ប្រទេសឡេសូតូ ៖ រដ្ឋាភិបាលឡេសូតូ (Lesotho) ដែលជាប្រទេសតូចមួយនៅភាគខាងត្បូងទ្វីបអាហ្វ្រិករបស់ខ្លួន បានគូសបញ្ជាក់កាលពីថ្ងៃទី៣ ខែមេសា ឆ្នាំ២០២៥ ថា ខ្លួននឹងបញ្ជូនគណៈប្រតិភូរដ្ឋាភិបាលបន្ទាន់ទៅកាន់សហរដ្ឋអាមេរិកដើម្បីតវ៉ា…
ប្រទេសឡេសូតូ ៖ រដ្ឋាភិបាលឡេសូតូ (Lesotho) ដែលជាប្រទេសតូចមួយនៅភាគខាងត្បូងទ្វីបអាហ្វ្រិករបស់ខ្លួន បានគូសបញ្ជាក់កាលពីថ្ងៃទី៣ ខែមេសា ឆ្នាំ២០២៥ ថា ខ្លួននឹងបញ្ជូនគណៈប្រតិភូរដ្ឋាភិបាលបន្ទាន់ទៅកាន់សហរដ្ឋអាមេរិកដើម្បីតវ៉ា បន្ទាប់ពីទីក្រុងវ៉ាស៊ីនតោនបានដាក់ពន្ធរហូតដល់ ៥០% លើការនាំចូលរបស់ខ្លួន ដែលជាអត្រាខ្ពស់បំផុតក្នុងចំណោមប្រទេសផ្សេងទៀត។
នៅក្នុងបញ្ជីពន្ធថ្មី ដែលត្រូវបានប្រកាសដោយលោកប្រធានាធិបតី ដូណាល់ ត្រាំ កាលពីថ្ងៃទី២ ខែមេសា ឆ្នាំ២០២៥ កន្លងទៅនោះ ប្រទេសឡេសូតូ និងដែនកោះ Saint Pierre and Miquelon ស្ថិតនៅភាគពាយព្យនៃមហាសមុទ្រអាត្លង់ទិក ឈរនៅកំពូលតារាងពន្ធថ្មីរបស់សហរដ្ឋអាមេរិក ពោលចំនួន ៥០% ដូចគ្នា។
លោក Mokhethi Shelile រដ្ឋមន្ត្រីក្រសួងពាណិជ្ជកម្មឡេសូតូបានប្រាប់អ្នកយកព័ត៌មាននៅទីក្រុងម៉ាសេរុយ (Maseru) ថា «យើងត្រូវធ្វើដំណើរជាបន្ទាន់ទៅសហរដ្ឋអាមេរិក ដើម្បីចូលរួមជាមួយបណ្តានាយកប្រតិបត្តិក្រុមហ៊ុនរបស់យើង ហើយអង្វរករអំពីករណីរបស់យើង ព្រោះយើងខ្លាចបំផុតការបិទរោងចក្រភ្លាមៗ និងការបាត់បង់ការងារ»។
ផលិតផលក្នុងស្រុកសរុបប្រចាំឆ្នាំ (GDP) របស់ប្រទេសឡេសូតូមានចំនួនត្រឹម២ពាន់លានដុល្លារអាមេរិក ដោយពឹងផ្អែកយ៉ាងខ្លាំងលើការនាំចេញផលិតផលវាយនភ័ណ្ឌភាគច្រើន រួមទាំងខោខូវប៊យផងដែរ។ ឧស្សាហកម្មសម្លៀកបំពាក់ គឺជាឧស្សាហកម្មដឹកនាំធំជាងគេបំផុតសម្រាប់ប្រទេសឡេសូតូ ដែលមានប្រជាជនសរុបប្រហែល ២.៣លាននាក់ ដែលរដ្ឋបាលលោក ត្រាំ អះអាងថាស្ថិតក្នុងចំណោមអ្នកល្មើសដ៏អាក្រក់បំផុតជាមួយនឹងពន្ធខ្ពស់លើការនាំចូលពីសហរដ្ឋអាមេរិក។
រដ្ឋមន្ត្រីក្រសួងពាណិជ្ជកម្មឡេសូតូបានបន្តថាមានរោងចក្រចំនួន ១១ កំពុងដំណើរការនៅក្នុងប្រទេស ដែលភាគច្រើននាំចេញទំនិញទៅកាន់សហរដ្ឋអាមេរិក និងផ្តល់ការងារដល់កម្មករប្រមាណ ១២,០០០នាក់ ដោយបន្ថែមថា លោកបានស្នើសុំឱ្យរោងចក្របន្តដំណើរការ ខណៈពេលដែលមន្ត្រីរដ្ឋាភិបាលធ្វើការលើដំណោះស្រាយ រួមទាំងការធ្វើពិពិធកម្មភាពជាដៃគូពាណិជ្ជកម្មផ្សេងទៀតរបស់ខ្លួនផងដែរ។
ប្រទេសឡេសូតូស្ថិតក្នុងចំណោមបណ្តាប្រទេសអនុតំបន់សាហារ៉ាអាហ្វ្រិកប្រហែល ៣០ប្រទេស ដែលទទួលបានអត្ថប្រយោជន៍ពីការនាំចូលដោយមិនមានកាតព្វកិច្ច សម្រាប់ផលិតផលមួយចំនួនទៅទីផ្សារសហរដ្ឋអាមេរិក តាមរយៈកិច្ចព្រមព្រៀងច្បាប់កំណើន និងឱកាសអាហ្វ្រិក AGOA។
កិច្ចព្រមព្រៀងច្បាប់កំណើន និងឱកាសអាហ្វ្រិក AGOA គឺជាផ្នែកមួយនៃច្បាប់ដែលត្រូវបានអនុម័តដោយសភាសហរដ្ឋអាមេរិកកកាលពីខែឧសភា ឆ្នាំ ២០០០។ គោលបំណងដែលបានបញ្ជាក់នៃច្បាប់នេះ ដើម្បីជួយដល់សេដ្ឋកិច្ចនៃអនុតំបន់សាហារ៉ាអាហ្វ្រិក និងដើម្បីកែលម្អទំនាក់ទំនងសេដ្ឋកិច្ចរវាងសហរដ្ឋអាមេរិក និងតំបន់។ បន្ទាប់ពិអស់សុពលភាពរយៈពេល១៥ឆ្នាំដំបូងរបស់ខ្លួន កិច្ចព្រមព្រៀង AGOA ត្រូវបានបន្តនៅថ្ងៃទី២៩ ខែមិថុនា ឆ្នាំ២០១៥ ដោយ១០ឆ្នាំបន្ថែមទៀតដល់ឆ្នាំ២០២៥។
ទោះយ៉ាងណា តាមរយៈពេលពន្ធគយចុងក្រោយប្រកាសដោយលោក ត្រាំ បានបន្ថែមការភ័យខ្លាចអំពីអនាគតរបស់កិច្ចព្រមព្រៀងនេះ ដែលនឹងត្រូវពិនិត្យឡើងវិញក្នុងខែកញ្ញាខាងមុខ៕ ប្រភព ៖ AFP
ចែករំលែកព័តមាននេះ