ទីក្រុងបាងកក៖ ប្រមុខដឹកនាំយោធាមីយ៉ាន់ម៉ា ឧត្ដមសេនីយ៍មីនអុងឡាំង បានអញ្ជើញទៅដល់ទីក្រុងបាងកក ប្រទេសថៃដែលកំពុងរងគ្រោះដោយសារការរញ្ជួយដីដូចគ្នា គ្រាន់តែថាមីយ៉ាន់ម៉ាស្លាប់ច្រើនជាង។ លោកអញ្ជើញទៅថៃលើកនេះដើម្បីចូលរួមកិច្ចប្រជុំពិសេសមួយដែលមានប្រទេសចំនួន៧ស្ថិតនៅជាប់នឹងឈូងសមុទ្របេងកាល់ (Bengal) ជាសមាជិក។
គេរំពឹងថាលោកមីនអុងឡាំងនឹងឆ្លៀតយកឱកាសនេះដើម្បីនិយាយរំលឹកអំពីព្រឹត្តិការណ៍រញ្ជួយដីដ៏មហាប្រល័យដែលវាយប្រហារខ្លាំងជាងគេទីក្រុងម៉ាន់ដាឡេ (Mandalay) របស់មីយ៉ាន់ម៉ាកាលពីថ្ងៃសុក្រសប្ដាហ៍មុន និងនាំទៅដល់ការស្លាប់មនុស្សលើសពីបីពាន់នាក់។ ក្រៅពីនេះ មនុស្សជាងបីរយនាក់ទៀតនៅបាត់ខ្លួននៅឡើយ។ អាចនៅរស់ខ្លះ និងស្លាប់ខ្លះ។
ទោះបីអាក្រក់ល្អសខ្មៅនឹងគ្នាយ៉ាងណាក្ដី របបសឹករបស់លោកមីនអុងឡាំងហាក់ដូចជាទទួលបានសមានចិត្តពីសំណាក់ប្រទេសនានាទូទាំងពិភពលោក។ ពួកគេបញ្ជូនជំនួយ ឬក្រុមអ្នកជួយសង្គ្រោះដើម្បីស្វែងរកអ្នកដែលអាចនៅរស់រានមានជីវិតពីហេតុការណ៍នេះ។ ទោះជាយ៉ាងណាក្ដី ពួកគេប្រឈមនឹងឧបសគ្គជាច្រើននៅក្នុងបេសកកម្មជួយសង្គ្រោះលើកនេះ។
ម៉្យាងដងវិថីនានាត្រូវកាត់ផ្ដាច់ជាកំណាត់ៗដោយសារការរញ្ជួយដី ម៉្យាងរបបសឹក និងពួកឧទ្ទាមបន្តវាយប្រហារគ្នាធ្វើឱ្យការដឹកជញ្ជូនស្បៀងអាហារទៅចែកជូនជនរងគ្រោះជួបការលំបាក និងម៉្យាងទៀត នៅពេលឆាប់ៗនេះនឹងមានភ្លៀងធ្លាក់កក់ខែនៅរដូវប្រាំងចាប់ពីថ្ងៃទី ៦-១១ ខែមេសា។ ដូច្នេះ អ្នកខ្លះបារម្ភថាបើសិនភ្លៀងធ្លាក់ខ្លាំងពេកដល់ថ្នាក់ក្លាយជាគ្រោះទឹកជំនន់លិចអគារបាក់បែកដោយសារការរញ្ជួយដីនោះនឹងធ្វើឱ្យអ្នកដែលនៅរស់ក្រោមអគារក៏អាចនឹងលង់ទឹកស្លាប់ផងដែរ។
បន្ទាប់ពីមានករណីភ្នាក់ងារមនុស្សធម៌របស់ចិនរងការស្ទាក់ផ្លូវ និងបាញ់ប្រឆាបៗឡើងទៅលើអាកាសជាលក្ខណៈព្រមានពីសំណាក់ទាហានរបបសឹក ថ្ងៃនេះរបបសឹកក៏ប្រកាសផ្អាកបាញ់គ្នាមួយគ្រាសិនជាមួយពួកឧទ្ទាមដើម្បីជួយសម្រួលការដឹកជញ្ជូនជំនួយ។ ក្រឡេកទៅមើលទីក្រុងសាកាំង (Sagaing) ចម្ងាយ១៥គីឡូម៉ែត្រពីចំណុចរញ្ជួយដី គេឃើញថាមនុស្សកំពុងតែស្រេកឃ្លានខ្លាំងណាស់ និងកំពុងតម្រង់ជួរគ្នាដើម្បីទទួលបានជំនួយបន្តិចបន្តួចគ្រាន់ដោះស្រាយជីវភាពរស់នៅប្រចាំថ្ងៃ។
ទំហំនៃការខូចខាតលើកនេះពិតជាធំធេងណាស់ អង្គការសុខភាពពិភពលោកថ្លែងថាផ្ទះប្រហែល១/៣នៅទីក្រុងនេះត្រូវបាក់រលំគ្រេងដល់ដី។ ទោះបីការរញ្ជួយដីកន្លងផុតទៅជិត១អាទិត្យទៅហើយ ជំនួយគួរណាស់ទៅដល់ដៃរបស់អ្នកអត់-ឃ្លានជាបណ្ដើរៗ។ ប៉ុន្តែពួកគេថាមិនទាន់ទទួលបានជំនួយគ្រប់គ្រាន់នៅឡើយទេ។ នៅម្ដុំនោះមានអណ្ដូង១ដែលអាចដងទឹកយកទៅប្រើប្រាស់បាន។ ប៉ុន្តែពួកគេគ្មានប្រេងឥន្ធនៈសម្រាប់បូមទឹកពីអណ្ដូងនេះទេ។ អគ្គិសនីក៏គ្មានប្រើដែរ។ ពួកគេមិនទាន់ដឹងថាតើត្រូវបន្តរស់នៅក្នុងភាពអន្ធការនេះរហូតដល់ពេលណាទេ។ នេះបើយោងតាមសេចក្ដីរាយការណ៍របស់អាអែហ្វប៉េ (AFP) និងប្រភពដទៃទៀត៕
ចែករំលែកព័តមាននេះ