រាជធានីភ្នំពេញ ៖ លោក Casey Barnett ប្រធានសភាពាណិជ្ជកម្មអាមេរិកប្រចាំនៅកម្ពុជា (AmCham Cambodia) បានលើកឡើងថា ប្រសិនបើភាគីកម្ពុជាមិនដោះស្រាយចំពោះការដំឡើងពន្ធ៤៩%…
រាជធានីភ្នំពេញ ៖ លោក Casey Barnett ប្រធានសភាពាណិជ្ជកម្មអាមេរិកប្រចាំនៅកម្ពុជា (AmCham Cambodia) បានលើកឡើងថា ប្រសិនបើភាគីកម្ពុជាមិនដោះស្រាយចំពោះការដំឡើងពន្ធ៤៩% ដែលរដ្ឋបាលលោក ដូណាល់ ត្រាំ បានដំឡើងនោះទេនឹងធ្វើឲ្យកម្ពុជាជួបវិបត្តិសេដ្ឋកិច្ចយ៉ាងធ្ងន់ធ្ងរ ដោយប្រជាពលរដ្ឋរាប់សែនបាត់បង់ការងារធ្វើ ។
ការលើកឡើងរបស់លោក នេះបន្ទាប់ពីលោកដូណាល់ ត្រាំ បានប្រកាសដំឡើងពន្ធ៤៩% សម្រាប់ទំនិញកម្ពុជា ។ លោក Casey Barnett បានលើកឡើងក្នុងបណ្តាញទំនាក់ទំនងសង្គមហ្វេសប៊ុក នាថ្ងៃទី៣ មេសាថា «ប្រសិនបើមិនបានដោះស្រាយយ៉ាងហ្មត់ចត់ ក្នុងសប្តាហ៍នេះទេនោះនឹងបំផ្លាញសេដ្ឋកិច្ចកម្ពុជា និងបង្កើតឲ្យមានវិបត្តិសេដ្ឋកិច្ចយ៉ាងជ្រៅ បាត់បង់ការងាររាប់សែននាក់ អស្ថិរភាពសង្គម និងលំហូរចេញមូលធនយ៉ាងឆាប់រហ័ស»។
លោកបានលើកឡើងថា លោក ត្រាំ បានប្រកាសដំឡើងពន្ធ៤៩% លើទំនិញកម្ពុជា ដែលនឹងចូលជាធរមាន ចាប់ពីម៉ោង១២៖០០ព្រឹក ថ្ងៃទី៩ មេសា ប្រសិនបើមិនដោះស្រាយទេវាអាចប៉ះពាល់ដល់សេដ្ឋកិច្ច ។ លោកថា នៅឆ្នាំ២០២៤ កម្ពុជាបាននាំចេញទៅសហរដ្ឋអាមេរិកចំនួន១២,៨ពាន់លានដុល្លារ ប៉ុន្តែបាននាំចូលមកវិញត្រឹមតែ៣០០លានដុល្លារប៉ុណ្ណោះ ។
សហរដ្ឋអាមេរិកបានស្នើសុំការកាត់បន្ថយពន្ធលើការនាំចេញរបស់សហរដ្ឋអាមេរិក ការសម្របសម្រួលការផ្តល់អាជ្ញាប័ណ្ណអាជីវកម្មរបស់សហរដ្ឋអាមេរិកដូចជា Starlink និងកិច្ចសហប្រតិបត្តិការសម្រាប់សន្តិសុខជាតិ ។
សូមជម្រាបថា កាលពីថ្ងៃ២ មេសា លោកត្រាំ បានប្រកាសពីការដំឡើងពន្ធទៅដល់ប្រទេស២៥ នៅទូទាំងពិភពលោក ក្នុងនោះប្រទេសនៅតំបន់នៅអាស៊ី រួមមាន ៖ កម្ពុជា៤៩% , វៀតណាម ៤៧% , មីយ៉ាន់ម៉ា៤៤% និងថៃ៣៦% ។ ចំពោះករណីនេះ គេមិនទាន់មានការបកស្រាយបំភ្លឺពីអ្នកនាំពាក្យរាជរដ្ឋាភិបាល និងភាគីពាក់ព័ន្ធយ៉ាងណានោះទេ ។
ប៉ុន្តែបើតាមលោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុត្រូវបានសារព័ត៌មានមួយស្រង់សំដីផ្សាយយ៉ាងដូច្នេះថា បច្ចុប្បន្ននេះ ក្រុមការងាររបស់ក្រសួងសេដ្ឋកិច្ច និងហិរញ្ញវត្ថុបាន និងកំពុងធ្វើការវាយតម្លៃយ៉ាងហ្មត់ចត់ចំពោះការកំណត់អត្រាពន្ធថ្មីនេះ ដើម្បីរកដំណោះស្រាយក្នុងការធានាថា សេដ្ឋកិច្ចកម្ពុជាបន្តមានភាពប្រកួតប្រជែង ។
លោកបានលើកឡើងថា «ក្រុមការងារបានពិនិត្យហើយ ពីកម្មវិបាកនៃការដំឡើងនេះ បន្ទាប់មកយើងនឹងមានវិធានការជាក់លាក់ និងហ្មត់ចត់បំផុត ដើម្បីជាដំណោះស្រាយធ្វើយ៉ាងម៉េច ឱ្យធានាឱ្យសេដ្ឋកិច្ចរបស់យើងបន្តមានភាពប្រកួតប្រជែង និងប្រសើរសម្រាប់កំណើន និងការងាររបស់ប្រជាពលរដ្ឋ» ៕
ចែករំលែកព័តមាននេះ