រាជធានីភ្នំពេញ ៖ លោកអនុសេនីយ៍ឯក សាន វិចិត្រ ជាមន្ត្រីនគរបាលចរាចរណ៍នៅគោលដៅស្តុបស្ពានអាកាសផ្សារដីហុយ លូកដៃ(សង្ស័យ)យកលុយពីអ្នកបើកបររថយន្តធុនធំដឹកអុស ត្រូវបានលោកឧត្តមសេនីយ៍ឯក ជួន ណារិន្ទ…
រាជធានីភ្នំពេញ ៖ លោកអនុសេនីយ៍ឯក សាន វិចិត្រ ជាមន្ត្រីនគរបាលចរាចរណ៍នៅគោលដៅស្តុបស្ពានអាកាសផ្សារដីហុយ លូកដៃ(សង្ស័យ)យកលុយពីអ្នកបើកបររថយន្តធុនធំដឹកអុស ត្រូវបានលោកឧត្តមសេនីយ៍ឯក ជួន ណារិន្ទ បញ្ជាឱ្យកោះហៅមកសួរនាំ ។
បើតាមក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានឲ្យដឹងថា បន្ទាប់ពីមានការផ្សព្វផ្សាយព័ត៌មានតាមបណ្ដាញសង្គម ជុំវិញករណីមន្ត្រីនគរបាលចរាចរណ៍ នៅគោលដៅស្តុបស្ពានអាកាសផ្សារដីហុយ លូកដៃសង្ស័យយកលុយពីអ្នកបើកបររថយន្តធុនធំដឹកអុសនោះភ្លាម នៅរសៀលថ្ងៃទី០៣ ខែមេសា ឆ្នាំ២០២៥ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យនាយការិយាល័យនគរបាលចរាចរណ៍ផ្លូវគោក ស្រាវជ្រាវករណីនេះ ហើយអញ្ជើញមន្ត្រីនោះមកសួរនាំ នៅការិយាល័យនគរបាលចរាចរណ៍ផ្លូវគោក ។
បច្ចុប្បន្ន លោកអនុសេនីយ៍ឯក សាន វិចិត្រ មន្ត្រីគោលដៅស្តុបស្ពានអាកាសផ្សារដីហុយ ត្រូវបានមន្ត្រីជំនាញ នៃការិយាល័យនគរបាលចរាចរណ៍ផ្លូវគោក កំពុងសួរនាំ ដោយសុំគោលការណ៍ពីឧត្តមសេនីយ៍ឯក ជួន ណារិន្ទ ពិនិត្យសម្រេច ។
ប្រសិនមន្ត្រីខាងលើ រកឃើញមានកំហុសបំពេញភារកិច្ចមិនគោរពច្បាប់ និងមិនគោរពវិន័យនគរបាលជាតិ នឹងប្រឈមសម្រេចអនុវត្តវិន័យកងកម្លាំងនគរបាលជាតិ ៕
ចែករំលែកព័តមាននេះ