លោក Bill Gates សន្យាបរិច្ចាគទ្រព្យ៩៩% ដល់សកម្មភាពមនុស្សធម៌ ព្រោះមិនចង់ស្លា.ប់មានឈ្មោះជាអ្នកមាន
សហរដ្ឋអាមេរិក ៖ លោក Bill Gates សហស្ថាបនិកក្រុមហ៊ុន Microsoft បានប្រកាសកាលពីថ្ងៃទី៨ ខែឧសភា ឆ្នាំ២០២៥…
0:00
0:00
សហរដ្ឋអាមេរិក ៖ លោក Bill Gates សហស្ថាបនិកក្រុមហ៊ុន Microsoft បានប្រកាសកាលពីថ្ងៃទី៨ ខែឧសភា ឆ្នាំ២០២៥ ថា លោកមានបំណងបរិច្ចាគទ្រព្យសម្បត្តិ ៩៩% របស់លោកក្នុងរយៈពេល២០ឆ្នាំខាងមុខ ដែលគិតជាទឹកប្រាក់ប្រមាណ ២០០ពាន់លានដុល្លារអាមេរិក សម្រាប់ជួយដល់ប្រជាជនក្រីក្រនៅលើពិភពលោក។ នេះបើយោងតាមប្រភពពី CNBC, CNN និង The Guardian។
លោក Bill Gates បានបញ្ជាក់យ៉ាងច្បាស់ថា លោកនឹងពន្លឿនការបរិច្ចាគទ្រព្យសម្បត្តិស្ទើរទាំងអស់តាមរយៈមូលនិធិផ្ទាល់របស់លោក ជាមួយផែនការបញ្ចប់ប្រតិបត្តិការមូលនិធិដ៏សំខាន់នេះ នៅត្រឹមឆ្នាំ ២០៤៥។ មហាសេដ្ឋីអាមេរិកវ័យ៦៩ឆ្នាំរូបនេះ បានលើកឡើងតាមរយៈសំណេរនៅក្នុងប្លុករបស់លោកដូច្នេះថា «មនុស្សគ្រប់គ្នានឹងនិយាយរឿងជាច្រើនអំពីខ្ញុំនៅពេលខ្ញុំស្លាប់ទៅ ប៉ុន្តែខ្ញុំតាំងចិត្តមិនចង់ឮពាក្យថា គាត់បានស្លាប់ទៅក្នុងនាមជាអ្នកមានជាមួយទ្រព្យដ៏ច្រើន នឹងមិនមែនស្លាប់ដូចជាពួកគេនោះទេ»។
លោក Bill Gates បាននិយាយថា មូលនិធិដែលមានឈ្មោះរបស់លោកបានបរិច្ចាគប្រាក់ប្រមាណ ១០០ពាន់លានដុល្លាររួចហើយ ដល់គម្រោងសុខភាព និងការអភិវឌ្ឍន៍ ហើយលោករំពឹងថានឹងបរិច្ចាគ ២០០ពាន់លានដុល្លារផ្សេងទៀត ប៉ុន្តែអាស្រ័យលើទីផ្សារ និងអតិផរណាក្នុងរយៈពេល២ទសវត្សរ៍ខាងមុខ។
សហស្ថាបនិកក្រុមហ៊ុន Microsoft ដែលបច្ចុប្បន្នទ្រព្យសម្បត្តិសុទ្ធរបស់លោក ត្រូវបានរាយការណ៍ដោយ Bloomberg ថាមានប្រមាណ១៦៨ពាន់លានដុល្លារ ធ្លាប់បានសន្យាជាច្រើនឆ្នាំមកហើយ ដើម្បីលះបង់ទ្រព្យសម្បត្តិភាគច្រើនរបស់លោកទៅដល់មូលនិធិសប្បុរសធម៌របស់លោកផ្ទាល់ខ្លួន ហើយគោលដៅចុងក្រោយរបស់លោក គឺមិនចង់មានឈ្មោះក្នុងបញ្ជីបុគ្គលមានបំផុតរបស់ពិភពលោក។
ចាប់តាំងពីបង្កើតនៅក្នុងឆ្នាំ ២០០០ មូលនិធិរបស់លោក Bill Gates បានរួមចំណែកប្រមាណ ១០០ពាន់លានដុល្លារដល់បុព្វហេតុសកលលោក ពិសេសដើម្បីលុបបំបាត់ជំងឺឆ្លង និងភាពក្រីក្រ ដោះស្រាយការប្រែប្រួលអាកាសធាតុ និងពង្រីកលទ្ធភាពទទួលបានការថែទាំសុខភាព និងការអប់រំ។
ក្រៅពីការប្រកាសអំពីបំណងបរិច្ចាគទ្រព្យសម្បត្តិ ៩៩% របស់លោកហើយនោះ លោក Bill Gates ថែមទាំងបានរិះគន់យ៉ាងខ្លាំងលើលោក Elon Musk ចំពោះការកាត់បន្ថយការផ្តល់មូលនិធិដល់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិ (USAID) ដោយចោទប្រកាន់មហាសេដ្ឋីសញ្ជាតិអាមេរិកនាយកប្រតិបត្តិក្រុមហ៊ុន Tesla និងជាបុគ្គលមានបំផុតនៅលើពិភពលោករូបនេះចំៗថា កំពុងសម្លាប់កុមារក្រីក្រជាច្រើននៅលើពិភពលោក។
នៅក្នុងបទសម្ភាសន៍ជាមួយកាសែត Financial Times ដែលបានចេញផ្សាយកាលពីថ្ងៃទី៨ ខែឧសភា លោក Bill Gates បានថ្កោលទោសដល់ការកាត់បន្ថយការផ្តល់មូលនិធិភ្លាមៗដល់អង្គការ USAID ពីសំណាក់លោក Elon Musk តាមរយៈតួនាទីនាយកដ្ឋានប្រសិទ្ធភាពរបស់រដ្ឋាភិបាលអាមេរិក (Doge) ដោយលោកអះអាងថា ការកាត់បន្ថយនេះបាននាំឱ្យស្បៀងអាហារ និងថ្នាំសង្គ្រោះជីវិតផុតកំណត់ក្នុងឃ្លាំង ហើយអាចបណ្តាលឱ្យមានការកើតឡើងវិញនៃជំងឺដូចជា កញ្ជ្រឹល អេដស៍ និងជំងឺស្វិតដៃជើង។
លោក Gates បានអត្ថាធិប្បាយដូច្នេះថា «រូបភាពបុរសមានបំផុតលើពិភពលោកដែលកំពុងសម្លាប់កុមារក្រីក្របំផុតរបស់ពិភពលោក គឺជារឿងមិនល្អ»៕
ចែករំលែកព័តមាននេះ