ទីក្រុងសេអ៊ូល៖ ប្រទេសកូរ៉េខាងត្បូងត្រៀមរៀបចំការបោះឆ្នោតជ្រើសរើសប្រធានាធិបតីថ្មីជំនួសលោកយូនស៊ុកយូលដែលត្រូវតុលាការធម្មនុញ្ញសម្រេចដកតំណែងជាស្ថាពរតបទៅតាមសំណើរបស់រដ្ឋសភា។ សភាបានបោះឆ្នោតដកតំណែងរបស់លោកតាំងពីចុងខែធ្នូ។ ប្រភពខ្លះថាការបោះឆ្នោតអាចនឹងរៀបចំនៅខែមិថុនាដោយយោងទៅលើការកំណត់របស់រដ្ឋធម្មនុញ្ញកូរ៉េខាងត្បូងដែលចែងថាក្រោយការដកតំណែងប្រធានាធិបតីជាស្ថាពរ ការបោះឆ្នោតត្រូវរៀបចំនៅក្នុងរង្វង់៦០ថ្ងៃ។
ម៉្យាងទៀត រដ្ឋាភិបាលក៏ត្រូវតែប្រកាសកាលបរិច្ឆេទឱ្យបាន៥០ថ្ងៃមុនការបោះឆ្នោតផងដែរ។ ក្រុមអ្នកសង្កេតការណ៍នយោបាយយល់ថាប្រហែលជារៀបចំនៅថ្ងៃទី៣ ខែមិថុនាឆ្នាំនេះដែលជាថ្ងៃចុងក្រោយនៃឱសានវាទ។ ធ្វើដូច្នេះដើម្បីឱ្យគណបក្សនយោបាយនានាមានពេលវេលាគ្រប់គ្រាន់ដើម្បីរៀបចំខ្លួន និងចុះឃោសនារកសំឡេងឆ្នោតនៅតាមមណ្ឌលរបស់ខ្លួន។
សូមរំលឹកថាកាលពីពេលអតីតប្រធានាធិបតីកូរ៉េខាងត្បូង លោកស្រីប៉ាក់ឃុនហេ ត្រូវបានដកពីតំណែងកាលពីឆ្នាំ២០១៧ ការបោះឆ្នោតជ្រើសរើសប្រធានាធិបតីក៏រៀបចំឡើងនៅថ្ងៃចុងក្រោយនៃឱសានវាទ៦០ថ្ងៃកំណត់ដោយរដ្ឋធម្មនុញ្ញផងដែរ។ កាលនោះ គ្រាន់តែបោះឆ្នោតហើយពីក្បាលល្ងាច រាប់សន្លឹកឆ្នោតទាំងយប់។ ក្រោយពេលដឹងលទ្ធផលឆ្នោត ប្រធានាធិបតីថ្មី លោកមូនជែអ៊ីនស្បថចូលកាន់តំណែងទាំងយប់។ នៅពេលព្រឹកឡើង លោកចូលធ្វើការនៅវិមានប្រធានាធិបតីតែម្ដង។
បើគណៈកម្មការជាតិរៀបចំការបោះឆ្នោតប្រកាសយកថ្ងៃទី៣ ខែមិថុនាជាថ្ងៃបោះឆ្នោតមែន ការទទួលចុះឈ្មោះគណបក្សនយោបាយដែលចង់ប្រកួតប្រជែងនឹងចាប់ផ្ដើមពីថ្ងៃទី១០-១១ ខែឧសភា។ បន្ទាប់មក ដំណើរការឃោសនាបោះឆ្នោតនឹងចាប់ផ្ដើមពីថ្ងៃទី១២ឧសភាដល់ថ្ងៃទី២ ខែមិថុនា។ ប្រជាជនកូរ៉េខាងត្បូងអាចនឹងចេញទៅបោះឆ្នោតមុនកាលកំណត់ចាប់ពីថ្ងៃទៅ២៩-៣០ ខែឧសភា។ នៅពេលដឹងលទ្ធផលឆ្នោតភ្លាម ប្រធានាធិបតីជាប់ឆ្នោតថ្មីនឹងស្បថចូលកាន់តំណែងភ្លាម។
ថ្ងៃនេះ ប្រធានាធិបតីស្ដីទីកូរ៉េខាងត្បូង លោកហានដុកស៊ូ (Han Duck-soo) ប្រកាសត្រៀមខ្លួនមើលការខុសត្រូវលើការបោះឆ្នោតដើម្បីធានាថាប្រព្រឹត្តទៅដោយសេរី និងយុត្តិធម៌។ លោកចង់ឱ្យមហាជនរក្សាភាពស្ងប់ស្ងាត់ទាំងអ្នកគាំទ្រលោកយូនស៊ុកយូល និងអ្នកប្រឆាំងនឹងលោក។ លោកអំពាវនាវទៅអ្នកបម្រើការនៅក្នុងវិស័យបោះឆ្នោតសូមរក្សាខ្លួនជាអព្យាក្រឹត កុំធ្វើការដោយលម្អៀងដោយសារនិន្នាការនយោបាយ។ ចំណែកអ្នកនយោបាយ និងអ្នកតំណាងរាស្ត្រនៅសភាគួរណាស់ទុកការខ្វែងគំនិតគ្នាមួយឡែកសិនដើម្បីចាប់ដៃគ្នាកសាងជាតិ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានយុនហាប់ និងប្រភពដទៃទៀត៕
ចែករំលែកព័តមាននេះ