ព្រឹត្តិការណ៍អង្គរសង្ក្រាន្តនៅសៀមរាប សណ្ឋាគារមួយចំនួនមានការកក់បន្ទប់រហូតដល់៩៥%
- សៀមរាប
ខេត្តសៀមរាប ៖ ប្រធានមន្ទីរទេសចរណ៍ខេត្តសៀមរាប មានប្រសាសន៍នៅថ្ងៃទី៣ ខែ មេសាឆ្នាំ២០២៥ នេះថា ភ្ញៀវទេសចរជាតិ និង អន្តរជាតិ…
ខេត្តសៀមរាប ៖ ប្រធានមន្ទីរទេសចរណ៍ខេត្តសៀមរាប មានប្រសាសន៍នៅថ្ងៃទី៣ ខែ មេសាឆ្នាំ២០២៥ នេះថា ភ្ញៀវទេសចរជាតិ និង អន្តរជាតិ ដែលមាន បំណងចង់មកកម្សាន្ត នៅខេត្តសៀមរាប ក្នុងព្រឹត្តិការណ៍អង្គរសង្ក្រាន្ត នៅតែអាចរកកន្លែស្នាក់នៅបាន ទោះបីសណ្ឋាគារមួយចំនួនមានការកក់បន្ទប់ស្នាក់នៅរហូតដល់៩៥% ទៅហើយក្តី ខណៈនៅសល់តែប៉ុន្មានជា១០ថ្ងៃទៀតប៉ុណ្ណោះ ព្រឹត្តិការណ៍អង្គរសង្ក្រាន្ត អបអរសាទរពិធីបុណ្យចូលឆ្នាំប្រពៃណីជាតិខ្មែរ នឹងឈានមកដល់ ។ គេរំពឹងថា ព្រឹត្តិការណ៍អង្គរសង្គ្រាននេះនិងមានភ្ញៀវទេស ចរជាតិ និងអន្តរជាតិជាច្រើន មកកម្សាន្តធ្វើឱ្យចំណូល បានទៅដល់ប្រជាពលរដ្ឋដែលរស់នៅមូលដ្ឋានដោយផ្ទាល់ផង។
លោក ធិម សេរីវុឌ្ឍ ប្រធានស្តីទីមន្ទីរទេសចរណ៍ខេត្តសៀមរាប បានឱ្យដឹងទៀតថា រហូតមកដល់ពេលនេះ ប្រតិបត្តិករទេសចរណ៍ទាំងអស់នៅក្នុងខេត្តសៀមរាប គឺបានត្រៀមលក្ខណៈរួចរាល់ហើយសម្រាប់បម្រើឱ្យភ្ញៀវទេសចរជាតិនិងអន្តរ ជាតិ ដែលនឹងមកកម្សាន្តនៅខេត្តសៀមរាប នៅក្នុងព្រឹត្តិការណ៍អង្គរសង្ក្រាន្ត។
ជាមួយគ្នានេះសណ្ឋាគារនៅតាមបណ្តោយផ្លូវចាប់ពីស្តុបពេទ្យគន្ធបុប្ផាទៅដល់ស្ពានអតីតអាងក្រពើមានការកក់បន្ទប់ស្នាក់នៅប្រមាណ៩៥%ហើយ សណ្ឋាគារនៅតាមបណ្តោយផ្លូវជាតិលេខ៦ចាប់ពីស្តុបចុងកៅស៊ូរហូតមកដល់រង្វង់មូលជ័យវ័រ្មនទី៧ មានការកក់បន្ទប់ស្នាក់ មានប្រមាណ៨៥% ចំពោះសណ្ឋាគារដែលនៅឆ្ងាយៗពីតំបន់ទាំងនេះ មានការកក់ប្រមាណជា៦០ទៅ៦៥%។
សូមបញ្ជាក់ផងដែរថា សម្រាប់ផ្ទះ សំណាក់វិញឃើញថា ផ្ទះសំណាក់ដែលនៅតាមបណ្តោយផ្លូវជាតិលេខ៦ និង នៅតំបន់ផប់ស្ទ្រីត និងកៀកតំបន់នេះ គឺមាន ការកក់បន្ទប់ស្នាក់នៅប្រមាណជា៨៥%។
ដោយឡែកសម្រាប់ផ្ទះសំណាក់ ដែលនៅតំបន់ជាយក្រុងមានការកក់ប្រមាណជា ៦០ ទៅ៦៥%។ ដូចនេះ ភ្ញៀវទេសចរដែលមានបំណងចង់មកកម្សាន្ត នៅខេត្តសៀមរាប ក្នុងឱកាសនៃពិធីបុណ្យចូលឆ្នាំប្រពៃណីជាតិខ្មែរខាងមុននេះ ពួកគាត់តែអាចរកកន្លែងស្នាក់នៅបាន៕
ចែករំលែកព័តមាននេះ