប្រកាសកាលពីពេលថ្មីៗនេះ។
ជាមួយគ្នានេះដែរ អ្នកស្រី Michelle Korsmo ប្រធាន និងជានាយកប្រតិបត្តិសមាគមភោជនីយដ្ឋានជាតិអាមេរិកបានព្រមានថា ពន្ធថ្មីនឹងជំរុញឱ្យថ្លៃម្ហូបអាហារ ភេសជ្ជៈ និងការវេចខ្ចប់កើនឡើងខ្ពស់។ អ្នកស្រីបានកត់សម្គាល់ថារឿងនេះ កើតឡើងនៅពេលដ៏លំបាកជាពិសេសសម្រាប់ឧស្សាហកម្មភោជនីយដ្ឋានរបស់អាមេរិក ដែលបានប្រឈមមុខនឹងការកើនឡើង ៤០% នៃថ្លៃម្ហូបអាហារក្នុងរយៈពេល៥ឆ្នាំកន្លងមក។
អ្នកស្រីបន្តថា ប្រតិបត្តិករភោជនីយដ្ឋានក៏មានការព្រួយបារម្ភអំពីការធានាបាននូវការផ្គត់ផ្គង់នៃគ្រឿងផ្សំស្រស់ៗដែលនាំចូលដ៏ច្រើន ព្រោះវាមិនអាចទៅរួចទេសម្រាប់កសិករ និងអ្នកចិញ្ចឹមសត្វនៅអាមេរិក ដើម្បីផលិតបរិមាណគ្រប់គ្រាន់ ដើម្បីឆ្លើយតបនឹងតម្រូវការអ្នកប្រើប្រាស់ក្នុងស្រុក។
កាលពីថ្ងៃពុធ ទីផ្សារភាគហ៊ុនពិភពលោក ជាពិសេសក្រុមហ៊ុនបច្ចេកវិទ្យាបានដាំក្បាលចុះ បន្ទាប់ពីការប្រកាសពន្ធរបស់លោក ទ្រាំ ។ ជាក់ស្តែង អនាគតទីផ្សារអេឡិចត្រូនិកសកល Nasdaq បានធ្លាក់ចុះ ៣.៣% បន្ទាប់ពីការជួញដូរប្រមាណ ៧៦០ពាន់លានដុល្លារត្រូវបានលុបចេញពីតម្លៃទីផ្សារនៃក្រុមហ៊ុនបច្ចេកវិទ្យាធំបំផុតទាំង ៧ លើពិភពលោករួមមាន Apple, Microsoft, Google, Amazon, Nvidia, Meta Platforms និង Tesla ។ ភាគហ៊ុនក្រុមហ៊ុន Apple រងផលប៉ះពាល់ខ្លាំងបំផុត ចំពេលក្រុមហ៊ុនផលិតទូរស័ព្ទ iPhone នៅប្រទេសចិនធ្លាក់ចុះជិត ៧% ឯណោះ៕ ប្រភព ៖ VnExpress, CNBC, CNN និង AP
ចែករំលែកព័តមាននេះ