ខេត្តកណ្តាល ៖ នគរបាលស្រុកស្អាង ចាប់ឃាត់ខ្លួនកូនអកតញ្ញូម្នាក់ ព្រោះតែខឹងសុំលុយម្តាយ១០ម៉ឺនរៀល ទៅរំលស់ទូរសព្ទ ដែលខ្លួនយកដាក់បញ្ចាំ មិនបាន ក៏ទាញកាំបិតផ្គាក់គំរាមសម្លា.ប់ម្តាយ រួចកាប់បំផ្លិចបំផ្លាញទ្រព្យសម្បត្តិ…
ខេត្តកណ្តាល ៖ នគរបាលស្រុកស្អាង ចាប់ឃាត់ខ្លួនកូនអកតញ្ញូម្នាក់ ព្រោះតែខឹងសុំលុយម្តាយ១០ម៉ឺនរៀល ទៅរំលស់ទូរសព្ទ ដែលខ្លួនយកដាក់បញ្ចាំ មិនបាន ក៏ទាញកាំបិតផ្គាក់គំរាមសម្លា.ប់ម្តាយ រួចកាប់បំផ្លិចបំផ្លាញទ្រព្យសម្បត្តិ នៅក្នុងផ្ទះ ។
ហេតុការណ៍នេះបានកើតឡើង កាលពីវេលាម៉ោង០៩និង៣០នាទីព្រឹកថ្ងៃទី២ ខែមេសា ឆ្នាំ២០២៥ ស្ថិតនៅក្នុងភូមិពាមប្រជុំ ឃុំព្រែកំបិល ស្រុកស្អាង ខេត្តកណ្ដាល ។
សមត្ថកិច្ចបានឲ្យដឹងថា សង្ស័យមានឈ្មោះ លី គឹមស្រ៊ាង (ត្រូវជាកូនបង្កើត) ភេទប្រុស អាយុ៤៣ឆ្នាំ មុខរបរមិនពិតប្រាកដ មានទីលំនៅភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល ។ ក្នុងនោះ សមត្ថកិច្ចដកហូតវត្ថុតាង រួមមាន ៖ កាំបិតផ្គាក់ចំនួន០១ដើម ផ្លែដែក ដងឬស្សី ។
កន្លងមកជនសង្ស័យ ក៏ធ្លាប់ជាប់ពន្ធនាគារខេត្តកណ្ដាល ចំនួន០១លើក រយៈពេល១៨ខែ ពីបទធ្វើឲ្យខូចខាតដោយចេតនា និងប្រីប្រាស់គ្រឿងញៀន និងត្រូវបានក្រុមគ្រួសារយកទៅមណ្ឌលកែប្រែបន្សាប់គ្រឿងញៀន ចំនួន០២លើកផងដែរ ។
ចំណែកជនរងគ្រោះមានឈ្មោះ លឹម មួយគាង (ត្រូវជាម្តាយបង្កើត) អាយុ៦៩ឆ្នាំ មុខរបរលក់ដូរ មានទីលំនៅ ក្នុងភូមិពាមប្រជុំ ឃុំព្រែកអំបិល ស្រុកស្អាង ខេត្តកណ្ដាល ។
បើយោងតាមប្រភពព័ត៌មានពីជនរងគ្រោះជាម្តាយ បានឲ្យដឹងថា នៅថ្ងៃទី០១ ខែមេសា ឆ្នាំ២០២៥ នៅវេលាម៉ោង០៥និង០០ នាទីល្ងាច ជនរងគ្រោះបានជិះម៉ូតូមកពីកន្លែងលក់ដូរនៅផ្សារ ដើម្បីត្រទ្បប់មកផ្ទះ ស្របពេលនោះ ក៏ជនសង្ស័យ (ដែលត្រូវជាកូន) បានឃើញបែបនេះ ក៏បានដើរមកសុំលុយគាត់ ចំនួន១០ម៉ឺនរៀល ដើម្បីយកលុយទៅបង់រំលស់ថ្លៃទូរសព្ទ ដែលខ្លួនបានយកទៅដាក់បញ្ចាំ ខណៈពេលនោះម្តាយបាននិយាយប្រាប់ជនសង្ស័យថា ៖ ម្តាយគ្មានលុយទេកូន ព្រោះលក់ដូរ មិនសូវដាច់ទេ។
ស្រាប់តែជនសង្ស័យខឹង ក៏ស្រែកគំរាមកំហែង រកកាប់សម្លា.ប់ម្តាយ និងយកកាំបិតផ្គាក់កាប់បំផ្លិចបំផ្លាញទ្រព្យសម្បត្តិនៅក្នុងផ្ទះបណ្តាលឲ្យខូចខាតអស់មួយចំនួនធំ ។
ជនរងគ្រោះបានបន្តថា លុះមកដល់ថ្ងៃទី០២ ខែមេសា ឆ្នាំ២០២៥ វេលាម៉ោង០៩និង៣០នាទីព្រឹក រូបគាត់បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកអំបិល ដើម្បីឲ្យជួយអន្តរាគមន៍។ ក្រោយពីទទួលបានពាក្យបណ្តឹងភ្លាមៗ កម្លាំងប៉ុស្តិ៍នគរបាលរដ្ឋបាលព្រែកអំបិល សហការជាមួយកម្លាំងនគរបាលជំនាញ នៃអធិការដ្ឋាននគរបាលស្រុកស្អាង ចុះទៅដល់កន្លែងកើតហេតុ ធ្វើការចាប់ឃាត់ខ្លួនជនសង្ស័យយកមកសាកសួរ ។
នៅចំពោះមុខមន្ត្រីនគរបាល ជនសង្ស័យបានសារភាពថា ខ្លួនពិតជាបានកាំបិតផ្គាក់គំរា.មសម្លា.ប់ម្ដាយ និងកាប់បំផ្លាញទ្រព្យសម្បត្តិនៅក្នុងផ្ទះ ពិតប្រាកដមែន មូលហេតុខ្លួនចង់បានលុយចំនួន១០ម៉ឺនរៀល ដើម្បីយកទៅបង់ថ្លៃទូរសព្ទដែលខ្លួនបានដាក់បញ្ចាំ ។
បច្ចុប្បន្ន ជនសង្ស័យខាងលើ ត្រូវបានកម្លាំងនគរបាលជំនាញស្រុកស្អាង កំពុងកសាងសំណុំរឿងបញ្ជូនទៅកាន់តុលាការ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ