ខេត្តបាត់ដំបង ៖ ជនប្រព្រឹត្តបទល្មើសនេសាទខុសច្បាប់ (ប្រើឧបករណ៍ឆក់ត្រី) ចំនួន០២នាក់ ត្រូវបានកម្លាំងកងរាជអាវុធហត្ថ ឃាត់ខ្លួនជាមួយនឹងការរឹបអូសវត្ថុតាងមួយចំនួនផង កាលពីវេលាម៉ោង៨ព្រឹក ថ្ងៃទី០៤ មេសា…
ខេត្តបាត់ដំបង ៖ ជនប្រព្រឹត្តបទល្មើសនេសាទខុសច្បាប់ (ប្រើឧបករណ៍ឆក់ត្រី) ចំនួន០២នាក់ ត្រូវបានកម្លាំងកងរាជអាវុធហត្ថ ឃាត់ខ្លួនជាមួយនឹងការរឹបអូសវត្ថុតាងមួយចំនួនផង កាលពីវេលាម៉ោង៨ព្រឹក ថ្ងៃទី០៤ មេសា នៅចំណុចកោះវែង ស្ថិតក្នុងភូមិថ្វាង ឃុំកោះជីវាំង ស្រុកឯកភ្នំ នៃតំបន់ទន្លេសាប ។
ប្រភពពីមន្ត្រីកងរាជអាវុធហត្ថ បានឲ្យដឹងថា ជនប្រព្រឹត្តបទល្មើសនេសាទ ដែលត្រូវឃាត់ខ្លួនម្នាក់ឈ្មោះ ថេង ពន្លក ហៅ ជីលក ប្រុស អាយុ៤៤ឆ្នាំ និង ឈ្មោះ ធុល ថាន ប្រុស អាយុ៤២ឆ្នាំ ពួកគេមានមុខរបរនេសាទត្រី រស់នៅភូមិ ឃុំកើតហេតុ ។
ប្រភពដដែលបានប្រាប់ថា ជនសង្ស័យទាំង០២នាក់នេះ ត្រូវបានកម្លាំងកងរាជអាវុធហត្ថប្រចាំស្នាក់ការសន្តិសុខលេខ៥០៨ និងចូលរួមពីមន្ត្រីមូលដ្ឋានកងរាជអាវុធហត្ដស្រុកឯកភ្នំផង ដែលចេញល្បាតប្រទះឃើញកំពុងប្រព្រឹត្តជាក់ស្ដែង ទើបឡោមព័ទ្ធចាប់បានទាំងមនុស្ស ទាំងឧបករណ៍នេសាទខុសច្បាប់ ។
ជាមួយនឹងការឃាត់ខ្លួនជនសង្ស័យ០២នាក់ មន្ត្រីជំនាញក៏បានដកហូតនូវវត្ថុតាងប្រើប្រាសខុសច្បាប់មួយចំនួនផងដូចជា ៖ ទូកស្មាច់បំពាក់ម៉ាស៊ីនចំនួន០២គ្រឿង អាំងវិចទ័រឆក់ចំនួន០១គ្រឿង អាគុយ៥០អំពែរ ចំនួន០១គ្រាប់ ដងសម្រាប់ឆក់ត្រីចំនួន០១គូ កាំភ្លើងខ្យល់ចំនួន០១ដើម និងត្រីចម្រុះជាច្រើនគីឡូក្រាមទៀត ។
បើតាមសមត្ថកិច្ចបាននិយាយថា ជនសង្ស័យទាំង០២នាក់នេះតែងប្រើប្រាស់ឧបករណ៍នេសាទខុសច្បាប់របៀបនេះ «ឆក់ត្រី» យ៉ាងសកម្ម និងប្រព្រឹត្តស្ទើរគ្រប់ទីកន្លែង តាមរយៈការប្រើប្រាស់ទូកស្មាច់បំពាក់ម៉ាស៊ីនជាមធ្យោបាយប្រព្រឹត្តបទល្មើស តែពេលនេះជាប់អន្ទាក់ហើយ ។
ពេលនេះ មន្ត្រីជំនាញកំពុងសួរនាំបឋម មុនពេលបញ្ជូនទៅកាន់មន្ត្រីជំនាញជលផលចាត់ការតាមនីតិវិធី ៕
ចែករំលែកព័តមាននេះ